Siarod zahinułych u avijakatastrofie ŭ Amurskaj vobłaści byŭ prynamsi adzin biełarus
Ranicaj 24 lipienia ŭ Amurskaj vobłaści Rasii raźbiŭsia pasažyrski samalot An-24. Na jaho borcie było 43 pasažyry i šeść členaŭ ekipaža. Nichto ź ich nie vyžyŭ. Jak stała viadoma vydańniu «Lusterka», siarod pasažyraŭ byŭ i biełarus Dzianis Kazienka. U jaho zastałasia maleńkaja dačka.
Imia «Dzianis» «Lusterka» zaŭvažyła ŭ śpisie zahinułych pasažyraŭ, jakija apublikavaŭ rasijski telehram-kanał «Info 24». Paźniej jano źjaviłasia i ŭ śpisach inšych rasijskich ŚMI ŭžo z proźviščam.
«Dzianis Kazienka 21 sakavika 1995 hoda naradžeńnia», — tak zahinuły značyŭsia ŭ śpisach.
Krynica «Lusterka» paćvierdziła, što Dzianis Kazienka — biełarus. U jahonym zakrytym akaŭncie va «Ukantakcie» značyłasia, što jon rodam z horada Pastavy Viciebskaj vobłaści.
«Lusterka» adšukała profil mužčyny ŭ Instagram. Tam paznačana, što jon — supracoŭnik biełaruskaj kampanii «Inavatek». Jana zajmajecca inavacyjnymi technałohijami ŭ śfiery lasnoj haspadarki.
Dzianis byŭ inžynieram šef-mantažu ZKS-centraŭ. Heta kompleksy, u jakich vyroščvajuć sadžancy dla lasoŭ. «Adnaŭlaju sibirski i dalokaŭschodni les», — napisaŭ mužčyna ŭ profili.
Pa infarmacyi «Lusterka», 24 lipienia mužčyna znachodziŭsia ŭ Chabaraŭsku ŭ kamandziroŭcy.
«Jon užo zvolniŭsia. Ale paprasiŭsia ŭ apošniuju kamandziroŭku pa damovie padradu», — havoryć krynica.
Dzianis žyŭ u Minsku z žonkaj i maleńkaj dačkoj, jakoj nie tak daŭno spoŭniłasia dziesiać miesiacaŭ.
Miž tym, pavodle infarmacyi «Lusterka», na borcie byŭ i kaleha Dzianisa. Vierahodna, jon taksama hramadzianin Biełarusi, adnak paćvierdzić hetuju infarmacyju pakul nie ŭdałosia.
«Lusterka» pasprabavała vyśvietlić, ci jość inšyja biełarusy siarod zahinułych, u pasolstvie Biełarusi ŭ Rasii, ale dazvanicca da jaho nie vyjšła. Nie zmahli ničoha patłumačyć ni ŭ pres-słužbie MNS Chabaraŭska, ni na haračaj linii dla rodnych zahinułych. MZS Biełarusi taksama ničoha nie paviedamlaje pra zahinułych ni na sajcie, ni ŭ telehram-kanale.
Ranicaj 24 lipienia źjaviłasia infarmacyja pra źniknieńnie z radaraŭ rasijskaha pasažyrskaha samalota An-24, jaki nakiroŭvaŭsia pa maršrucie Chabaraŭsk — Błahavieščansk — Tynda. Samalot sprabavaŭ pryziamlicca, ale jamu zaminała niepahadź. Pavietranaje sudna zachodziła na druhi kruh dla pasadki, ale paśla rezka źnikła z radaraŭ. Paźniej jaho abłomki znajšoŭ viertalot Rasavijacyi.
Na borcie An-24 znachodzilisia 49 čałaviek, ź ich piać — dzieci, i šeść — členy ekipaža. Nichto z pasažyraŭ i členaŭ ekipaža nie vyžyŭ.
Kamientary