Deputat Zdanovič: «Našu Nivu» i «Arche» nie zabaroniać

Čałavieku nielha zabaranić razmaŭlać i pisać na toj movie, na jakoj jon choča. Takoje mierkavańnie ŭ intervju BiełaPAN 24 studzienia vykazaŭ staršynia kamisii pa adukacyi, kultury, navucy i navukova‑techničnym prahrasie Pałaty pradstaŭnikoŭ Uładzimir Zdanovič, kamientujučy chod dapracoŭki zakonaprajekta ab praviłach biełaruskaj arfahrafii i punktuacyi.

Pavodle słoŭ deputata, u zakonaprajekcie niama ni słova ab pakarańni za niapravilnaje ŭžyvańnie i napisańnie słoŭ. «Sam zakonaprajekt składajecca z adnoj staronki. Usio astatniaje — dadatki. Ale na hetaj staroncy napisana vielmi razumnaja reč: praviły buduć prymianiacca abaviazkova arhanizacyjami i radavymi hramadzianami ŭ aficyjnych adnosinach. Da ich adnosicca składańnie aficyjnych adozvaŭ, publikavańnie zakonaŭ, napisańnie adozvaŭ u nataryjalnuju kantoru, sudovy orhan. Heta navat vyhadna dla hramadzian, bo dapamža paźbiehnuć roznaha traktavańnia słoŭ», — paviedamiŭ U.Zdanovič.

Deputat zaznačyŭ, što haziety i časopisy, jakija publikujuć aficyjnyja dakumienty, buduć abaviazany ich drukavać u adpaviednaści z nabyŭšymi moc praviłami. «Ale heta nie aznačaje, što ludzi buduć razmaŭlać tolki pa hetych praviłach, a piśmieńniki buduć pisać tolki zhodna ź imi. Heta nie tak. Kali pračytać tvory Janki Kupały, Jakuba Kołasa, dyk tam možna znajści vyklučeńni na ŭsie praviły. Dumku nielha vykazać aficyjnaj movaj, ale dakumient pavinien być napisany mienavita na joj», — ličyć U.Zdanovič.

Parłamientaryj padkreśliŭ, što luby zakon praduhledžvaje peŭnyja miery adkaznaści za jaho nievykanańnie. «Adnak havaryć ab turemnym źniavoleńni za dapuščanuju pamyłku nie treba. Za praliki i niedachopy možna prymianiać praktyku vymovy, mahčyma, štrafu, kali heta pryviało da niejkich nastupstvaŭ», — ličyć deputat.

U.Zdanovič zaznačyŭ, što haziety, jakija vykarystoŭvajuć «taraškievicu», «bajacca, što paśla ŭvachodžańnia zakona ŭ siłu ich pazakryvajuć». «Kaniešnie, ciažka pradkazvać usie nastupstvy ŭvachodžańnia zakonaprajekta ŭ siłu. Ale my pišam zakon zychodziačy z dumki, što nielha čałavieku zabaranić razmaŭlać i pisać na toj movie, na jakoj jon choča. Kali chtości čytaje hazietu «Naša Niva», časopis «Arche», dyk naŭrad ci ich buduć zabaraniać. Prosta ŭsie buduć viedać, što mova hetych vydańniaŭ niesapraŭdnaja, nieŭžyvanaja. Abmiežavać dostup da ŚMI, internieta niemahčyma. My pieražyvajem u pieršuju čarhu za dziaciej. Čytajučy roznyja haziety, a potym zdajučy testy, jany pavinny viedać, jak budzie pisacca toje ci inšaje słova aficyjna», — skazaŭ U.Zdanovič.

Siarhiej Karalevič, BiełaPAN

• 0
• 0
• 0
• 0
• 0
• 0
• 0
• 0