U Klimavičach 25 lipienia supracoŭniki milicyi zatrymali byłuju pryjomnuju maci siemiarych dziaciej Irynu Mocnuju.
Jak paviedamiŭ pradstaŭnik hrupy pryjomnych baćkoŭ u niezaležnym prafsajuzie REP Leanid Skarabahaty, zatrymańnie adbyłosia siońnia ranicaj.
«Iryna Mocnaja sa svaim synam vyjechali siońnia z Klimavičaŭ u Minsk dla padačy dakumientaŭ u navučalnuju ŭstanovu. Niepadalok ad rajonnaha centra ich spynili supracoŭniki DAI, jakija skazali im viartacca nazad», — raskazaŭ Skarabahaty.
Pavodle jaho słoŭ, zatym u dom Mocnych pryjšli supracoŭniki Klimavickaha RAUS, jakija zatrymali i adviali Irynu Mocnuju i jaje starejšaha syna ŭ rajadździeł milicyi. Małodšyja dzieci raźbiehlisia.
Ciapier usie dzieci znojdzieny i ich viazuć u Mahiloŭ u dziciačy dom, paviedamili ŭ adździele adukacyi, sportu i turyzmu Klimavickaha rajvykankama.
Bolš za miesiac tamu ŭ Minsku byŭ znojdzieny paviešanym pryjomny baćka Viktar Mocny. Potym rajonnyja ŭłady pazbavili Irynu Mocnuju prava apieki nad dziećmi i zvolnili z pasady pryjomnaj maci. Adnak jana nie zhadziłasia z takim rašeńniem, źviartałasia ŭ roznyja instancyi z prośbaj dazvolić dalej vychoŭvać dziaciej. Raniej pryjomnaja siamja Mocnych ličyłasia adnoj ź lepšych u Klimavickim rajonie.
Iryna Mocnaja pakul nie adkazvaje na telefonnyja zvanki. U rajonnaj milicyi admovilisia ad kamientaraŭ, a ŭ adździaleńni infarmacyi i hramadskich suviaziej Mahiloŭskaha abłvykankama paviedamili, što Mocnaja była zatrymana, bo, nie źjaŭlajučysia pryjomnaj maci, sprabavała rasparadžacca losam jaje byłych pryjomnych dziaciej. Ciapier viadziecca razbor.
Ciapier čytajuć
Ciahnik Pinsk—Minsk spyniŭsia pad Dziaržynskam biez aciapleńnia. Paśla prybyćcia ŭ stalicu pasažyraŭ razabrali ludzi z sacsietak i raźvieźli pa chatach4
Kamientary