Dźvie siamji 20 hadoŭ žyvuć u chacie ź dziravymi ścienami
I čakajuć, što ahrakambinat-bankrut zrobić ramont.
Kvatera Žanny Hierasim u Alachnovičach (Maładziečanski rajon) vyhladaje niadrenna dla viaskovaj chaty: vialiki televizar, pijanina, abstalavanaja kuchnia z aŭtamatyčnaj pralnaj mašynaj, dušavaja kabina, tytan. Jość navat akvaryum. Adnak jak tolki skidaješ kurtku, adrazu stanovicca chałodna: zvonku troški vyšej za nul, u kvatery Žanny — plus 10 pa Celsii.
Dom №18
Taćciana Babior viadzie da svajho doma.
Taćciana Babior, susiedka Žanny Hierasim pa domie №18 na vulicy Centralnaj u vioscy Alachnovičy, kaža, što apytvała staražyłaŭ i vyśvietliła: domu 102 hady.
«Tut žyła panienka. Jaje syny pa race les spłaŭlali. Za savieckim časam ich represavali», — kaža jana.
U 1950-ja da jaho prybudavali jašče adno kryło, padzialili na čatyry kvatery i pieradali ptuškafabrycy. Budynak vykarystoŭvaŭsia ŭ jakaści «padmiennaha» žylla — vydavali jaho supracoŭnikam fabryki, pakul tyja čakali kvateru. Siońnia dom nie vyhladaje prydatnym dla žyćcia — zdajecca, źnieści i zabyć. Adnak u im adhetul žyvuć ludzi. I, vidać, jany zachraśli.
20 hadoŭ u baraku
Žyllo ŭ domie №18 Taćciana Babior i Žanna Hierasim sa svaimi siemjami atrymali 17 hadoŭ tamu. Im vydali jaho ŭ jakaści časovaha, jak supracoŭnikam alachnovickaj ptuškafabryki.
U 1990-ja kvatery ni ad ptuškafabryki, ni ad ahrakambinata «Alachnovičy», u jakuju taja pieratvaryłasia, jany nie atrymali. I vosiem hadoŭ tamu vyrašyli pryvatyzavać, što mieli. Adnak zrabić heta nie atrymałasia — na dom nie znajšłosia patrebnych dakumientaŭ.
«Dyrektar fabryki skazaŭ mnie, što padrychtavać usie nieabchodnyja papiery budzie vielmi doraha, tamu i nie dazvoliŭ vykupić kvatery», — skardzicca Taćciana Babior.
Žančyny ź siemjami praciahvali žyć u domie — inšych varyjantaŭ u ich nie było. Dom ža praciahvaŭ razburacca.
«Vyžyła adna rybka z 60-ci»
Praz choład u akvaryumie Žanny pamierli ŭsie rybki akramia adnoj — navat śpiecyjalny abahravalnik nie daje rady padtrymlivać nieabchodnuju tempieraturu vady.
Hałoŭny vorah samjaŭ Hierasim i Babior — choład. Kali ŭletku ŭ domie ciopła, dyk uzimku tempieratura ŭ domie nie padymajecca vyšej za plus 10 hradusaŭ pa Celsii. Hniłyja ścieny prapuskajuć choład. U kvatery Žanny Hierasim pad aknom navat jość dzirka, u jakuju možna prasunuć ruku. Ścieny za zimu pramiarzajuć naskroź, da ich prymiarzajuć anučy, koŭdry i paduški, jakimi ŭciaplajuć chatu, vada, pastaŭlenaja na padłohu, pieraŭtvarajecca ŭ lod.
Žanna žyvie sa svaim niepaŭnaletnim synam i 90-hadovym śviokram, jakoha pieraviezła ŭ kvateru paśla śmierci muža — mužčynu ŭžo ciažka dahladać siabie. La jaho łožka pastajanna staić uklučany abahravalnik, ale jon słaba ŭpłyvaje na tempieraturu ŭ pamiaškańni.
«Pahladzicie, pijanina voś, dačka zajmałasia. Ale jano razładžanaje ŭščent. Zatoje ścianu ŭciaplaje», — prachodzicca rukoj pa kłavišach Žanna. Ciapier pijanina Žanny vykonvaje vyklučna ciepłaizalacyjnuju funkcyju.
Praz vysokuju vilhotnaść ścieny kvatery pakrytyja ćvillu dy hrybkom. Žančyny kažuć, što jany robiać kaśmietyčny ramont, jaki, adnak, amal nie maje sensu — špalery advalvajucca ad ścien.
