Śledčy kamitet: Suprać «hraficistaŭ» zaviedziena kryminalnaja sprava, jany zatrymanyja
Upraŭleńniem Śledčaha kamiteta pa h. Minsku rasśledujecca kryminalnaja sprava ab paškodžańni majomaści i chulihanskich dziejańniach. Pavodle padazreńnia ŭ ździajśnieńni hetych złačynstvaŭ zatrymanyja čaćviora žycharoŭ horada Minska, paviedamiła ŭ svaim fejsbuku aficyjny pradstaŭnik SK Julija Hančarova.
Padstavaj da zaviadzieńnia kryminalnaj spravy pasłužyli materyjały Hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj MUS Respubliki Biełaruś.
Ukazanyja asoby padazrajucca ŭ tym što, adznačajecca ŭ paviedamleńni SK, u lipieni ažyćciavili psavańnie rekłamnaha ščyta z adlustravańniem supracoŭnikaŭ pravaachoŭnych orhanaŭ, jaki naležyć indyvidualnamu pradprymalniku, pryčyniŭšy apošniamu materyjalny ŭron u pamiery nie mienš za 2 miljony rubloŭ.
Akramia taho, u vykanańni na šerahu zbudavańniaŭ u roznych častkach horada nadpisaŭ i malunkaŭ, jakija prapahandujuć hvałt u hramadstvie i hrebavańnie da ahulnapryniatych praviłaŭ pavodzinaŭ, u pryvatnaści, u adlustravańni siłuetu čałavieka, jaki kidaje butelku z zapalnaj sumieśsiu.
Śledstva raźbirajecca va ŭsich akaličnaściach zdareńnia. Dapytvajucca padazravanyja. Vyśviatlajucca matyvy i mety ździajśnieńnia supraćpraŭnych dziejańniaŭ, havorycca ŭ paviedamleńni SK.
Da materyjałaŭ kryminalnaj spravy dałučanyja kanfiskavanyja ŭ padazravanych: litaratura ekstremisckaj nakiravanaści, maski, šaŭrony z vyjavaj «Kałaŭrat», butelki z vadkaściu dla zapalvańnia, bałakłava, pradmiet, pnieŭmatyčny pistalet i mnohaje inšaje. Zaraz kanfiskavanyja rečavyja dokazy ahladajucca i vyvučajucca śpiecyjalistami.
Pravodzicca kompleks śledčych dziejańniaŭ, pryznačany šerah ekśpiertnych daśledavańniaŭ, u tym liku psichołaha-linhvistyčnaja ekśpiertyza z metaj dačy kančatkovaj pravavoj acenki dziejańniam padazravanych.
U Łahojsku piekar admaŭlajecca pradavać svoj chleb pakupnikam, u jakich jość sabaki84
Kamientary