Fińkievič: Asablivaj radaści ad vyzvaleńnia nie adčuŭ + fota Julii Daraškievič
5 lutaha ŭ Mahiloŭskim abłasnym sudzie adbyŭsia razhlad kasacyjnaj skarhi nakont prysudu palitviaźniu Arturu Fińkieviču. Sudździa Ihar Proška pryniaŭ rašeńnie vyzvalić chłopca ź SIZA. Repartaž z Mahilova Źmitra Pankaŭca.
Samaho Artura ŭ sud nie pryvieźli. U zali pasiedžańniaŭ prysutničali Pavał Sieviaryniec, Alaksiej Kavalec, Viačasłaŭ Siŭčyk, Źmicier Daškievič, Aleś Michalevič, pradprymalnik Aleś Makajeŭ, pradstaŭniki amerykanskaha pasolstva. Ranicaj Sieviaryniec, razmaŭlajučy z karespandentam «NN», strymana vykazaŭ nadzieju, što prysud usio ž pierahledziać i vyniesuć bolš miakki.
Ale prakuror Karańkoŭ zajaviŭ, što prysud Fińkieviču całkam spraviadlivy, ale pakarańnie zanadta žorstkaje i zapatrabavaŭ źmianić mieru ŭtrymańnia na 6 miesiacaŭ «chimii». Dni, praviedzienyja ŭ turmie, iduć u paraŭnańni z «chimijaj» u praporcyi 2 da 1, tamu Fińkieviča musili vypuścić adrazu paśla zaviaršeńnia pasiedžańnia sudu.
Sudździa Ihar Proška padtrymaŭ prakurora, pryniaŭšy rašeńnie ŭ hety ž dzień vyzvalić Artura ź SIZA. Zabraŭšy sudovuju pastanovu, siabry i paplečniki palitviaźnia nakiravalisia da ścien izalatara, dzie i čakali vyzvaleńnia.
Pačakać daviałosia niekalki hadzin, pakul vyrašalisia ŭsie jurydyčnyja pytańni. Prykładna a 14:00 Artur vyjšaŭ na volu. «Mnohija dumali, što ja budu skakać ad radaści, kali vyjdu z turmy, ale asablivaha ščaścia nie adčuvaŭ. Adnošusia da hetaha spakojna. Łamacca ŭ turmie ja nie źbiraŭsia», — kaža chłopiec.
Adrazu paśla vyzvaleńnia Artur nakiravaŭsia ŭ sud, kab zabrać pašpart. Paśla adbyłasia siabroŭskaja sustreča na ofisie «Koła siabroŭ», dzie sabrałasia kala paŭsotni čałaviek.
«Pra vyzvaleńnie daviedaŭsia za hadzinu pierad tym, jak pakinuŭ bramu SIZA, pryjšła advakatka spn. Bachcina, jana mnie i paviedamiła rašeńnie sudu. Pra vychad z turmy Źmitra Daškieviča ja ŭžo viedaŭ, tamu ŭ hłybini dušy spadziavaŭsia, što adpuściać ci chacia b skarociać termin», — havoryć były palitviazień.
20 śniežnia sud Kastryčnickaha rajonu Mahilovu asudziŭ Fińkieviča na paŭtary hady turmy. Jon byŭ pryznany vinavatym u parušeńni art. 415 KK (uchileńnie ad adbyćcia pakarańnia). Jašče ŭ traŭni 2006 h. chłopiec byŭ asudžany na dva hady «chimii» za palityčnyja hrafici. U pačatku śniežnia 2007 hodu, jon pavinien byŭ vyjści na volu, ale litaralna za miesiac ź nievialikim da hetaj padziei akazaŭsia ŭ SIZA.
Voś jak raskazvaje Fińkievič pra paŭtorny aryšt:
«Ciažka ŭ maralnym planie było tolki pieršy dzień. Ja siadzieŭ u kamendatury i čakaŭ, pakul z kramy pryniasuć pialmieni. U pakoj uvajšli achoŭniki. Skazali, kab źbiraŭ rečy, bo jedziem u turmu. Praz try‑čatyry hadziny ja byŭ užo ŭ kamery. Skažam, na Vaładarcy viaźnia niekalki dzion trymajuć u «adstojniku», a tut adrazu nakiravali ŭ «chatu». U bytavym planie ŭ Mahilovie siadzieć było lepš, čym na Vaładarcy, ale režym tut byŭ bolš žorstki».
Fińkievič havoryć, što supracoŭniki KDB nieadnarazova papiaredžvali jaho pra aryšt. Chłopiec na peŭnym momancie navat źmiryŭsia z tym, što trapić za kraty.
«Papiaredžvali, što za dva‑try miesiacy da vyzvaleńnia znoŭ apynusia ŭ turmie. U mianie pastajanna šukali i čakali parušeńniaŭ. Tyja ž «chimiki», jakim dapamahaŭ pisać skarhi ci niešta jašče, pišuć na ciabie dakładnyja».
Pra śniežański sud Artur raskazaŭ tak:
«U mianie kałacilisia ruki i nohi, samaadčuvańnie było vielmi kiepskaje. Navat ničoha tołkam nia moh skazać. Milicyjanty kazali, što budzie pakarańnie ad hodu da dvuch, tamu prysud nie akazaŭsia niečakanym. Za niekalki dzion da sudu mnie namiaknuli, kali ja pryznaju svaju vinu, to niejkim čynam možna budzie dabicca bolš miakkaha prysudu. Tamu i była takaja pazycyja. Ja vielmi ŭdziačny svajoj ciapierašniaj advakatcy Hańnie Bachcinoj, jana sapraŭdny prafesijanał».
Fińkievič udziačny siabram‑maładafrontaŭcam, presie i Alaksandru Milinkieviču, jakija ŭzdymali temu jahonaha aryštu na Zachadzie, pravodzili akcyi salidarnaści, nie zabyvalisia na jaho.
«Razam z tym, razumieju, što ja, Daškievič, Aŭtuchovič prosta raźmiennyja manety ŭ handli z Zachadam», — kaža chłopiec.
Ciapier Artur Fińkievič źbirajecca zajmacca hramadzkaj dziejnaściu, a taksama praciahvać atrymlivać vyšejšuju adukacyju ŭ EHU, jon navučajecca na druhim kursie «palitalohii».
Užo viečaram u aŭtorak Artur pryjechaŭ u Miensk, dzie nia byŭ amal dva hady.
Ciapier čytajuć
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda1
«Vajna ŭsio śpiša». Biełaruskim udzielnikam hiej-prajda ŭ Vilni pahražali raspravaj ad imia biełaruskich vajaroŭ za vykarystańnie bieła-čyrvona-biełaha ściaha219219
Kamientary