Padatkovym orhanam budzie dadziena prava atrymlivać źviestki ab kupli zamiežnaj valuty nasielnictvam.
Pavodle infarmacyi BiełaPAN, adpaviednuju normu płanujecca ŭnieści ŭ Padatkovy kodeks.
Da hetaha času źviestki pra kuplu zamiežnaj valuty adnosilisia da bankaŭskaj tajamnicy fizičnych asob.
Jak rastłumačyli śpiecyjalisty, zapłanavanyja źmieny ŭ zakanadaŭstva źviazanyja ź nieabchodnaściu ŭstanaŭleńnia asob,
čyje faktyčnyja vydatki pieravyšajuć aficyjnyja dachody.
U dziaržorhanach, u pryvatnaści, adznačajuć, što jość vypadki, kali ludzi piensijnaha ŭzrostu kuplajuć bujnyja sumy zamiežnaj valuty.
Pradstaŭniki finansavaha siektara źviazvajuć fakty nabyćcia nasielnictvam bujnych sum zamiežnaj valuty ź dziejnaściu kamiercyjnych arhanizacyj i pradprymalnikaŭ, jakija vykarystoŭvajuć fizičnych asob u jakaści pasiarednikaŭ.
Jak patłumačyli bankiry, u ciapierašni čas kamiercyjnyja arhanizacyi mohuć ažyćciaŭlać kuplu zamiežnaj valuty na biržy pry najaŭnaści adpaviednych abaviazacielstvaŭ. Adnaho žadańnia dla kupli zamiežnaj valuty na biržy niedastatkova, kanstatujuć bankiry.
Na dumku ekśpiertaŭ, hetaja akaličnaść moža vyklikać imknieńnie ŭ niekatorych kamiercyjnych struktur nabyvać valutu na najaŭnym rynku, vykarystoŭvajučy fizičnych asob.
Analityki finansavaha rynku taksama adznačajuć, što ŭ takich schiemach mohuć być zacikaŭleny i pradprymalniki, jakija nie chočuć vypłačvać padatki.
«Havorka moža iści ab indyvidualnych pradprymalnikach, jakija atrymlivajuć rublovuju vyručku i, kab paźbiehnuć vypłaty padatkaŭ, jany dla zakupki impartnaha tavara kanviertujuć praz pasiarednikaŭ najaŭnyja rubli ŭ valutu», — kaža finansavy analityk aficyjnaha partniora «Alpary» ŭ Minsku Vadzim Iosub.
U svaju čarhu, pradstaŭniki bankaŭskaha siektara miarkujuć, što padatkovy kantrol za kuplaj zamiežnaj valuty moža być taksama nakiravany suprać asob, jakija chavajuć «cieniavyja» dachody.
Kamientary