Asoby lutaha

Hetym razam Redakcyja paličyła lišnim hałasavańnie nakont asobaŭ lutaha. Vybar vidavočny – Alaksandar i Iryna Kazuliny.

Alaksandar i Iryna Kazuliny. 15 lutaha ŭ Viciebsku Alaksandar Łukašenka zajaviŭ, što prapanoŭvaŭ palitviaźniu Alaksandru Kazulinu vyzvaleńnie ŭ abmien na vyjezd z krainy ŭ Niamieččynu. Łukašenka skazaŭ: «Nakolki ja infarmavany, hetaja pazycyja nia ŭstroiła adnaho Kazulina. Pytańnie było ŭ tym, što jahonaja žonka chvoraja, i da mianie źviarnulisia pasły Eŭrasajuzu... Ja zhadziŭsia — chaj viazie, lečyć žonku. Ale nakolki rankam ja byŭ infarmavany, jon admoviŭsia jaje lačyć. Ale heta siamiejnyja prablemy, admoviŭsia, dyk admoviŭsia. Jon admoviŭsia navat paśla taho, jak jahonyja dočki pajechali i ŭhavorvali ŭratavać mamu, jamu hetaja mama ŭžo daŭno nie była treba... Ale ja nie chaču ŭłazić u čužyja działy, žyćcio ŭsie rasstavić pa svaich miescach».

Cmiarotnaja chvoraja Iryna Kazulina znajšła ŭ sabie siły adkazać na hetyja słovy adkrytym listom. Jana ŭžo nie mahła havaryć, ale pisała: «Začapiła za žyvoje hreblivaje staŭleńnie da našaj siamji. Choć časam zdajecca, što ničoha padobnaha ŭžo nie moža vyvieści ź siabie, cynizm dzivić. Tyja prapanovy, jakija byli ahučanyja jaho pasłancom nam, byli nieprymalnymi. Heta było b haniebnymi ŭciokami z krainy».

23 lutaha Iryna Kazulina pamierła. Administracyja kalonii doŭha nie chacieła vypuskać A. Kazulina na pachavańnie žonki. Ale pakutnica-žančyna abudziła takuju chvalu hramadzkaha spačuvańnia i abureńnia, što ŭłady ŭrešcie byli vymušanyja adškadavać palityku try dni adpačynku.

Raźvitacca ź Irynaj Kazulinaj u Čyrvony kaścioł i na mohiłki ŭ Tarasava pryjšli niekalki tysiač čałaviek. Heta žančyna stała ŭvasableńniem i symbalem usich mukaŭ, jakija vypadajuć na dolu svajakoŭ biełaruskich palitviaźniaŭ.

Pierad samym viartańnie ŭ turmu Alaksandar Kazulin skazaŭ: «Ja daruju Łukašenku, maja siamja daruje jamu. Ja praciahvaju ruku da Łukašenki z absalutna čystym sercam i namierami. Ja prapanoŭvaju jamu zabycca na ŭsie asabistyja kryŭdy».

Hiebchardt Vajs. Separatnyja pieramovy niamieckaha pasła z Łukašenkam skončyłasia vyzvaleńniem šerahu palitviaźniaŭ. Ciaham lutaha na voli apynulisia Artur Fińkievič, Andrej Klimaŭ, Alaksandar Źdźvižkoŭ. Stała vidavočna, što aficyjny Miensk pravodzić niejkija pieramovy ź Niamieččynaj. Kazaŭ pra rolu pasła Vajsa i A. Kazulin: «Ja mahu skazać, što niamiecki pasoł Vajs dziejničaŭ sumlenna. Jon ščyra chacieŭ nam dapamahčy. Toje, što było potym inšaja historyja. Razumiejecie, niemcy časta nie razumiejuć našu rečaisnaść i niuansy, jakija vielmi važnyja».

Andrej Chadanovič. Kulturny hoład, jaki ŭtvaryŭsia ŭ vyniku zabaronaŭ na biełaruskuju kulturu i druk, u lutym spatalaŭ Andrej Chadanovič padčas prezentacyi novaj knihi vieršaŭ “Berlibry”. Na imprezu pryjšło niekalki socień čałaviek. Usie achvotnyja navat nie zmahli źmiaścicca ŭ teatralnaj zali Biełaruskaj dziaržaŭnaj akademii mastactvaŭ. Chadanovič maje nieasprečny talent i papularnaść i daje prykład tvorčaj i hramadzianskaj niastomnaści.

Uładzimier Zdanovič. Deputat pałaty pradstaŭnikoŭ Uładzimier Zdanovič, jaki kaardynuje raspracoŭku novaha zakonu «Ab Praviłach biełaruskaj artahrafii i punktuacyi, zajaviŭ prama, dla kaho prymajecca zakon ab kropkach, koskach i vialikich litarach u słovie Prezydent: «Paśla pryniaćcia zakonu «Naša Niva» i «Arche» pavinny buduć kiravacca zaćvierdžanymi praviłami». Słovy Zdanoviča supiarečać jahonym ža zajavam miesiačnaj daŭniny, dzie parlamentar vykazvaŭ zusim inšyja dumki: «Nielha čałavieku zabaranić razmaŭlać i pisać na toj movie, na jakoj jon choča. Kali chtości čytaje hazetu «Naša Niva», časopis «Arche», dyk naŭrad ci ich buduć zabaraniać». Charakterna, što radykalnyja źmieny ŭ zakon byli ŭniesienyja pierad druhim čytańniem, bieź nijakich navat kansultacyj z navukoŭcami.

Kosaŭskija albancy. 17 lutaha palityčnaja mapa śvietu papoŭniłasia jašče adnoj niezaležnaj dziaržavaj. Parlament Kosava adzinahałosna prahałasavaŭ za abviaščeńnie niezaležnaści kraju ad Serbii. Kosava pačało baraćbu za niezaležnaść u 1970-ja, kali kraj navat nia mieŭ dziaržaŭnaha statusu ŭ byłoj Juhasłavii. Ahmianiom nacyjanalna-vyzvolnaje baraćby byŭ universytet Pryšciny, a maralnym lideram ruchu — niadaŭna pamierły filozaf Ibrahim Ruhova. Chacia kasavary i abviaścili niezaležnaść, pytańnie, ci stanuć jany nacyjaj, zastajecca adkrytym.

Anton Kušnir. Najmacniejšaja ŭ śviecie biełaruskaja škoła frystajlistaŭ-akrabataŭ zajmieła jašče adnu zorku – Antona Kušnira. 23-hadovy miančuk idzie druhim u ahulnym zaliku Kubku śvietu, sastupajučy tolki kanadzkaj lehiendzie frystajłu Omišlu, i apiaredžvajučy słavutaha suajčyńnika Daščynskaha. U lutym Kušnir vyjhraŭ pieršy tytuł u svaim žyćci.

• 0
• 0
• 0
• 0
• 0
• 0
• 0
• 0