Vialikich nadziej na budučyniu biełaruska-jeŭrapiejskich adnosin Brusel nie ŭskładaje.
Adnosiny Biełarusi i ES pieražyvajuć etap, padobny da «adlihi» 2008—2010 hadoŭ, adnak ciapier Brusiel nie ŭskładaje vialikich spadziavańniaŭ na biełaruska-jeŭrapiejskaje supracoŭnictva.
Takoje mierkavańnie ŭ intervju «Niamieckaj chvali» vykazaŭ palitołah Juryj Čavusaŭ.
Pavodle jaho słoŭ, elektaralny cykł pierad prezidenckimi vybarami ŭ Biełarusi tradycyjna supravadžajecca niekatorym paciapleńniem u adnosinach z Zachadam. Na hety raz čarhovaja «adližnaja» faza biełaruska-jeŭrapiejskich adnosin supała z rasijska-ukrainskim kanfliktam, dadatkova padšturchnuŭšy Minsk i Brusel nasustrač adzin adnamu.
«Atrymaŭsia efiekt, padobny da efiektu vajny ŭ Hruzii ŭ 2008 hodzie, jakaja dała admašku i dla «Uschodniaha partniorstva», i dla ŭsioabdymnaha dyjałohu pamiž aficyjnym Minskam i Jeŭrasajuzam. Ciapier adbyvajecca toje ž samaje, tolki, viadoma, entuzijazmu z boku Jeŭrasajuza mienš», — kaža Ju. Čavusaŭ.
Havorka idzie pra toje, što vialikich spadziavańniaŭ na budučyniu biełaruska-jeŭrapiejskich adnosin Brusel zaraz nie uskładaje, i nichto ź jeŭrapiejskich palitykaŭ nie budzie ryzykavać svajoj piersanalnaj reputacyjaj pry praviadzieńni palityki «razmarozki» adnosinaŭ ź Biełaruśsiu.
Jak ličyć Ju. Čavusaŭ, charakternaja rysa ciapierašniaj «razmarozki» zaklučajecca ŭ tym, što jana nie publičnaja - mnohaje zastajecca za kadram i abmiarkoŭvajecca kułuarna. Vidavočna, što dla Zachadu pytańnie vyzvaleńnia palitviaźniaŭ, pierš za ŭsio eks-kandydata ŭ prezidenty Mikałaja Statkieviča, zastajecca pryncypovym. Adnak dalejšyja dziejańni bakoŭ siońnia źjaŭlajucca, chutčej za ŭsio, pradmietam pieramovaŭ.
U suviazi z hetym Ju. Čavusaŭ źviarnuŭ uvahu na niadaŭni vizit u Minsk pradstaŭničaj mižviedamasnaj delehacyi z ZŠA. Viadoma, što amierykancy sustrelisia z pradstaŭnikami biełaruskaj hramadzianskaj supolnaści i zrabili dziažurnyja zajavy ab nieabchodnaści vyzvaleńnia palitviaźniaŭ, adnak pra źmiest pieramoŭ na aficyjnym uzroŭni infarmacyi praktyčna niama.
«Možna mierkavać, što vyzvaleńnie palitviaźniaŭ zastajecca asnoŭnym patrabavańniem, a pieramovy viaducca nie pra toje, jak vyzvalać palitviaźniaŭ, a pra toje, što budzie paśla», — adznačaje Ju. Čavusaŭ.
Vierahodna, anałahičnyja abmierkavańni ciapier viaducca pamiž pradstaŭnikami Minska i Brusela. Kali ŭ bližejšy čas M.Statkievič i inšyja palitviaźni buduć vyzvalenyja, heta budzie aznačać, što damoŭlenaść nakont dalejšych krokaŭ pa zbližeńni była dasiahnutaja.
Zrešty, paradak mahčymych dalejšych dziejańniaŭ z boku ES bolš-mienš jasny. Jak i ŭ 2008-2010 hadach, moža adbycca časovaje prypynieńnie dziejańnia sankcyj, praz paŭhoda — paŭtorny razhlad hetaha pytańnia, padaŭžeńnie «zamarozki» sankcyj i, mahčyma, skaračeńnie sankcyjnych śpisaŭ.
Źjaŭleńnie novych asob u kiraŭnictvie Jeŭrasajuza (Donald Tusk stanie novym staršynioj Jeŭrapiejskaha savieta, Fiederyka Mahieryni - viarchoŭnym pradstaŭnikom ES pa zamiežnaj palitycy i palitycy biaśpieki) naŭrad ci paŭpłyvaje na jeŭrapiejskuju palityku ŭ dačynieńni Biełarusi.
«Źmiest palityki, dumaju, kardynalna nie źmienicca. Dla Jeŭrasajuza pa-raniejšamu pryjarytetam buduć zastavacca pytańni pravoŭ čałavieka, pytańni, jakija ŭvachodziać u źmiest «Uschodniaha partniorstva» i taho, što nazyvajecca ŭschodniaj palitykaj dobrasusiedstva», — adznačyŭ Ju.Čavusaŭ.
Miž tym navat ciapierašniaje paciapleńnie adnosinaŭ ź Jeŭropaj nie padšturchnie biełaruskija ŭłady da ŭdziełu ŭ prahramie «Reforum».
«Reforum» - heta kampanient taho, što ES nazyvaŭ «Jeŭrapiejskim dyjałoham ab madernizacyi». I pakolki raspracoŭka źmiestu hetaha prajekta viałasia biez udziełu biełaruskaj dziaržavy, na dziaržaŭnym uzroŭni ŭdzielničać u hetym prajekcie Biełaruś nie budzie «, — upeŭnieny Ju.Čavusaŭ.
Ź inšaha boku, nie vyklučana, što biełaruskija ŭłady mohuć uziać udzieł u čymści, što ŭ budučyni pryjdzie na źmienu «Reforumu».
Ciapier čytajuć
Na Šry-Łancy ŭ 37 hadoŭ pamior biełaruski kinapradziusar Andrej Matałyha2
Kamientary