Trusaŭ: Navumčyk błytaje bob z harocham

Šanoŭny sp. Navumčyk vyrašyŭ stać adzinym i niepaŭtornym historykam BNF i baluča reahuje («NN» №7) na vykazvańni tych, chto maje svajo asabistaje bačańnie na tyja padziei, jakija i pryviali Biełaruś da niezaležnaści.

Darečy, mienavita Navumčyk pakrysie stvaraje roznyja mify pra dziejnaść BNF, majučy ŭ Prazie značna bolšyja mahčymaści, čym tyja siabry arhkamiteta BNF, jakija žyvuć i pracujuć uvieś čas na Biełarusi. Tamu ja mušu čarhovy raz zapiarečyć našamu pražskamu siabru.

Pasiadžeńni Demkłuba ŭ VS BSSR u 1990 hodzie, asabliva ŭ krasaviku—červieni adbyvalisia rehularna, a «nie dobra, kali dva razy», jak piša Siarhiej Navumčyk. Mienavita z Demkłuba pryjšła ŭ apazicyju BNF Halina Siamdzianava i niekatoryja inšyja deputaty.

A ciapier pra rolu kamunistaŭ. U arhkamitecie BNF, stvoranym 19 kastryčnika 1988 h., kamunistaŭ było nie mienš za pałovu. Toje ž možna skazać i pra apazicyju na płatformie BNF u 1990 hodzie. Darečy, kamunistam byŭ i sam Siarhiej Navumčyk, a jaho baćka — były sakratar Viciebskaha abkama KPB, vielmi prystojny i adukavany čałaviek, biełaruski patryjot Iosif (Jazep) Navumčyk.

Cikava, što ŭ pryniaćci histaryčnaj simvoliki Biełarusi ŭ jakaści dziaržaŭnaj niemałuju rolu adyhraŭ i Viktar Šejman, jaki potym razam z Valancinam Hołubievym byŭ maim namieśnikam u kamisii pa zabieśpiačeńni adzinaj palityki vykarystańnia dziaržaŭnych simvałaŭ Respubliki Biełaruś pry Prezidyumie Viarchoŭnaha Savieta Respubliki Biełaruś.

Nahadaju sp.Navumčyku, što kanstytucyjnaja bolšaść u Viarchoŭnym Saviecie składała značna bolej, čym 200 hałasoŭ. I biez hetych ludziej niezaležnaj Biełarusi nie było b. I ja vielmi ŭdziačny ŭsim tym, chto padtrymaŭ prapanovy BNF u žniŭni, vieraśni i śniežni 1991 hoda. Ich imiony pavinny viedać usie hramadzianie našaj krainy.

Pryviadu niekalki prykładaŭ. Kali apazicyja BNF prapanavała źmianić nazvu Minsk na Miensk, nas padtrymali 152 čałavieki (kvorum dla pryniaćcia stanoŭčaha rašeńnia byŭ 174 hałasy, a kolkaść apazicyi BNF składała kala 30 čałaviek).

U 1994 hodzie biełaruskaja mova nabyła status adzinaj dziaržaŭnaj movy ŭ krainie dziakujučy padtrymcy niefarmalnaha lidara vieteranskaj arhanizacyi ŭ Viarchoŭnym Saviecie hienierała Hieca, čałavieka sumlennaha, ale vialikaha kansiervatara.

Inšaja sprava, što ŭ 1992 i asabliva ŭ 1994 hadach histaryčnyja i žyćciovyja šlachi hetych ludziej kardynalna razyšlisia. Ale heta ŭžo zusim inšaja historyja, spadar Navumčyk.

• 0
• 0
• 0
• 0
• 0
• 0
• 0
• 0