Piać faktaŭ pra byłoha dziaržsakratara Rady biaśpieki i jaho dziŭnuju adstaŭku
24 červienia Alaksandr Łukašenka zvolniŭ dziaržsakratara Rady biaśpieki Alaksandra Miažujeva ź dziŭnaj farmuloŭkaj «u suviazi sa składanymi siamiejnymi abstavinami». Pakul nieviadoma, što za joj chavajecca.
«NN» sabrała cikavyja fakty pra adstaŭlenaha siłavika.
Rodam ź Lachavičaŭ
Miažujeŭ naradziŭsia ŭ 1959-m u Lachavičach. Darečy, proźvišča Miažujeŭ miascovaje, a nie nanasnoje, tak kažuć uradžency Lachavič. Adukacyju, jak i bolšaść vajskoŭcaŭ, atrymlivaŭ za miežami Biełarusi. Skončyŭ Kijeŭskaje vyšejšaje ahulnavajskovaje kamandnaje vučylišča, Vajskovuju akademiju imia Frunze ŭ Maskvie, a taksama Vajskovuju akademiju hienieralnaha štaba Uzbrojenych siłaŭ Rasijskaj Fiederacyi. U zvańni hienierał-majora.
Prachodziŭ słužbu ŭ kamandnych i štabnych pasadach: kamandzira bryhady, namieśnika kamandujučaha vojskami apieratyŭnaha kamandavańnia, načalnika štaba — pieršaha namieśnika kamandujučaha apieratyŭnaha kamandavańnia, kamandujučaha vojskami apieratyŭnaha kamandavańnia, načalnika Hałoŭnaj vajskovaj inśpiekcyi Uzbrojenych sił Respubliki Biełaruś. Źviartaje na siabie ŭvahu, što peŭny čas Miažujeŭ słužyŭ pad kiraŭnictvam hienierała Valeryja Frałova, jaki paźniej syšoŭ u apazicyju. Letaś Valeryj Frałoŭ pamior. Na pachavańnie Alaksandr Miažujeŭ nie pryjšoŭ.
Siaredzič: Heta nie toj čałaviek, jaki kidajecca z šaškaj na apanienta
Hałoŭny redaktar haziety «Narodnaja vola» Iosif Siaredzič adnojčy mieŭ sustrečy z Alaksandram Miažujevym. «Heta adbyłosia paśla kruhłaha stała ŭ Radzie biaśpieki, kudy ja byŭ zaprošany. Paśla aficyjnaj častki my pasiadzieli za kubačkam kavy ź Miažujevym. Jon zrabiŭ na mianie dobryja ŭražańni. Spakojny, udumlivy, heta nie toj čałaviek, jaki z šaškaj kidajecca na apanienta. Absalutna nie zastałosia niehatyŭnych uražańniaŭ. Na raźvitańnie ja jašče spytaŭsia ŭ Miažujeva, ci mahu ja źviartacca da jaho ŭ vypadku niejkich prablem. Dziaržsakratar Rady biaśpieki adkazaŭ, što ŭ luby momant, jahonyja dźviery zaŭsiody adčynienyja», — kaža Iosif Siaredzič.
Pradkazvaŭ rost niehatyŭnych nastrojaŭ adnosna Rasii
Alaksandr Miažujeŭ (źleva) na pradstaŭleńni ministra abarony Andreja Raŭkova. Fota haziety «Vo słavu Rodiny».
U abaviazki Miažujeva na pasadzie dziaržsakratara Rady biaśpieki ŭvachodziła kaardynavańnie dziejnaści ŭsich siłavych struktur krainy. Mienavita Miažujeŭ pradstaŭlaŭ u profilnych viedamstvach novych načalnikaŭ. Naprykład, Juryja Siańko ŭ Mytnym kamitecie ci Andreja Raŭkova ŭ Ministerstvie abarony.
U śniežni minułaha hoda, kali Rasija zabaraniła ŭvoz na svaju terytoryju biełaruskaj pradukcyi, to pavodziny susiedniaj dziaržavy Miažujeŭ nazvaŭ «niepartniorskimi».
