У Клімавічах 25 ліпеня супрацоўнікі міліцыі затрымалі былую прыёмную маці семярых дзяцей Ірыну Моцную.
Як паведаміў прадстаўнік групы прыёмных бацькоў у незалежным прафсаюзе РЭП Леанід Скарабагаты, затрыманне адбылося сёння раніцай.
«Ірына Моцная са сваім сынам выехалі сёння з Клімавічаў у Мінск для падачы дакументаў у навучальную ўстанову. Непадалёк ад раённага цэнтра іх спынілі супрацоўнікі ДАІ, якія сказалі ім вяртацца назад», — расказаў Скарабагаты.
Паводле яго слоў, затым у дом Моцных прыйшлі супрацоўнікі Клімавіцкага РАУС, якія затрымалі і адвялі Ірыну Моцную і яе старэйшага сына ў райаддзел міліцыі. Малодшыя дзеці разбегліся.
Цяпер усе дзеці знойдзены і іх вязуць у Магілёў у дзіцячы дом, паведамілі ў аддзеле адукацыі, спорту і турызму Клімавіцкага райвыканкама.
Больш за месяц таму ў Мінску быў знойдзены павешаным прыёмны бацька Віктар Моцны. Потым раённыя ўлады пазбавілі Ірыну Моцную права апекі над дзецьмі і звольнілі з пасады прыёмнай маці. Аднак яна не згадзілася з такім рашэннем, звярталася ў розныя інстанцыі з просьбай дазволіць далей выхоўваць дзяцей. Раней прыёмная сям'я Моцных лічылася адной з лепшых у Клімавіцкім раёне.
Ірына Моцная пакуль не адказвае на тэлефонныя званкі. У раённай міліцыі адмовіліся ад каментараў, а ў аддзяленні інфармацыі і грамадскіх сувязей Магілёўскага аблвыканкама паведамілі, што Моцная была затрымана, бо, не з'яўляючыся прыёмнай маці, спрабавала распараджацца лёсам яе былых прыёмных дзяцей. Цяпер вядзецца разбор.
Цяпер чытаюць
У Гомелі закрылі забягалаўку прадпрымальніка-лукашыста і знішчылі яго плакат са Сталіным5
Каментары