200 demanstrantaŭ na čale sa Statkievičam prajšli šeściem pa praśpiekcie FOTY
Vynikovaje videa z akcyi źjavicca na sajcie paźniej.
18.10
Kala HUMa sabrałosia prykładna 200 čałaviek. Hramada rušyła ŭ bok płoščy Niezaležnaści. Siarod prysutnych, akramia Statkieviča — jaho žonka Maryna Adamovič, