Prykład Niemziča i Telekom Austria Group śviedčyć, što biełaruskija ŭłady starajucca pakazać siabie biznes-frendli z zachodnimi investarami.
U interviju brytanskaj Financial Times kiraŭnik kampanijaŭ mabilnaj suviazi Telekom Austria Group i Mobilkom Austria Barys Niemzič paviedamiŭ: «Da nas u Biełarusi pastavilisia našmat lepš, čym u Bruseli. Heta nie palityčnaja zajava. Tak zajaŭlaje biznes».
Barys Niemzič adznačyŭ, što «zadavoleny tym, jak biełaruskija ŭłady letaś pastavilisia da prapanovaŭ kampanii, kali jana nabyła 70% akcyjaŭ Velcom'u za 730 miljonaŭ eŭra».
Zajava biznesoŭca mieła nahodaj čarhovuju sproby Eŭrakamisii abmiežavać rascenki aperataraŭ mabilnaj suviazi. Brusel padazraje, što mižnarodnyja roŭminhavyja zbory (płata za karystańnie pasłuhami zamiežnaha aperatara) — heta vymahańnie hrošaj z klijentaŭ, a nia vynik spraviadlivaj kankurencyi. Na minułym tydni Eŭrakamisija zaklikała eŭrapiejskich aperataraŭ skaracić roŭminhavyja vydatki na SMS-paviedamleńni i na mabilny dostup u Internet. Na apošniaj admysłovaj kanferencyi ŭ Barselonie na heta navat vyznačyli krajni termin — da 1 lipienia.
Pres-sakratarka EK padjałdyknuła Niemziča: maŭlaŭ, nia viedaju, ad čaho jamu biznes-klimat u Eŭropie staŭ nie daspadoby, mo ad taho što finansavyja vyniki jahonych kampanij nijakavatyja. Niahledziačy na ekspansiju na ŭschodnich rynkach, ich kaciroŭki ŭpali na 10% za apošni hod.
Prykład Niemziča śviedčyć, što biełaruskija ŭłady starajucca pakazać siabie biznes-frendli z zachodnimi investarami. A niekatoryja biznesoŭcy radyja pracavać u aŭtarytarnych krainach: ani tabie strajkaŭ, ani tabie abmiežavańniaŭ ekspluatacyi, ani miažy prybytkaŭ.
Ciapier čytajuć
Čym ciapier žyvie Ksienija Vołkava z «Apošniaha hieroja»? Čverć stahodździa tamu hetaja biełaruska trapiła na trapičny vostraŭ2
Kamientary