Klimavicki rajon abvieščany «druhoj zonaj pahrozy» ŭ suviazi z vyjaŭlenym u susiednim rajonie Rasii ačahom AČS

U Klimavickim rajonie Mahiloŭskaj vobłaści pryniaty ŭzmocnienyja miery biaśpieki ŭ suviazi z vyjaŭlenym u susiednim Šumiackim rajonie Smalenskaj vobłaści Rasii ačahom afrykanskaj čumy śviniej — tut byŭ zabity dzik ź virusam AČS, paviedamlaje BiełaPAN.

Terytoryja Klimavickaha rajona abvieščanaja «druhoj zonaj pahrozy»: paśla niepraciahłaha zacišša ad pryvatnych haspadaroŭ znoŭ patrabujuć, kab jany pazbylisia svojskich śviniej.

Rajvykankam pryniaŭ śpiecyjalnuju pastanovu. Što kankretna jana praduhledžvaje, vyśvietlić nie ŭdałosia. Adnak, jak vynikaje z aficyjnych rastłumačeńniaŭ, na rynkach rajona zabaraniajecca pradavać śviniej i pradukty śvinahadoŭli z pryvatnych haspadarak. Nielha ich vyvozić i za miežy rajona.

Supracoŭniki vieterynarnaj słužby abychodziać pryvatnyja padvorki i papiaredžvać pra niedapuščalnaść hadoŭli śviniej. Ludziam vypisvajuć pradpisańni z paznačeńniem terminu, da jakoha jany pavinny pazbycca žyvioły.

«Usio prapisana ŭ 758-j pastanovie Savieta ministraŭ. U piacikiłamietrovaj zonie vakoł śvinahadoŭčych abjektaŭ i kompleksaŭ nie pavinna być śviniej ni ŭ nasielnictva, ni ŭ supracoŭnikaŭ», — tłumačyć hałoŭny vieterynarny ŭrač rajona Siarhiej Ziańko.

Pryvatnyja haspadary kažuć, što zacišša z papiaredžańniami doŭžyłasia kala dvuch miesiacaŭ. Ciapier usio paŭtarajecca nanoŭ, jak u žniŭni.

«Užo dva razy chadzili, kažuć — čuma nabližajecca, — dzielicca adzin ź viaskoŭcaŭ. — Skazali, kab da novaha hoda śviniej nie było. Usich razam ža nie zabješ — u niekatorych dva, try parasiaci, a to i bolš. A la nas niedaloka dziaržaŭnyja śvinakompleksy. Byŭ staršynia savieta, dyk skazaŭ: «Ciapier kurej kuplajcie».

U vioskach ź nieachvotaj padparadkoŭvajucca patrabavańniam kantraloraŭ. Ličać, što chvala zapałochvańniaŭ znoŭ miniecca i nastupić zacišša. Adno z takich mierkavańniaŭ: «Skazali, što buduć chadzić praviarać i štrafy davać, ale tak heta ci nie — chto jaho viedaje. Nas vo papiaredzili ŭ žniŭni, my ŭziali dy i zabili. A niekatoryja ludzi nie zabili — i słušna zrabili. Choć sałam pačastavalisia, a my tolki škurki jadzim. Ciapier ža karoŭ mała chto trymaje. U nas u vioscy dziesiać karoŭ usiaho, i ad ich pazbaŭlajucca».

Jość siarod viaskoŭcaŭ i tyja, chto z razumieńniem stavicca da ŭzmacnieńnia mieraŭ biaśpieki, adnak i jany pryznajuć, što davodzicca praź siłu padparadkoŭvacca. Spadziajucca, što niekali situacyja źmienicca da lepšaha. «Ludzi rozumam razumiejuć, a voś sercam — nie, — razvažaje žychar adnoj ź viosak. — Kali b vy byli na miescy hetaha sielanina, jaki trymaje parsiuka, u jakoha duža mały zarobak ci piensija, i pazbavić jaho hetaha śvinča — ci zadavolenyja ludzi buduć, jak vy dumajecie? I dzieciam ža davodzicca dapamahać».

Za apošnija paŭhoda ŭ Smalenskaj vobłaści Rasii zarehistravany 21 vypadak afrykanskaj čumy śviniej. Infiekcyju vyjaŭlali i ŭ dzikoŭ, i ŭ svojskich śviniej. Na terytoryi piaci haspadarak nakładzieny karancin, siarod ich — akcyjaniernaje tavarystva «Zaimka» Šumiackaha rajona.

• 0
• 0
• 0
• 0
• 0
• 0
• 0
• 0