Nie pracujuć u domie i piečy — jany dziravyja i nie trymajuć ciapło. MNS navat aficyjna zabaraniała žančynam karystacca imi. Zabaronu, jakuju ciapier źniali, žančyny parušali — inakš žyć było niemahčyma.
Kvatera Taćciany Babior znachodzicca jašče ŭ horšym stanie, bo jana na rahu doma i hublaje bolš ciapła. Da taho ž jana prasiadaje — padłoha na kuchni adčuvalna nachilena.
«Pravodzili ahlad doma, vyśvietlili, što padmurak zahłybleny ŭ ziamlu tolki na try santymietry. Dziva, što jon tak prasiadaje!» — kaža jana.
Taćciana žyvie z unukam, jakomu davodzicca aficyjnym apiekunom.
«Chłopiec amal nie chvareje — zakaliŭsia ŭ chałodnaj chacie. Choć jaki plus», — kaža Taćciana.
Vajna pa pierapiscy
Stamiŭšysia ad takoha žyćcia i paśla niaŭdałaj sproby vykupić žyllo, Taćciana i Žanna pačali źviartacca da čynoŭnikaŭ. U vyniku dajšli da byłoha staršyni Minabłvykankama Barysa Batury i da staršyni Kamiteta dziaržkantrolu Alaksandra Jakabsona. Žycharki doma №18 patrabavali adsialić ich u suviazi z avaryjnym stanam doma.
Dom avaryjnym nie pryznali: pavodle adkaza Maładziečanskaha rajvykankama znos doma składaje 62%, a avaryjnym ličycca dom, znošany minimum na 65%.
«20 hadoŭ tamu ŭ domie žyła žančyna, jakaja taksama skardziłasia na jaho stan. I tady nie chapała hetych troch pracentaŭ dla pryznańnia jaho avaryjnym», — aburajecca Taćciana.
Adnak naviedvańni kabinietaŭ prynieśli i plon: ułady paabiacali pravieści kapitalny ramont budynka. Navat z pryciahnieńniem hrošaŭ rajvykankama — ahrakambinat «Alachnovičy» ŭ aficyjnych adkazach pisaŭ pra ciažkoje materyjalnaje stanoviščna pradpryjemstva i niemahčymaść apłacić pracy.
Padčas ramontu žycharoŭ doma vyrašyli adsialić u susiedni budynak — dom №7 pa vulicy Centralnaj. Praz heta pamiž žančynami i ahrakambinatam uźnikła novaja sprečka — jany admovilisia pierasialacca ŭ padmiennaje žyllo.
Kab pryśmiryć zanadta aktyŭnych žycharak, ahrakambinat padaŭ na Taćcianu i Žannu ŭ sud i zapatrabavaŭ prymusovaha vysialeńnia.
«Siomy dom, u jaki nas chacieli adsialić na čas ramontu — prosta žach! Jon ničym nie lepš za naš. Tam hniłyja padłohi, razburanyja piečy, na ścianach ćvil. U nas choć vadapravod i telefon jość, a tam i hetaha niama. Dy i płošča kvater na padmienu była značna mienšaja. Ja b banalna nie zmahła łožki dla ŭsich pastavić», — raskazvaje Žanna.
Da taho ž u ahrakambinata nie było dakumientaŭ dla praviadzieńnia kapitalnaha ramontu — padrychtoŭvać ich płanavałasia ŭžo paśla adsialeńnia doma. Heta naściarožyła žančyn: jany pabajalisia, što mohuć zachrasnuć u jašče horšych umovach na niavyznačany čas
«Nam skazali: kab abaraniacca ŭ sudzie, biarycie biaspłatnaha advakata ŭ Maładziečnie. Ale my naniali minskaha advakata. Addali 6 miljonaŭ, ale nie darma», — raskazvaje Taćciana.
U vyniku arhumienty siemjaŭ Babior i Hierasim pieravažyli, i ŭ prymusovym adsialeńni sud admoviŭ.
«Dzieci na łyžach uciakali ŭ les»
Akramia drennych umoŭ pražyvańnia Taćcianu i Žannu aburaje, što ich vajna pa pierapiscy z čynoŭnikami zakranuła i ni ŭ čym nie vinavatych dziaciej.
«Nam usio dasyłali papiery ab nieadpaviednaści sanitarnych norm u chacie dla pražyvańnia niepaŭnaletnich dziaciej. Kazali, što my nienaležnym čynam vykonvajem baćkoŭskija abaviazki, što stavim pad pahrozu žyćcio i zdaroŭje dziaciej», — kažuć jany.
