Udzielnik prezidenckaj kampanii 2010 hoda Siarhiej Ryžoŭ asudžany ŭ Viciebsku na 6,5 hadoŭ kałonii
U Viciebsku na šeść z pałovaj hadoŭ kałonii strohaha režymu asudžany ŭdzielnik prezidenckaj kampanii 2010 hoda Siarhiej Ryžoŭ.
Ryžova abvinavačvali ŭ chulihanstvie padčas znachodžańnia ŭ vyćviareźniku. Jaho sudzili za dziejańni sieksualnaha charaktaru ŭ dačynieńni da mužčyny biez peŭnaha miesca žycharstva. Hałoŭnym dokazam suprać Siarhieja Ryžova pravaachoŭniki nazyvali zdymki videakamier, ustanoŭlenych u vyćviareźniku. Sud prachodziŭ u zakrytym režymie.
Pavodle infarmacyi sajta freeregion.info, prysud byŭ ab`iaŭleny 2 krasavika ŭ sudzie Pieršamajskaha rajona Viciebska. «Prakuror prasiŭ 7 hadoŭ pazbaŭleńnia voli. Prysudzili pa art. 167 č. 1 — 5 hadoŭ, pa art. 339 č. 1 — 2 hady, šlacham častkovaha składańnia naličyli ahulny termin — šeść z pałovaj hadoŭ pazbaŭleńnia voli z adbyvańniem pakarańnia ŭ papraŭčaj kałonii va ŭmovach strohaha režymu, a taksama na karyść adnaho z paciarpiełych kampiensacyju maralnaha ŭronu 15 młn, plus kampiensacyja sudovych raschodaŭ», — havorycca na sajcie.
Siarhiej Ryžoŭ byŭ zatrymany 23 studzienia ŭ Viciebsku. Za niekalki dzion da hetaha jon viarnuŭsia z Rasii, dzie prabyŭ bolš jak hod. Varta zaznačyć, što jaho zatrymańnie adbyłosia na nastupny dzień paśla taho, jak jon zajaviŭ ab svaim namiery brać udzieł u prezidenckich vybarach 2015 hoda. 22 studzienia Ryžoŭ raskazaŭ, što ciapier stvarajecca inicyjatyŭnaja hrupa pa vyłučeńni jaho kandydatam u prezidenty.
Aprača taho, jon paviedamiŭ, što razam sa svajoj davieranaj asobaj viciebskim uračom Iharam Pastnovym nakiravaŭ Alaksandru Łukašenku list z prapanovaj nie ŭdzielničać u prezidenckaj kampanii, kab nie dapuścić raźvićcia padziej pa ŭkrainskim scenaryi. Kali Łukašenka ŭsio ž budzie bałatavacca na pasadu prezidenta, budzie arhanizavana kampanija bajkotu vybaraŭ z praviadzieńniem zabastovak, mitynhaŭ i akcyj hramadzianskaha niepadparadkavańnia, zajaviŭ Ryžoŭ.
Jon taksama raskazaŭ ab isnavańni kansiervatyŭnaj partyi «Biełaja Ruś», inicyjataram stvareńnia jakoj vystupiŭ u 2011 hodzie. «Hetaja partyja dziejničaje ŭ Biełarusi i Rasii. Jašče ŭ 2011 hodzie było ab`iaŭlena, što jana nie budzie prachodzić aficyjnuju rehistracyju, bo my nie pryznajem lehitymnaść prezidenta i nie źbirajemsia pytacca ŭ jaho dazvołu», — skazaŭ Ryžoŭ.
Na momant udziełu ŭ prezidenckaj kampanii 2010 hoda Siarhiej Ryžoŭ pracavaŭ na Viciebskim płodaaharodninnym kambinacie na pasadzie načalnika siektara źniešnieekanamičnaj dziejnaści. Inicyjatyŭnaja hrupa Ryžova nie zmahła nabrać 100 tysiač podpisaŭ, nieabchodnych dla rehistracyi jaho kandydatam u prezidenty. Nieŭzabavie paśla hetaha Ryžoŭ straciŭ pracu.
Kamientary