BAŽ: Miedyjnaja śfiera Biełarusi maje patrebu ŭ strukturnym refarmavańni

Miedyjnaja śfiera Biełarusi maje patrebu ŭ pakrokavym strukturnym refarmavańni. Ab hetym zajaviŭ staršynia hramadskaha abjadnańnia «Biełaruskaja asacyjacyja žurnalistaŭ» (BAŽ) Andrej Bastuniec, pradstaŭlajučy 12 listapada ŭ Minsku alternatyŭnuju kancepcyju refarmavańnia miedyjnaj śfiery ŭ Biełarusi. 

Kancepcyja raspracavana ŭ miežach prajekta «Urad dla naroda», jaki realizuje Instytut raźvićcia demakratyi i sacyjalnaha rynku dla Biełarusi i Uschodniaj Jeŭropy (Litva) pa zamovie arhkamiteta pa stvareńni partyi «Biełaruskaja chryścijanskaja demakratyja». Jon praduhledžvaje raspracoŭku dziesiaci zakonaprajektaŭ, jakija datyčacca asnoŭnych napramkaŭ raźvićcia hramadstva i dziaržavy (kultura, pravasudździe, adukacyja, ŽKH i inšyja). 

Pavodle słoŭ Bastunca, na pieršym etapie refarmavańnia zakanadaŭstva ŭ miedyjnaj śfiery nieabchodna raspačać «nieadkładnyja arhanizacyjnyja i pravavyja miery, jakija źnimuć nieabhruntavanyja pieraškody ŭ raźvićci biełaruskich ŚMI i ŭchilać praźmierny dziaržaŭny kantrol nad imi». 

Hetyja źmianieńni, pavodle jaho słoŭ, nie patrabujuć uniasieńnia istotnych źmianieńniaŭ u dziejnaje zakanadaŭstva i mohuć być ažyćcioŭlenyja ŭ karotkija terminy. U pryvatnaści, adznačyŭ kiraŭnik BAŽ, nieabchodna admianić papraŭki ŭ zakon «Ab srodkach masavaj infarmacyi», pryniatyja ŭ śniežni 2014 hoda; nakłaści maratoryj na pazasudovaje prymianieńnie sankcyj da subjektaŭ ŚMI, a taksama na pazasudovuju błakiroŭku sajtaŭ; prypynić padrychtoŭku źmianieńniaŭ va ŭkaz № 60 adnosna adkaznaści ŭładalnikaŭ internet-resursaŭ za kamientaryi karystalnikaŭ; admianić patrabavańnie abaviazkovaj akredytacyi žurnalistaŭ zamiežnych ŚMI i inšaje. 

Na druhim etapie refarmavańnia prapanoŭvajecca ŭnieści źmianieńni ŭ dziejnaje zakanadaŭstva ŭ śfiery ŚMI, jakija dazvolać nablizić jaho da demakratyčnych standartaŭ. Naprykład, prapanoŭvajecca pierajści ad dazvolnaha da apaviaščalnaha paradku rehistracyi ŚMI; pazbavić Ministerstva infarmacyi kantrolnych funkcyj i paŭnamoctvaŭ pa prymianieńni sankcyj da ŚMI, internet-resursaŭ, vydaŭcoŭ, raspaŭsiudžvalnikaŭ pradukcyi ŚMI; pryvieści ŭ adpaviednaść ź mižnarodnymi abaviazacielstvami Biełarusi pieralik infarmacyi, raspaŭsiudžvańnie jakoj u ŚMI zabaroniena ci abmiežavana. 

Na trecim etapie, adznačyŭ Bastuniec, treba refarmavać zakanadaŭstva ab ŚMI ŭ adpaviednaści z demakratyčnymi standartami, u pryvatnaści pryniać novy zakon ab ŚMI. Akramia taho, prapanoŭvajecca transfarmavać dziaržaŭnuju Biełteleradyjokampaniju ŭ Hramadskaje telebačańnie i pravieści raździaržaŭleńnie dziaržaŭnych ŚMI, vydaviecka-palihrafičnych mahutnaściaŭ i sistem raspaŭsiudžvańnia drukavanych ŚMI.

• 0
• 0
• 0
• 0
• 0
• 0
• 0
• 0