Minčuki adstajali drevy ŭ parku Horkaha, jakija «pamiatajuć Kołasa»
U administracyi Centralnaha parka imia Horkaha 26 lutaha adbyłosia hramadskaje abmierkavańnie mahčymaha śpiłavańnia drevaŭ.
Pavodle rašeńnia administracyi Partyzanskaha rajona stalicy, u parku vyjaŭlena 28 drevaŭ, jakija było vyrašana z 3 sakavika śsiekčy. Hety krok aburyŭ nieabyjakavych da losu parku ludziej i ekałahičnych aktyvistaŭ: pad siakieru sabralisia puścić «stahadovyja tapoli» — vialikija drevy, jakija farmirujuć źniešniaje abličča parku. Tamu kiraŭnictva UP «Haradskija parki Zielenbuda» abviaściła hramadskaje abmierkavańnie.
Dyrektar «Haradskich parkaŭ Zielenbuda» Uładzimir Vasin patłumačyŭ, što drevy źbirajucca źniščyć tolki dziela biaśpieki naviedvalnikaŭ.
«Čatyry hady tamu ŭ parku adbyŭsia vypadak: na dziaŭčynu ŭpała dreva i złamała joj chrybiet. Dreva było vialikaje, u jaho była vialikaja parusnaść. Kab praduchilić takija incydenty ŭ dalejšym, my vyrašyli śsiekčy niekatoryja drevy. Drevy śsiakajucca nie pad niejkuju placoŭku ci inšyja mety, jak pišuć u internecie», — paviedamiŭ Vasin.
Adnak słuchačy, jakich nie źmiaściła zała administracyi, sustreli słovy Vasina ŭ štychi.
Anton Dzianisaŭ, historyk i kandydat navuk adznačyŭ, što nie razumieje, čamu drevy «jakija pamiatajuć Jakuba Kołasa i pradstaŭlajuć histaryčnuju kaštoŭnaść prosta svaim uzrostam» treba mienavita znosić:
«Jość i inšyja mietady. Naprykład, sanacyja. Chvoryja drevy možna padlačyć. Kali ŭ administracyi nie chapaje srodkaŭ, dapamahčy moža hramadskaść».
Adnak načalnik adździeła biahučaha ŭtrymańnia i dobraŭparadkavańnia abjektaŭ zialonaj haspadarki UP «Minskzielenbud» Alena Chasanava nie pahadziłasia z historykam. Jana patłumačyła, što drevam daloka nie sto hadoŭ.
«Hetyja drevy vysadžvalisia pierad vajnoj. Im kala 70 hadoŭ. Ale tapoli — drevy, jakija doŭha nie žyvuć. U ich vielmi intensiŭny pieryjad rostu i jany chutka starejuć.
Staryja drevy paražajucca drevarazburalnymi hrybami i ŭjaŭlajuć niebiaśpieku».
Najbolš burlivyja sprečki pačalisia, kali słova ŭziaŭ ekołah Ihar Korzun. Jon pradstaviŭ spravazdaču, jakuju hramadskaja arhanizacyja «Zialonaja sietka» zamoviła Instytutu ekśpierymientalnaj bataniki.
Śpiecyjalisty Instytuta praviali ahlad dreŭ 16 z 28 dreŭ, jakija byli paznačany pad znos, i rekamiendavali abaviazkova śsiekčy tolki try drevy. Dla astatnich drevaŭ byli padrychtavanyja rekamiendacyi pa ich zachavańni. Niekalki ž dreŭ śpiecyjalisty kateharyčna zabaranili śpilvać, bo jany ŭjaŭlajuć nadzvyčajnuju kaštoŭnaść. Siarod ich i samaja vialikaja tapola z akružnaściu stvała ŭ 4 mietry.
«U hetaha dreva jość suchija haliny, jakija ŭjaŭlajuć niebiaśpieku i jakija nieabchodna śpiłavać jak maha chutčej, — patłumačyŭ Korzun. — Bolš za toje, na kronie dreva lažać suchija haliny, jakija raniej adłamalisia. Jany lažać tam užo nie pieršy hod i mohuć abrynucca ŭ luby momant. Hetyja haliny, darečy, pakazvajuć, jak administracyja parka kłapocicca pra drevy.
Da taho ž daśledvańnie pravodziłasia ŭzimku, što pamyłka. Bo heta treba rabić u pieryjad viehietacyi, uviesnu».
Paśla vystupu Korzuna na Chasanavu i Vasina abrynułasia cełaja chvala niezadavolenaści.
Vasin daŭ zadni chod i paviedamiŭ, što rašeńnie sumiesnaj kamisii «Zielenduda» i Bataničnaha sada jašče nie jość padstavaj dla znosu dreŭ, a tolki dla vyrašeńnia ich dalejšaha losu. Abjavu pra źniščeńnie drevaŭ 3 sakavika Vasin nazvaŭ «pamyłkaju supracoŭnikaŭ».
