U Homieli pravaachoŭniki začynili adzin z najbujniejšych kłubaŭ horada
U Homieli pravaachoŭnyja orhany začynili adzin z najbujniejšych miascovych kłubaŭ — «Jeŭropa». Pa słovach adnaho z rabotnikaŭ ustanovy, heta adbyłosia jašče ŭ čaćvier, 27 sakavika, paśla vizitu niejkich siłavikoŭ.
«Pryjšli ludzi ŭ maskach i z aŭtamatami — abyšli ŭvieś kompleks, — raspaviała krynica na ŭmovach ananimnaści. — Zatym usich, chto byŭ: i piersanał, i naviedvalnikaŭ — sabrali ŭ «Cafe De Paris» (uvachodzić u skład KZC) i pierapisali źviestki z pašpartoŭ. Paśla čaho ŭsich adpuścili, akramia kiraŭnika piersanału i skazali, što kłub «začyniajecca na pravierku». Usio. Ab kankretnych pryčynach nichto ničoha nie viedaje — navat čutak niama.
U niadzielu ŭviečary na dźviarach pustoha kompleksu visieła abjava ab zakryćci pa techničnych pryčynach i vybačeńniami pierad naviedvalnikami za niazručnaści.
Na hałoŭnaj staroncy sajta KZC apošniaja navina datavanaja 10 studzienia i zaprašaje na biaspłatnaje navučańnie ŭ škołu krupje junakoŭ i dziaŭčat va ŭzroście ad 18 da 24 hadoŭ. Pry hetym ni adzin z ukazanych na sajcie kantaktnych telefonaŭ nie adkazvaje.
Jašče ŭ pačatku minułaha tydnia ŭstanova funkcyjanavała ŭ zvyčajnym režymie, a ŭ kancy pazaminułaha praviało kłubny konkurs pryhažości «Mis Jeŭropa». Siarod členaŭ žury prysutničaŭ i dyrektar KZC Mikałaj Piatroŭski.
Pa źviestkach ź niekalkich nieaficyjnych krynic, siłavikami, što zakryli «Jeŭropu», byli supracoŭniki dziaržbiaśpieki.
Mahčyma, pryčyna ich cikavaści — niejkija finansavyja pravaparušeńni ŭ dziejnaści KZC. Nibyta padčas naviedvańnia kłuba ci to z słužbovych kampjutaraŭ, ci to z hulniavych aŭtamataŭ kanfiskoŭvalisia nośbity infarmacyi.
U CIHS KDB Biełarusi ad kamientaroŭ z hetaj nahody pakul ustrymlivajucca, zapeŭnivajučy, što kali pastupić aficyjnaja infarmacyja, jaje paviedamiać.
Ciapier čytajuć
Halina Dzierbyš kazała prakuroru: «Jak pamru, budu da ŭsich vas nočču prychodzić». I žyćcio ŭžo dahnała jaje sudździu i śviedak. Historyja piensijanierki, jakoj dali 20 hadoŭ kałonii1616
Kamientary