Aficyjnaje papiaredžańnie z prakuratury Maładziečanskaha rajona nasamreč prychodziła Žańnie Hierasim u žniŭni 2012-ha. Adnak u kastryčniku, praz dva miesiacy paśla, Minzdaroŭja paviedamiła žančynie pra toje, što ich dom źjaŭlajecca prydatnym dla pražyvańnia, choć i z parušeńniem niekatorych sanitarnych i techničnych patrabavańniaŭ.
«Dziŭna, što ŭ papierach uzhadvajecca tolki moj niepaŭnaletni syn. Pra ŭnuka, jaki prapisany ŭ domie, nie kažuć ni słova. Ale dzieci bajalisia, što ich zabiaruć. Kali adnojčy takoje papiaredžańnie pryjšło ŭzimku, jany na łyžach źbiehli ŭ les», — raskazvaje Žanna.
Niezadavalnialnyja varyjanty
Žančyny klanucca: im patrebny tolki ramont doma, na čas jakoha jany patrabujuć adsialeńnia ŭ ciopłaje žyllo, bo jany stamilisia viečna miorznuć. Jany prapanujuć samyja fantastyčnyja varyjanty.
«My prasili, dajcie nam miesca ŭ internacie ahrakambinata. My napišam raśpisku, što vierniemsia, kali ramont skončycca. Ci, ja viedaju, jość kvatery ad ahrakambinata, u jakich žyvuć niepłacielniki. Dajcie nam takuju kvateru na čas ramonta — my pahasim usie zapazyčanaści», — kaža Žanna.
Adnak vidavočna, što ahrakambinat ničoha pradprymać nie budzie. Choć Taćciana i Žanna addali ptuškafabrycy pa siem hadoŭ, a muž Žanny — siamnaccać, nichto z žančyn ciapier nie źjaŭlajecca supracoŭnikam ahrakambinata «Alachnovičy». Taćciana Babior uvohule vyjšła na piensiju, choć i praciahvaje pracavać u dvuch miescach. Sam ža ahrakambinat znachodzicca ŭ stanie likvidacyi pradpryjemstva.
U jakaści kampramisa abodvum žančynam prapanavali ŭładkavacca na AAT «Dubrova-2013», jakoje źjaviłasia ŭ vyniku rearhanizacyi alachnovickaha ahrakambinata, kab atrymać žyllo ad pradprymstva. Adnak Taćciana i Žanna adkinuli hety varyjant. Jany kažuć, što, pa-pieršaje, zarobki na «Dubrova-2013» nie pieravyšajuć 100 dalaraŭ, a na takija hrošy siamju nie prakarmić. Pa-druhoje, da pracy treba dabiracca 12 kiłamietraŭ svajoju chadoju. I pa-treciaje, žyllo dajuć tolki na čas pracy.
Ciapier žančyny stajać u čarzie na budaŭnictva kvatery, adnak kažuć, što paciahnuć tolki lhotny kredyt. Dla jaho atrymańnia nieabchodna ličycca ŭ śpisach na palapšeńnie žyllovych umoŭ. Zanieści ŭ taki śpis mohuć žycharoŭ doma ŭ avaryjnym stanie. Adnak domu №18 da hetaha stanu nie chapaje troch pracentaŭ.
Miascovyja ŭłady majuć nakont situacyi vakoł doma №18 dakładna vyznačanuju pazicyju. Staršynia Maładziečanskaha rajvykankama Dźmitry Jachnaviec skazaŭ karespandentu «NN», što žančyny razdźmuli historyju, kab lohkim čynam atrymać kvatery.
«Rajvykankam pahadziŭsia dać srodki na ramont doma. Adnak rekanstrukcyju i kapitalny ramont budynka možna pravieści tolki z adsialeńniem žycharoŭ. U dadzieny moman u maniaŭrovym fondzie rajvykankama jość tolki kvatery ŭ domie №7 pa vułcy Centralnaja ŭ Alachnovičach. Jak tolki žychary hetaha doma pierajeduć, my pačniem ramont», — reziumavaŭ jon.
Ciapier čytajuć
Ahientka Kardaš vykarystoŭvała seks, kab źbirać infarmacyju pra kalinoŭcaŭ i zavierbavać ukrainskaha kamandzira. A kurataru KDB pisała pra jaho: «Moj łoch»3535
Ahientka Kardaš vykarystoŭvała seks, kab źbirać infarmacyju pra kalinoŭcaŭ i zavierbavać ukrainskaha kamandzira. A kurataru KDB pisała pra jaho: «Moj łoch»35
U Vieniesuele budzie nie prosta vyzvaleńnie palitviaźniaŭ, a amnistyja, pryčym za ŭsie hady. A miascovuju «amierykanku» pieratvorać u hramadskuju prastoru1717
Kamientary