Ź likam 40:0 tolki ŭ Paŭnočnaj Amierycy!
Z evalucyjnaha punktu hledžańnia katy akazalisia značna bolš prystasavanymi za sabak, pišuć šviejcarskija navukoŭcy ŭ časopisie PNAS. Tolki ŭ Paŭnočnaj Amierycy katy pryviali da vyniščeńnia 40 vidaŭ sabak — sabaki ž nie zdoleli vyniščyć nivodny vid katoŭ.
Kala 20 młn hod tamu kacinyja źjavilisia ŭ Paŭnočnaj Amierycy. Jany akazalisia bolš efiektyŭnymi palaŭničymi, mnohija sabačyja zastalisia bieź ježy. U vyniku kolkaść sabačych stała skaračacca, vymierła prynamsi 40 vidaŭ.
Zvyčajna miarkujecca, što vyznačalnuju rolu ŭ evalucyi maje klimat. Ale daśledavańnie dźviuch tysiač skamianiełaściej pakazała, što klimat akazaŭsia mieniej upłyvovym za katoŭ. U vypadku sabačych Paŭnočnaj Amieryki padobna, što hałoŭnuju rolu mieli kacinyja, a dakładniej, kankurencyja ź imi za ježu.
Dakładnaja pryčyna pieravahi katoŭ u evalucyi nieviadomaja. Mahčyma, samaja strašnaja zbroja katoŭ suprać sabak — kipciury.
Vaŭki, što dahetul žyvuć u Amierycy, u palavańni raźličvali na chutkaść i vymotvańnie achviary doŭhaj pahoniaj. Inšyja sabačyja, u tym liku ŭžo nie žyvyja, palujuć z zasady, jak i katy. Dy katy mohuć uciahvać kipciury, što robić ich postup biasšumnym, sabačyja tym pachvalicca nie mohuć. Z katoŭ nie ŭmiejuć uciahvać kipciury tolki hiepardy (rekardsmieny pa chutkaści biehu ŭ žyviolnym śviecie) i sumatranskija katy (admysłoŭcy ŭ rybałcy).
Što cikava, papularnaja fraza pra toje, što katy pieramahli sabak u internecie, nie jość absalutnaj praŭdaj: jak pakazvaje Google Trends, ludzi značna čaściej huhlać niešta pra sabak, čym pra katoŭ. Dy i ludzi, jak demanstruje apytańnie Associated Press, bolš lubiać sabak, a nie katoŭ. Ale Business Insider pryvodzić cełych piać pryčyn taho, čamu žyćcio «kašatnikaŭ» lepšaje za «sabačnikaŭ».
Kamientary