Praz 13 hadoŭ raskryta i nakiravana ŭ sud kryminalnaja sprava pa abvinavačańni 34-hadovaha hramadzianina ŭ zhvałtavańni, naŭmysnym zabojstvie, učynienym z asablivaj žorstkaściu, spałučanym sa zhvałtavańniem.
Jak paviedamiła staršy pamočnik prakurora Homielskaj vobłaści Nadzieja Samusieva, złačynstva było ŭčyniena na adnoj z vulic Homiela ŭ žniŭni 2001 hoda.
Abvinavačvany, raniej nieadnarazova sudzimy, u tym liku za zhvałtavańnie, u poźni čas sustreŭ u dvary adnaho z žyłych damoŭ 18-hadovuju dziaŭčynu, z metaj zhvałtavańnia napaŭ na jaje, pieraadolvajučy supraciŭleńnie, nanios paciarpiełaj mnostva ŭdaraŭ, źbiŭšy jaje z noh. Paśla zhvałtavańnia złačynca zadušyŭ achviaru. Zabraŭšy załaty łancužok, siarebranyja zavušnicy, damskuju sumačku z hrašami i asabistymi rečami abvinavačvany ź miesca złačynstva źbieh.
«Złačynstva nie zastałosia nieraskrytym. Abvinavačvany vykryty sabranymi dokazami, aryštavany i paŭstanie pierad sudom. Za ŭčynieńnie nazvanych złačynstvaŭ mužčynie moža być pryznačana pakarańnie ŭ vyhladzie pazbaŭleńnia voli na termin ad 8 da 25 hadoŭ, pažyćciovaje źniavoleńnie abo śmiarotnaja kara. Vinavataść i pakarańnie abvinavačvanamu buduć vyznačany sudom», — skazała staršy pamočnik prakurora.
Kryminalnaja sprava rasśledavana śledčym upraŭleńniem USK Biełarusi pa Homielskaj vobłaści.
Kamientary