Astrafiziki znajšli «Uładara Piarścionkaŭ» u Cyrkuli X-1 FOTA
Niejtronnaja zorka čamuści pavodzić siabie jak čornaja dzira.
Kaśmičnaja absiervatoryja «Čandra» zafiksavała samy vialiki i jaskravy nabor kolcaŭ renthienaŭskaha recha ad mahutnaj uspyški niejtronnaj zorki, raspaviadaje NASA.
U Mlečnym Šlachu ŭ 30 tysiačach śvietłavych hod ad Ziamli znachodzicca dvajnaja zornaja sistema Cyrkul X-1. Niejtronnaja zorka sistemy paŭtara hoda tamu dała mahutnuju ŭspyšku ŭ renthienaŭskim dyjapazonie, što «razyšłasia kolcami» pa razie vakoł sistemy.
«My chacieli nazvać hetuju sistemu «Uładar piarścionkaŭ», ale jana nie maje ničoha ahulnaha z Saŭronam», — raspavioŭ suaŭtar daśledavańnia Majkł Bertan z Univiersiteta Novaha Paŭdniovaha Ŭelsa ŭ Sidnei (Aŭstralija).
Uspyška šmatrazova adlustroŭvałasia ad roznych abłokaŭ hazu i pyłu vakoł sistemy, pramiani ŭspyški dachodzili da Ziamli ź intervałam ad adnaho da troch miesiacaŭ, što stvaryła karcinu z kolcami.
Cyrkul X-1 stała samaj staroj ź viadomych dvajnoj renthienaŭskaj sistemaj — nazirańni pakazali, što jana pačała vypramieńvać čaścinki ŭ renthienaŭskim dyjapazonie kala 2,5 tysiač hod tamu (kali nie ŭličvać 30 tysiač śvietłavych hod da jaje). Što niezvyčajna, niejtronnaja zorka pavodzić siabie častkova jak čornaja dzira: jana vypramieńvaje čaścinki z chutkaściu kala 99,9% chutkaści śviatła, što typova chutčej dla džetaŭ čornaj dziry.
***
Niejtronnaja zorka — adna z kaniečnych stadyj evalucyi zorak. Centralnaja vadkaja častka składajecca ŭ asnoŭnym ź niejtronaŭ, nad joj mieścicca ćviordaja abałonka taŭščynioj u paru kiłamietraŭ z atamnych jadraŭ i elektronaŭ. Masy niejtronnych zorak paraŭnalnyja z masaj Sonca, ale dyjamietr składaje ŭsiaho 10-20 km. Miarkujecca, što niejtronnyja zorki źjaŭlajucca paśla vybuchaŭ zvyšnovych. Niekatoryja zvyšnovyja dajuć vynikam nie niejtronnyja zorki, a praciahvajuć ściskacca da čornych dzir.
Ciapier čytajuć
Zakinutuju siadzibu Bahdanovičaŭ pierarobiać u bucikovy hatel FOTY7
Kamientary