«Ciapier, kali ŭ nas źjavilisia novyja fakty, my arhanizujem novuju kamisiju z pradstaŭnikami arhanizacyi i suracoŭnikami Instytuta ekśpierymientalnaj bataniki. A śsiačom drevy, jakija paznačany dla znosu i ŭ našym dakładzie, i ŭ inšym dakładzie», — skazaŭ jon.
Adnak paśla ludzi nie razyšlisia, a razam z Chasanavaj i Vasinym «vyjšli ŭ pole» pahladzieć na sapraŭdny stan drevaŭ.
Ludziej pryviali da ivaŭ la vieładarožki na nabieražnaj Śvisłačy. Chasanava dakazvała, što drevy, jakija jany bačać, zusim nie žyćciazdolnyja i lepš budzie ich źnieści, choć ludzi nastrojeny kateharyčna suprać bijołaha i navat niecenzurna vykazvalisia ŭ jaje adras.
U spravu pajšoŭ navat admysłovy bur, jakim uziali probu draŭniny — amal całkam jana była truchlavaja.
Korzun dapuściŭ, što patrebna źnieści bolš za try drevy. Jon patłumačyŭ, što jon razam z supracoŭnikami Instytuta ekśpieremientalnaj bataniki nie zmahli ahladzieć usie drevy — niekatoryja banalna nie znajšli, bo ŭ dakładzie «Zielenbuda» niama kaardynataŭ kožnaha z 28 dreŭ.
Adnak potym Korzun prapanavaŭ prajści da toj samaj 4-mietrovaj tapoli, dreva, jakoje vyznačana pad znos administracyjaj parka, ale kateharyčna zabaranili źniščać členy kamisii IEB.
Čamuści iści da hetaha dreva Chasanava kateharyčna admoviłasia. Pa darozie da dreva Korzun vykazaŭ mierkavańnie, što «Zielenbudu» praściej źnieści drevy, čym dahladać ich:
«Znos dreva — zatratnaja apieracyja, na jakoj možna dobra zarabić. Potym možna pravodzić kampiensancyjnyja pasadki maładych dreŭcaŭ — sprava taksama niatannaja. I heta možna rabić pa kole. Tak adbyvajecca na praśpiekcie Pieramožcaŭ, jaki ja nazyvaju «dendrałahičnym Aśviencimam». Tam vysiekli ŭsie staryja drevy i pasadzili maładyja, jakija čachnuć za hod-dva. Zatym ich zamianiajuć na novyja. A dahladać drevy ciažka i nie prybytkova».
Paźniej da natoŭpa padyšoŭ Vasin, bo ludzi patrabavali administracyi.
Jon pačaŭ apraŭdvacca, što suchija haliny z krony nie mahli prybrać, bo ŭzimku da dreva nie moh padjechać śpiecaŭtamabil. Korzun u adkaz prapanavaŭ naniać pramysłovych alpinistaŭ. Vasin patłumačyŭ, što nie moža heta zrabić — «Haradskija parki» karystajucca pasłuhami tolki svaich municypalnych supracoŭnikaŭ, siarod jakich alpinistaŭ niama.
Tady Korzun skazaŭ, što jość alpinisty, jakija zrobiać pracu biaspłatna ŭ vypadku, kali sprava sa źniščeńniem drevaŭ u parku budzie pad hramadskim kantrolem. Vasin z radaściu pahadziŭsia na takuju prapanovu.
U kancy ludzi pačali patrabavać abvieścić vyniki sustrečy.
«My śsiačem try drevy, jakija padpadajuć pad znos i ŭ našym dakładzie, i ŭ dakładzie Instytuta ekśpierymientalnaj bataniki. Taksama budzie stvorana sumiesnaja kamisija, jakaja praanalizuje metazhodnaść źniščeńnia inšych dreŭ. Ab praviadzieńni nastupnaha hramadskaha abmierkavańnia budzie paviedamlena praź ŚMI i sajt arhanizacyi», — skazaŭ Vasin.
Mnohich naściarožyła, što padčas abmierkavańnia nie vioŭsia pratakoł. Vasin patłumačyŭ, što pratakoła nie budzie, ale niekalki razoŭ paabiacaŭ i navat paklaŭsia, što akramia troch drevaŭ u parku znosić ničoha pakul nie buduć.
«Mabyć śsiakuć try, a mabyć i dziesiać. Pahladzim», — prakamientavaŭ paśla sustrečy Ihar Korzun.
«Razmaŭlaŭ uvieś čas pa-biełarusku». Pavieł Sieviaryniec zapisaŭ svoj pieršy zvarot paśla vyzvaleńnia18
«Razmaŭlaŭ uvieś čas pa-biełarusku». Pavieł Sieviaryniec zapisaŭ svoj pieršy zvarot paśla vyzvaleńnia
«Heta ryzykoŭna dla Biełarusi». Zialenski zajaviŭ, što Rasija raźmiaščaje abstalavańnie dla naviadzieńnia šachiedaŭ na dachach biełaruskich šmatpaviarchovikaŭ2323
Kamientary