Prysud Źmitru Daškieviču: 60 bazavych vieličyniaŭ štrafu
U zalu sudu puścili tolki advakata i pradstaŭnika misii ABSE. Navat baćka Źmitra zastaŭsia na vulicy: "Abvinavaŭčy prysud nia robić honaru ŭładam, ale heta lepš, čym siadzieć šeść miesiacaŭ".
12:52. Jak zajaviŭ u kamentary "NN" baćka palitviaźnia Viačasłaŭ Daškievič: "Abvinavaŭčy prysud nia robić honaru ŭładam, ale heta lepš, čym siadzieć šeść miesiacaŭ. Kab spłacić štraf, nam z žonkaj daviałosia b pradać usiu haspadarku. Ale ja pierakanany, što vypłacić štraf dapamohuć siabry i znajomyja Źmitra, jakich u jaho vielmi šmat".
Viačasłaŭ Daškievič taksama skazaŭ, što maci Źmitra pakul nia viedaje pra prysud, bo pakul da jaje nie datelefanavalisia.
U svaim apošnim Źmicier jašče raz paćvierdziŭ, što nie źbirajecca śviedčyć suprać siabie i svaich siabroŭ.
Miž inšym, Źmicier Daškievič pavinien vyjści na vollu za dziesiać dzion da Dnia voli, 15 sakavika.
12.19. Sudovy praces akazaŭsia nadziva chutkim. Sudździa Kaškina pryznała Źmitra vinavatym u parušeńni artykułu 402 KK, pakaraŭšy jaho 60 bazavymi vieličyniami štrafami (1 miljon 860 tysiač rubloŭ).
Padčas słuchańniaŭ byŭ zasłuchany adzin śviedka, jaki i dapytaŭ Źmitra.
11.27. Na praces puścili taksama pradstaŭnika misii ABSE, jaki pierad hetym nakiravaŭ list z prośbaj prysutnaści na sudzie ministru ŭnutranych spravaŭ Uładzimieru Navumavu.
Pad ścienami turmy ciapier znachodziacca kala 25 čałaviek. Jany apranuli majki z partretam Źmitra Daškieviča. Častka ludziej stała ŭ koła i molicca.
Žurnalist tydniovika "Biełorusy i rynok" Hienadź Barbaryč nakiravaŭ zapyt načalniku škłoŭskaj kalonii Valerju Iljušenku, kab žurnalistaŭ puścili na praces. Ciapier hety zapyt razhladaje Departament pa vykanańniu pakarańniaŭ. Jość šaniec, što pradstaŭnikoŭ ŚMI puściać chacia b na ahałošvańnie prysudu.
10:09. Sud nad Źmitrom Daškievičam pačaŭsia. U bydynak kalonii puścili tolki advakata Alaksandra Halijeva. Admovili ŭ prysutnaści na pracesie navat baćku Źmitra Viačasłavu Daškieviču, jaki znoŭ pryjechaŭ u Škłoŭ sa Starych Daroh.
Pad dźviaryma turmy ciapier znachodziacca dvaccaci čałaviek. Bolšaść ź ich składajuć maładafrontaŭcy i žurnalisty. Pryjechaŭ pradstaŭnik misii ABSE, jaki damahajecca prysutnaści na sudzie. Usich prysutnych zdymajuć na kameru ludzi ŭ cyvilnym.
***
U Škłovie a 10-j ranicy pačaŭsia sud nad maładafrontaŭcam.
Sud nad Źmitrom musiŭ raspačacca 6 listapada, ale byŭ pieraniesieny z farmalnaj pryčyny. Pavodle zakanadaŭstva abvinavačany musić atrymać paviedamleńnie pra pryznačeńnie sudovaha pracesu nie paźniej jak za 5 sutak da jaho pačatku. Źmicier daviedaŭsia pra heta 1 listapada i na ranicu 6 listapada poŭnych piać sutak nie minuła.
Źmicier Daškievič abvinavačvajecca pavodle art. 402 KK «Admova albo ŭchileńnie śviedki ad davańnia pakazańniaŭ». Letam Źmicier kateharyčna admoviŭsia davać pakazańni suprać svaich siabroŭ z «Maładoha frontu», u pryvatnaści suprać Ivana Šyły. Pavodle hetaha artykułu Daškievič moža atrymać jašče paŭhodu turmy.
Ciapier Źmicier Daškievič adbyvaje paŭtarahadovaje źniavoleńnie ŭ škłoŭskaj papraŭčaj kalonii. Jaho asudzili 1 listapada 2006 h. za ŭdzieł u niezarehistravanaj arhanizacyi. Na volu chłopiec musiŭ vyjści 15 sakavika.
Ciapier čytajuć
«Ja byŭ suprać, kab mianie mianiali na 20 rasijskich vajskoŭcaŭ. Nie zmoh by hladzieć u vočy ludziam, syny jakich siadziać»: pieršaje intervju eks-mera Chiersona
Kamientary