U Minsku «karusielščyki» źbili naziralnika i sprabavali zabrać u jaho noŭtbuk
Padčas daterminovaha hałasavańnia na vybarčym učastku № 24 Miensku naziralniki zafiksavali dvuch «karusielščykaŭ» i ŭbačyli, jak im płacili hrošy za fiktyŭny ŭdzieł u vybarach. Na naziralnika ad AHP, padpałkoŭnika milicyi ŭ adstaŭcy Mikałaja Kazłova, jaki pačaŭ pieraśled «karusielščykaŭ», na vulicy Bahdanoviča napali i sprabavali adabrać u jaho noŭtbuk. Naziralnik vyklikaŭ milicyju i patrabuje zaviadzieńnia kryminalnaj spravy.
Mikałaj Kazłoŭ raspavioŭ karespandentu Svabody, što ź im adbyvałasia na 24 učastku 10 kastryčnika.
«Da 12 hadzinaŭ nibyta było ŭsio narmalna, išło zvyčajnaje daterminovaje hałasavańnie — to bok ludzi pakrychu padychodziać, hałasujuć. I tut maju ŭvahu pryciahnuŭ adzin vybarca stałaha vieku — na im byŭ kapialuš jaŭna nie jahonaha pamieru i pavodziŭ jon siabie na učastku niejak niaŭpeŭniena. Ale zarehistravaŭsia, kinuŭ biuleteń. Na vychadzie ja padyšoŭ da jaho i paprasiŭ pakazać dakumenty, a milicyjanta, jaki dziažuryć na učastku, paprasiŭ ich pravieryć. Ci sapraŭdy jon tut žyvie i maje prava tut hałasavać? Ale milicyjant i supracoŭniki vybarčaj kamisii admovilisia praviarać, skazali, što na heta ŭ ich niama prava. Toj čałaviek adrazu syšoŭ, a ja pajšoŭ za im. Na vulicy Bahdanoviča ŭbačyŭ, što jon dałučyŭsia da kampanii takich ža jak jon ludziej stałaha vieku, niedzie ich było 4—5, u tym liku žančyna. Ja pajšoŭ za imi i paźniej ubačyŭ, jak užo druhaja žančyna, maładziejšaja, daje im hrošy — tym, jakija ŭžo prahałasavali. Pačaŭ zdymać ich praz noŭtbuk i tady dva ź ich na mianie nakinulisia, udaryli pa nahach, sprabavali adabrać noŭtbuk. Ciapier ja znachodžusia na vybarčym učastku, vyklikaŭ siudy aperatyŭna-śledčuju hrupu i čakaju, kali pryjeduć. Chaču chadajničać, kab zaviali kryminalnuju spravu na «karusielščykaŭ» za napad i za toje, što jany ŭdzielničali ŭ falšavańni vybaraŭ. Ciapier ja dakładna viedaju, što im płaciać za heta hrošy i padazraju, što supracoŭniki vybarčaj kamisii mohuć u hetym udzielničać», — skazaŭ Mikałaj Kazłoŭ.
Pavodle Mikałaja Kazłova, dva dni tamu na vybarčy ŭčastak № 24 užo prychodzili 6 «karusielščykaŭ», ale prahałasavać im nie ŭdałosia. «Im, vidać, padali syhnał, što tut naziralniki, i jany syšli. Na vulicy ja zaśniaŭ ich tvary na videa, jano vykładzienaje na sajcie AHP — «karusielščykaŭ» možna vyznačyć. Miž tym ŭ kamisii na mianie za heta skłali pratakoł, što nibyta pieraškadžaju vybarcam. Mahčyma, kamisija zachoča pazbavić mianie akredytacyi naziralnika», — raspaviadaŭ Mikałaj Kazłoŭ 9 kastryčnika.
***
Mikałaj Kazłoŭ — aktyvist AHP, były padpałkoŭnik milicyi, jaki na parlamenckich vybarach 2008 hodu vykryŭ ukidvańnie falšyvych biuleteniaŭ padčas daterminovaha hałasavańnia, paśla čaho byŭ zvolnieny ź milicyi.
Kamientary