«Pieraškoda pastaŭkam biełaruskich tavaraŭ u družalubnuju nam Rasijskuju Fiederacyju zakanamierna paciahnie ŭźnimańnie roźničnych cen na pradukty charčavańnia i, jak vynik — rost niehatyŭnych sacyjalnych nastrojaŭ u rasijskim hramadstvie», — davoli rezka adznačyŭ Alaksandr Miažujeŭ.
Jašče za čas jahonaha znachodžańnia na pasadzie Miažujeŭ zapomniŭsia vykazvańnie ab tym, što alternatyŭnaja słužba nie pavinna stanavicca bolš pryvabnaj za terminovuju, a taksama abiacańnie pravieryć zarobki dyrektaroŭ dziaržaŭnych i pryvatnych pradpryjemstvaŭ.
«Žančyna — heta ŭzorny voin»
Adnojčy ŭ Miažujeva papytalisia ab staŭleńni da žančyn u vojsku. Voś taki byŭ adkaz: «Ja vam tak skažu: žančyna — heta ŭzorny voin. Jana nie parušaje vajskovuju dyscyplinu, dobrasumlenna stavicca da vykanańnia słužbovych abaviazkaŭ, joj nie treba paŭtarać dvojčy. Žančyna pjanaja za rulom nie jeździć, u niećviarozym stanie ŭ hramadskich miescach, jak praviła, nie źjaŭlajecca. Pry hetym jana jašče i siamju ŭtrymlivaje. Tak što tut usio zakanamierna».
Svaim chobi Miažujeŭ nazyvaje sport. Kaža, što ŭsurjoz zajmaŭsia handbołam, dziudo, hirami, kožny čaćvier chodzić u basiejn.
Žaniŭsia ŭ 19 hadoŭ, maje troch synoŭ (usie adsłužyli ŭ vojsku). Kazaŭ, što tak rana žaniŭsia, bo bajaŭsia ssyłki ŭ addaleny harnizon paśla vučoby. Žonka była ź im paŭsiul.
«Nie kamanduje, ale kiruje ŭ chatniaj haspadarcy žonka, ja joj całkam daviaraju», — kazaŭ Miažujeŭ u adnym ź intervju.
Chto moža zamianić Miažujeva?
Pradkazać kadravyja pierastanoŭki Alaksandra Łukašenki niaprosta. Jon pierakanaŭ, što moža ździvić svaimi krokami. Tym nie mienš, pasprabujem nazvać niekalki najbolš imaviernych kandydatur.
Andrej Uciuryn — namieśnik Miažujeva ŭ Radzie biaśpieki. Čałaviek, jaki doŭhi čas uznačalvaŭ Słužbu achovy prezidenta. Naradziŭsia ŭ Rasiei, ale farmiravaŭsia jak asoba ŭ Biełarusi, jahony baćka byŭ kambryham častki 3214.
Ihar Račkoŭski — były kiraŭnik Pamiežnaha kamiteta, jaki straciŭ pasadu paśla «plušavaha desantu». Račkoŭskaha praź siabroŭstva z synami Łukašenki nazyvali samym pierśpiektyŭnym siłavikom, ale praz «šviedski miedźviedziroŭščyk» pazbaviŭsia pasady. Ciapier pracuje staršynioj Biełaruskaj fiederacyi chakieja. Ale ž ci heta praca dla ambitnaha kiraŭnika?
Vasil Alaksiejenka — deputat pałaty pradstaŭnikoŭ. Apošnim časam Łukašenka niaredka čerpaje kadry mienavita z parłamienta, adtul jon ubačyŭ i Miažujeva. Los 58-hadovaha Alaksiejenki byŭ źviazany z Unutranymi vojskami.
Mabyć, nie varta vyklučać, što Dziaržsakratarom Rady biaśpieki moža być pryznačany staršynia KDB Valeryj Vakulčyk ci ministr unutranych spravaŭ Ihar Šunievič. Abo — čamu nie Viktar Łukašenka?
Praź dzieviać miesiacaŭ paśla vyzvaleńnia pamior palitviazień Valeryj Bohdan7
Kamientary