Naziralnik ukinuŭ u skryniu pustyja biuleteni, a pry padliku jany źnikli

Na vybarčym učastku №60 Maskoŭskaha rajona h. Bieraścia byli vyjaŭlenyja machinacyi ź biuleteniami.

Siabar Rady ruchu «Za Svabodu» padaŭ zajavu prakuroru Bieraścia ab raspačynańni kryminalnaj spravy «pavodle faktu padrobki dakumientaŭ padčas vybaraŭ prezidenta Respubliki Biełaruś i zaviedama niapravilnaha padliku hałasoŭ na vybarčym učastku №60 Maskoŭskaha rajona h. Bieraścia».

Jak paviedamlaje pres-słužba «Za Svabodu», fakt parušeńnia byŭ ustalavany Dzianisam Turčaniakom u vyniku ekśpierymientu.

9 kastryčnika Turčaniak pryjšoŭ na hety vybarčy ŭčastak, dzie jamu ŭručyli biuleteń dla hałasavańnia i prapanavali prajści ŭ kabinu dla hałasavańnia, što jon i zrabiŭ: «Adnak vyrašyŭ nie hałasavać daterminova i nie apuściŭ biuleteń u skryniu dla daterminovaha hałasavańnia. Zamiest biuletenia ja kinuŭ u skryniu dla hałasavańnia arkuš papiery, paśla čaho vyjšaŭ z terytoryi ŭčastka, a biuleteń panios z saboj».

«Mnie stała cikava, jak adabjecca ŭ spravazdačnaści vybarčaj kamisii niedachop majho biuletenia pry padliku hałasoŭ 11 kastryčnika 2015. Tamu ja zarehistravaŭsia na hetym vybarčym učastku ŭ jakaści naziralnika, kab ubačyć usio na svaje vočy», — raspaviadaje Dzianis Turčaniak.

Akramia taho, jamu stała viadoma, što tak ža pastupili i niekalki inšych vybarščykaŭ: jany nie stali hałasavać daterminova, a «pakinuli biuleteni sabie ŭ jakaści suvienira — na pamiać ab vybarach prezidenta 2015 hoda».

Hetyja biuleteni jany pieradali aktyvistu Ruchu «Za Svabodu»: «Takim čynam u mianie mielisia čatyry biuleteni, jakija byli vydadzienyja ŭ pieryjad daterminovaha hałasavańnia na vybarčym učastku №60 Maskoŭskaha rajona Bieraścia. Na ŭsich hetych biuleteniach majucca podpisy siabraŭ vybarčaj kamisii».

11 kastryčnika, budučy naziralnikam, Turčaniak źviarnuŭ uvahu na skryniu daterminovaha hałasavańnia i zaŭvažyŭ, što «kontury i forma płastylinu, na jakim majecca adbitak piačatki, a taksama i miescaznachodžańnie šnura da płastylinu, adroźnivajucca ad taho, jakimi jany byli ŭ dzień majho hałasavańnia». Jon paviedamiŭ pra heta staršyni kamisii Halinie Kiviel, zrabiŭšy vysnovu, što «skrynia daterminovaha hałasavańnia niezakonna adčyniałasia padčas daterminovaha hałasavańnia i była paŭtorna apiačatanaja».

Padčas padliku hałasoŭ Turčaniak daviedaŭsia ad staršyni kamisii, što na hetym vybarčym učastku ŭ daterminovym hałasavańni ŭziali ŭdzieł 365 čałaviek, jakim vydadziena 365 biuleteniaŭ.

«Pakolki 4 biuleteni znachodziacca ŭ mianie, to pry padliku hałasoŭ pavinna była vyjavicca ich niastača. U skryni nie moža znachodzicca bolš za 361 biuleteń. Ale takaja niastača nie vyjaŭlenaja siabrami kamisii, jakija padčas padliku ŭstalavali, što ŭ skryni dla daterminovaha hałasavańnia znachodzicca 364 biuleteni, što na 3 biuleteni bolš za tuju kolkaść, jakaja moža tam znachodzicca», - piša siabra Ruchu «Za Svabodu» bieraściejskamu prakuroru.

Narešcie, «u skryni daterminovaha hałasavańnie nie vyjaviłasia listoŭ papiery, jakija byli kinutyja zamiest biuleteniaŭ mnoj i astatnimi hramadzianami, što źjaŭlajecca śviedčańniem niesankcyjanavanaha dostupu da źmieściva skryni». Jon robić vysnovu, što «listy papiery byli kanfiskavanyja sa skryni nieŭstalavanaj asobaj i zamienienyja na falšyvyja biuleteni».

Dzianis Turčaniak prykładaje da zajavy na imia prakurora Bieraścia kopii biuleteniaŭ, nie kinutych u skryniu, prosić pravieści pravierku pavodle ŭkazanych faktaŭ i raspačać kryminalnuju spravu ab padrobcy vybarčych biuleteniaŭ i zaviedama niapravilnaha padliku hałasoŭ.

• 0
• 0
• 0
• 0
• 0
• 0
• 0
• 0