Elektramantažnik Chazin abvierh Cichanoŭskaha i pachvaliŭsia, što jaho akcyja «Ultymatum» pryviała da vyzvaleńnia palitviaźniaŭ

Biełaruski apazicyjny aktyvist Rusłan Chazin zajaviŭ, što asabista nie znajomy z rasijska-izralskim miljarderam Leanidam Nieŭźlinym, čyje hrošy prapanoŭvaŭ Siarhieju Cichanoŭskamu. Videazvarot Chazina apublikavała rasijskaja «Sota», jakuju finansuje Nieŭźlin.

Nahadajem, u siaredzinie lipienia 2025 hoda małaviadomyja apazicyjnyja aktyvisty Rusłan Chazin i Viačasłaŭ Japiška prapanavali Siarhieju Cichanoŭskamu 200 tysiač jeŭra. Uzamien toj musiŭ dać finansavuju spravazdačnaść Ofisa Śviatłany Cichanoŭskaj, a taksama źviestki pra jaje asiarodździe. Cichanoŭski raskazaŭ «Našaj Nivie», što pry asabistaj sustrečy Chazin pryznaŭsia jamu: prapanavanyja hrošy nasamreč naležać Leanidu Nieŭźlinu.

Chazin patłumačyŭ «Socie», što sustreča nasamreč była, ale abmiarkoŭvali tam zusim inšaje.

Aktyvist pachvaliŭsia akcyjaj «Ultymatum» pa simvaličnaj błakiroŭcy trafiku na biełaruska-polskaj miažy 4 lipienia 2024 hoda. Ruch navat nie byŭ uskładnieny, ale śćviardžajecca, što mienavita paśla toj akcyi Alaksandr Łukašenka staŭ vypuskać palitviaźniaŭ, a prezident Polščy Andžej Duda pajechaŭ damaŭlacca ź lidaram Kitaja Si Czińpinam.

Čytajcie taksama: Aktyvisty pryjechali na polska-biełaruskuju miažu «błakavać ruch». Ale heta błakavańnie ŭmoŭnaje

Pa słovach Chazina, Cichanoŭski raskazaŭ jamu, što źbirajecca stvarać jutub-kanał i studyju dla intervju z roznymi palityčnymi lidarami, a biudžet prajekta, maŭlaŭ, składaje 300 tysiač jeŭra.

Chazin u adkaz pryznaŭsia Cichanoŭskamu, što adzinym viadomym jamu čałaviekam, jaki maje hrošy ŭ apazicyjnym asiarodździ, źjaŭlajecca toj samy Leanid Nieŭźlin, jakomu možna było b adpravić biznes-płan. Maŭlaŭ, havorka viałasia tolki tearetyčnaja.

Ale prapanavanyja 200 tysiač jeŭra nibyta byli svaje — sabranyja Chazinym, Japiškam i ich znajomymi.

«Sota» padkreśliła surjozny ŭzrovień Chazina: «Śćviardžeńnie «Našaj Nivy» ab tym, što jon zajmajecca elektramantažnymi pracami i zaraz pakutuje ad niedachopu zakazaŭ nie adpaviadaje rečaisnaści. U realnaści Chazin kiravaŭ bujnymi bryhadami — ad 20 da 120 čałaviek — na budaŭnictvie «Łachta-centra», «Zienit-Areny», Murmanskaha horna-ŭzbahačalnaha kambinata i hetak dalej, a ciapier čakaje novyja padrady».

Adnak sam Chazin błytana patłumačyŭ, što nasamreč zajmajecca mienavita elektramantažnymi pracami:

«Da hetaha času chodzić niezrazumiełaja historyja, jak ja pracavaŭ elektramantažnikam. Nu, niachaj tak budzie… Tak, ja zaraz zajmajusia elektramantažnymi pracami, u mianie nievialikaja pryvatnaja kampanija ŭ Polščy», — padsumavaŭ Chazin.

Sam Nieŭźlin u kamientary «Socie» zajaviŭ, što ni Chazina, ni Japišku nie viedaje, i hrošy nikomu nie prapanoŭvaŭ.

• 1
• 0
• 13
• 14
• 0
• 1
• 2
• 0