Maštabnyja šeście i mitynh pad devizam «My adzinyja» prachodzić siońnia ŭ centry Maskvy.
Demanstracyja pačałasia ad Puškinskaj płoščy, u rajonie Teatralnaha prajezdu budzie pastaŭlena scena i tam adbudziecca mitynh, jaki zavieršycca ŭ 17:00.
U akcyi biaruć udzieł kala 50 tysiač čałaviek, u tym liku pradstaŭniki roznych palityčnych partyj, prapucinskaha Ahulnarasijskaha narodnaha frontu, viadomyja hramadskija dziejačy, dziejačy kultury, navuki, mastactva, lehiendarnyja spartoŭcyy, paviedamlaje TASS.
Pryjšli na šeście i palityki ad usich dumskich palityčnych partyj. Śpiavać budzie Kabzon.
Ličycca, što 4 listapada 1612 h. bajcy narodnaha apałčeńnia pad pravadyrstvam Kuźmy Minina i Dźmitryja Pažarskaha šturmam uziali Kitaj-horad, a harnizon Rečy Paspalitaj spačatku adstupiŭ u Kreml, a zatym padpisaŭ kapitulacyju. 4 listapada z 2005 hoda było abvieščana dziaržaŭnym śviatam.
4 listapada ŭ Maskvie prachodziać taksama dva paralelnyja šeści.
U rajonie Lublina na paŭdniovym uschodzie Maskvy prachodzić tak zvany «Ruski marš». Jaho pravodziać antypucinskija nacyjanalisty, jakija asudžajuć uvarvańnie Rasii va Ukrainu.
Pavodle acenak žurnalistaŭ, hety «Ruski marš» sabraŭ kala 2000 udzielnikaŭ.
U Lublinie nacyjanalisty vyjšli na marš pad čatyrma hałoŭnymi łozunhami: «Ruskaje adzinstva!», «Svabodu i spraviadlivaść dla ruskich ludziej!», «Suprać čekisckaha teroru! Svabodu źniavolenym nacyjanalistam!» i «Svabodu Białovu! Ułada ruskamu narodu!».
Apošni łozunh pryśviečany adnamu ź lidaraŭ «Ruskich» Alaksandru Białovu (Potkinu), niadaŭna abvinavačanaha ŭ niezakonnaj lehalizacyi hrašovych srodkaŭ.
Inšaje šeście nacyjanalistaŭ zajaŭlena ŭ rajonie Ščukina na paŭnočnym zachadzie Maskvy. Pa słovach jaho arhanizataraŭ, heta budzie akcyja «u padtrymku Navarosii».
U adroźnieńnie ad akcyi ŭ Lublinie, šeście nacyjanalistaŭ u rajonie Ščukina, arhanizavanaje staršynioj partyi «Vialikaja Rasija» Andrejem Savieljevym, całkam pryśviečanaje tak zvanaj «Navarosii».
Čakajecca, što na mitynhu vystupiać pradstaŭniki «apałčeńnia Danbasa».
Pa słovach arhanizatara maršu Andreja Savieljeva, «statusnych asobaŭ» z samaabvieščanych DNR i ŁNR na maršy nie budzie: «Jany čamuści palubili rasijskaje načalstva i, napeŭna, pojduć ź im na Ćviarskuju».
Ciapier čytajuć
«Mama, davaj napišam zajavu ŭ milicyju, jon mianie ŭžo dastaŭ». Maci školnika z Bresta, jaki skončyŭ žyćcio samahubstvam, raskazała pra ckavańnie syna8
Kamientary