Zatrymanyja lidery pradprymalnikaŭ

Siońnia ŭ Miensku zaplanavany mitynh pradprymalnikaŭ. Jany źbirajucca vykazać svajo staŭleńnie da palityki ŭładaŭ u dačynieńni da małoha biznesu.

11:20 Alaksandra Makajeva dastavili ŭ prakuraturu, dzie prapanavali padpisać papiaredžańnie ab niedapuščalnaści parušeńnia zakonu. Spadar Makajeŭ padpisać papieru admoviŭsia, jaho adpuścili. Ale praź niekatory čas znoŭ zatrymali i viazuć u milicyju Maskoŭskaha rajona stalicy.

11:10 Milicyjanty pakul nie adpuskajuć Alaksandra Cacuru. Jany tłumačać heta tym, to byccam by žonka Cacury zahadała im dastavić muža takim ža čynam, jak jaho i zabrali ‑‑ na milicejskaj mašynie.

11:00 Milicyjanty prymušali Alaksandra Cacuru napisać raśpisku, što jon dobraachvotna admaŭlajecca viarnucca ŭ Salihorsk na milicejskaj mašynie, na jakoj byŭ dastaŭleny ŭ Miensk. Spadar Cacura napisaŭ, što viartacca ŭ Salihorsk admaŭlajecca, bo heta parušaje jahonyja kanstytucyjnyja pravy.

10:50 Viciebsk. Bolš jak 50 pradprymalnikaŭ pravodziać akcyju la budynku centra zaniataści. Staršynia prafsajuzu pradprymalnikaŭ «Razam» Iryna Jaskievič paviedamiła, što ludzi patrabujuć ad miascovych čynoŭnikaŭ adkazać na pytańnie, jakija perspektyvy pracaŭładkavańnia. «Kali buduć vykananyja patrabavańni prezydenckaha ŭkazu №760, to bolš jak adna tysiača indyvidualnych pradprymalnikaŭ u Viciebsku apynucca biespracoŭnymi, — zajaviła I.Jaskievič.

Nichto z čynoŭnikaŭ pakul nie pryjšoŭ na sustreču z udzielnikami akcyi.

10:50 U Mienskuju abłasnuju prakuraturu dastavili Alaksandra Cacuru z Salihorsku.

10:35 Da Mienskaj abłasnoj prakuratury padjechali dva supracoŭniki Kryminalnaha vyšuku Maskoŭskaha RAUS horada Mienska Ihar Dziačuk i Dźmitry Smut. Jany paviedamili, što im zahadana dastavić adnaho ź lideraŭ pradprymalnikaŭ Alaksandra Makajeva ŭ milicyju Maskoŭskaha rajona.

10:30 Paŭtorna zatrymany Mikałaj Pachabaŭ, jaki vioz mehafony dla praviadzieńnia mitynhu. Jaho dastavili ŭ Savieckaje RAUS.

10:25 Babrujsk. U hetyja chviliny pradprymalniki źbirajucca la budynku miascovaha centra zaniataści nasielnictva, što na skryžavańni vulicaŭ imia Hohala i imia Ŭryckaha. «Nas tut ŭžo kala 40 čałaviek. My patrabujem ad ułady harantyjaŭ svajho pracaŭładkavańnia, pakolki prezydencki ŭkaz numar 760 likviduje našy pracoŭnyja miescy na rynkach horadu», — paviedamiła pradprymalnica Taciana Łazarava.

10:00 Staršynia arhkamitetu ŭ stvareńni hramadzkaha abjadnańnia «Za svabodnaje raźvićcio pradprymalnictva» Viktar Harbačoŭ paviedamiŭ «Svabodzie», što milicyja siońnia zatrymała arhanizataraŭ mitynhu pradprymalnikaŭ — Alaksandara Taŭstyku, Mikałaja Pachabava. Pavodle V.Harbačova, zatrymanyja dastaŭlajucca pad kanvojem u Mienskuju abłasnuju prakuraturu, dzie z ich patrabujuć piśmovyja tłumačeńni i abaviazacielstvy nie ŭdzielničać u akcyi pratestu.

9:30 Adzin z zajaŭnikaŭ mitynhu pradprymalnikaŭ Viktar Kryval u prymusovym paradku byŭ dastaŭleny ŭ Mienskuju abłasnuju prakuraturu. Jaho zabrali z domu, ź vioski Chatlany a 7‑aj ranicy. U prakuratury spadaru Kryvalu prapanavali padpisacca pad papiaredžańniem ab niedapuščalnaści vychodzić na Kastryčničkuju płošču, bo mitynh dazvoleny na płoščy Banhałor. Padpisać papiaredžańnie Viktar Kryval admoviŭsia. Jaho adpuścili.

9:15 U Salihorsku z ułasnaj kvatery zabrali adnaho ź lideraŭ pradprymalnikaŭ Alaksandra Cacuru. Pavodle słovaŭ samoha spadara Cacury, jaho viazuć u Mienskuju abłasnuju prakuraturu. Raniej da pradprymalnika prychodzili supracoŭniki salihorskaj prakuratury i papiaredžvali, kab jon nia ŭdzielničaŭ u mitynhu.

8:30 Supracoŭniki kryminalnaha vyšuku Maskoŭskaha rajonu zatrymali adnaho ź lidera pradprymalnickaha ruchu Alaksandra Makajeva. Na minułym tydni A.Makajeva zatrymali supracoŭniki Leninskaha RUUS. Na jaho skłali pratakoł za toje, što jon nibyta niecenzurna łajaŭsia. A.Makajevu ŭručyli pozvu ŭ milicyju na 12 śniežnia.

Siońnia ŭ Miensku apoŭdni na Kastryčnickaj płoščy zaplanavany mitynh pradprymalnikaŭ. Jany źbirajucca vykazać svajo staŭleńnie da palityki ŭładaŭ u dačynieńni da małoha biznesu.

Radyjo Svaboda

• 0
• 0
• 0
• 0
• 0
• 0
• 0
• 0