Ministerstva enierhietyki Biełarusi paviedamiła, što 15 studzienia pieršy enierhabłok Biełaruskaj atamnaj elektrastancyi budzie vyviedzieny ŭ čarhovy, užo čaćviorty pa liku, płanava-papieradžalny ramont. Heta častka štohadovaj ramontnaj kampanii, jakaja pravodzicca dla padtrymańnia nadziejnaj i biaśpiečnaj pracy atamnaj stancyi.
U viedamstvie ŭdakładnili, što ramont pieršaha enierhabłoka pačniecca praktyčna adrazu paśla taho, jak druhi enierhabłok zavieršyć svoj płanavy ramont, budzie padklučany da elektrasietki i vyjdzie na naminalnuju mahutnaść. Takim čynam, ramonty na dvuch enierhabłokach pravodziacca pa čarzie, biez praciahłych pierapynkaŭ.
Adnym z najvažniejšych etapaŭ zapłanavanych rabot stanie pierahruzka jadziernaha paliva ŭ reaktary. Padčas hetaj pracedury častku ciepłavydzialalnych zborak, jakija ŭžo adpracavali svoj resurs, zamieniać na novyja. Akramia taho, śpiecyjalisty praviaduć maštabnuju dyjahnostyku i techničnaje absłuhoŭvańnie bolš jak dziesiaci tysiač adzinak abstalavańnia i sistem.
Pravierki zakranuć reaktarnaje i turbinnaje abstalavańnie, elektratechničnyja i vientylacyjnyja sistemy, a taksama srodki aŭtamatyki i kantrolu. Asobnaja ŭvaha budzie nadadziena ekspłuatacyjnamu kantrolu stanu mietału i zvarnych švoŭ.
U Ministerstvie enierhietyki padkreślili, što takija ramonty na kožnym enierhabłoku BiełAES pravodziacca adzin raz na hod. Ich meta — zabiaśpiečyć stabilnuju pracu stancyi i zachavać asnoŭnyja techničnyja paramietry abstalavańnia.
Pry hetym adznačajecca, što płanava-papieradžalnyja ramonty źjaŭlajucca zvyčajnaj mižnarodnaj praktykaj dla atamnych elektrastancyj, a ich praciahłaść moža varjiravacca ŭ zaležnaści ad składanaści i abjomu rabot.
Pavodle aficyjnych danych, za ŭvieś čas ekspłuatacyi pieršy enierhabłok Biełaruskaj AES užo vypracavaŭ bolš za 37 miljardaŭ kiłavat-hadzin elektraenierhii.
Raniej, 10 studzienia, Ministerstva enierhietyki paviedamiła pra zaviaršeńnie ramontu druhoha enierhabłoka i jaho padklučeńnie da sietki. Raboty na im doŭžylisia 57 dzion. Papiaredni, treci płanava-papieradžalny ramont pieršaha enierhabłoka prachodziŭ z pačatku śniežnia 2024 hoda da kanca studzienia 2025‑ha i zaniaŭ 55 dzion.
Nad Astravieckaj AES siońnia nazirali kałasalny słup pary
Pryniata rašeńnie ab budaŭnictvie treciaha błoku na Biełaruskaj AES
Schovišča dla radyjeaktyŭnych adkidaŭ pabudujuć da 2030 hoda
U Biełarusi amal skončyli rabić abhruntavańnie dla budaŭnictva druhoj AES
Jość tolki 10 rajcentraŭ, dzie nasielnictva vyrasła niahledziačy ni na što. Lidar tradycyjny
Kamientary