Biełaruś i Polšča majuć namier stvaryć transhraničnyja papulacyi zubra
Ministerstva pryrodnych resursaŭ i achovy navakolnaha asiarodździa sumiesna z polskimi śpiecyjalistami raspracoŭvaje prajekt pa stvareńni transhraničnaj papulacyi zubra. Ab hetym na pres-kanfierencyi 26 žniŭnia paviedamiła načalnik upraŭleńnia bijałahičnaj i łandšaftnaj raznastajnaści Minpryrody Natalla Minčanka.
Pavodle jaje słoŭ, ciapier Biełaruś zajmaje pieršaje miesca pa kolkaści zubroŭ, jakija žyvuć u stanie naturalnaj voli. «Pačynajučy z 10 zubroŭ u 1940-ch hadach, my pryjšli da ličby bolš za 1.200, i ciapier sprabujem razam z polskimi kalehami padrychtavać prajekt, jaki dazvolić stvaryć transhraničnyja papulacyi zubra i ŭsio-taki pašyryć areał pražyvańnia», — skazała jana.
Raniej pa inicyjatyvie Biełarusi doŭhi čas raspracoŭvałasia kancepcyja prahramy Sajuznaj dziaržavy «Farmiravańnie aptymalnaha areała jeŭrapiejskaha zubra jak harantyi jaho doŭhačasovaha zachavańnia» («Darožnaja karta dla zubra»), jakaja praduhledžvała adnaŭleńnie frahmientaŭ raniejšaha areała pražyvańnia jeŭrapiejskaha zubra na terytoryi Sajuznaj dziaržavy. Adnak, jak adznačyła Minčanka, Minpryrody Rasii spyniła pracu pa hetym kirunku.
«Tamu my chutka pieraklučylisia na polski bok. Jość razumieńnie, jość padtrymka z boku palakaŭ, jość padtrymka Savieta Jeŭropy pa hetym pytańni. My vielmi spadziajemsia, što ŭ najbližejšyja niekalki hadoŭ u nas budzie sumiesny prajekt ź imi», — skazała jana.
Pavodle słoŭ Minčanki, Minpryrody Biełarusi nakiroŭvaje ŭ Rasiju šmat prajektaŭ, jakija, adnak, nie znachodziać padtrymki z boku rasijskaha viedamstva, i supracoŭnictva pamiž krainami lepš raźvivajecca na rehijanalnym uzroŭni.
Ciapier čytajuć
Pamiatajecie Taćcianu Zareckuju, jakaja sa skandałam zvalniałasia z Kabinieta Cichanoŭskaj? U Estonii jaje padazrajuć u machlarstvie48
Kamientary