BDU ŭsio ž uvioŭ apłatu za pierazdačy ekzamienaŭ i zalikaŭ

U BDU pryniali rašeńnie ab apłacie paŭtornaj zdačy zalikaŭ i ekzamiena. Dakumient zaćvierdžany zahadam rektara Siarhieja Abłamiejki ad 12 listapada, paviedamlaje pres-słužba hałoŭnaj VNU krainy. 

Pałažeńnie «Ab arhanizacyi atestacyi asob, jakija nie zdali ekzamieny, zaliki, nie prajšli inšyja formy kantrolu vynikaŭ navučalnaj dziejnaści, praduhledžanyja vučebnymi płanami, i likvidacyi roźnicy ŭ vučebnych płanach u Biełaruskim dziaržaŭnym univiersitecie» vyznačaje paradak źbirańnia płaty za paŭtornaje prachodžańnie biahučaj i vynikovaj atestacyi, a taksama likvidacyi akademičnaj roźnicy. Dakumient nabyvaje moc 1 studzienia 2016 hoda. 

Jak adznačaje pres-słužba, pry ŭviadzieńni płaty za likvidacyju akademičnaj zavinavačanaści BDU zychodzić z normaŭ dziejnaha zakanadaŭstva Respubliki Biełarusi — Kodeksa ab adukacyi, a taksama praviłaŭ praviadzieńnia atestacyi studentaŭ, kursantaŭ, słuchačoŭ pry zasvajeńni źmiestu adukacyjnych prahram vyšejšaj adukacyi, zaćvierdžanych pastanovaj Minadukacyi. 

«U bazavy košt atrymańnia adukacyi, jak finansavanaj ź dziaržaŭnaha biudžetu, tak i za košt ułasnych srodkaŭ hramadzian, uvachodzić tolki adnarazovaja zdača zalikaŭ i ekzamienaŭ, — havorycca ŭ paviedamleńni. — U vypadku ŭźniknieńnia akademičnaj zavinavačanaści dziejnaje zakanadaŭstva tłumačyć takuju pierazdaču jak adukacyjnuju pasłuhu, što pavinna akazvacca pry ŭmovie pakryćcia jaje koštu». 

Pres-słužba źviartaje ŭvahu na toje, što «płata za paŭtornuju zdaču zalikaŭ i ekzamienaŭ užo daŭno ŭviedzienaja ŭ bolšaści biełaruskich VNU». «Z metaj pavyšeńnia navučalnaj dyscypliny, adkaznaści studentaŭ takoje pałažeńnie ŭviedzienaje i ŭ BDU. Zaraz studentam, jakija dapuścili akademičnuju zavinavačanaść, u tym liku ŭ vypadkach nieźjaŭleńnia biez uvažlivych pryčyn na ekzamien ci zalik, nieabchodna budzie apłacić paŭtornuju zdaču. Uniasieńnie płaty za paŭtornuju zdaču ekzamienaŭ i zalikaŭ stanie dadatkovym stymułam dla tych, chto nie nadaje naležnaj uvahi vučobie ŭ VNU», — ličać u administracyi BDU. 

Studenty arhanizavali zbor podpisaŭ pad zvarotam da Siarhieja Abłamiejki i ministra adukacyi Michaiła Žuraŭkova suprać uviadzieńnia płaty za pierazdaču zalikaŭ i ekzamienaŭ. Jany ličać, što stymułam da vučoby źjaŭlajecca nie ŭviadzieńnie płaty, a stypiendyja, jakaja moža pavialičvacca i panižacca ŭ zaležnaści ad paśpiachovaści. Pa stanie na 11 listapada pad zvarotam padpisalisia 2,5 tysiačy čałaviek.

• 0
• 0
• 0
• 0
• 0
• 0
• 0
• 0