Biełaruś płanuje vydavać biaspłatnyja vizy turystam u čas bujnych spartyŭnych mierapryjemstvaŭ. Ab hetym zajaviŭ siońnia žurnalistam dyrektar departamienta pa turyźmie Ministerstva sportu i turyzmu Vadzim Karmazin.
U hetym hodzie turysty mahli naviedać Biełaruś u čas čempijanatu śvietu pa chakiei bieź vizy, dla pierasiačeńnia hranicy patrebny byŭ bilet na matč čempijanatu.
«Heta taktyka poŭnaściu siabie apraŭdała. Płanujecca, što ŭ čas spartyŭnych spabornictvaŭ mižnarodnaha ŭzroŭniu pa chadajnictvie Ministerstva sportu i turyzmu i Nacyjanalnaha alimpijskaha kamiteta dla balelščykaŭ buduć vydavacca biaspłatnyja vizy. Pry hetym razmova idzie nie pra biaźvizavy režym, a mienavita pra biaspłatnyja vizy. Hety miechanizm budzie ŭzhodnieny ź Ministerstvam zamiežnych spraŭ», — skazaŭ Vadzim Karmazin.
Pieralik spartyŭnych mierapryjemstvaŭ, na jakija buduć vydavać biaspłatnyja vizy, raspracoŭvajuć Ministerstva sportu i turyzmu i Nacyjanalny alimpijski kamitet.
Što datyčycca inšych bujnych mierapryjemstvaŭ, jakija cikavyja dla turystaŭ, to heta pytańnie budzie razhladacca ŭ indyvidualnym paradku. Vadzim Karmazin nie vyklučyŭ, što buduć vybrany niekalki bujnych fiestyvalaŭ, na jakija taksama buduć vydavacca biaspłatnyja vizy.
«Spadziajusia, što heta tema atrymaje raźvićcio ŭ dalejšym i dastupnaść krainy ŭ turystyčnym płanie budzie pavyšacca», — dadaŭ jon. Vydača biaspłatnych viz daść mahčymaść pryciahnuć bolš turystaŭ z susiednich krain. «Časta rašeńnie ab pajezdcy prymajecca na praciahu 4-5 dzion, tamu pytańnie viz maje pieršaradnaje značeńnie», — skazaŭ Vadzim Karmazin.
Ciapier čytajuć
Mižnarodny kryminalny sud pačaŭ rasśledavańnie złačynstvaŭ, ździejśnienych režymam Łukašenki13
Kamientary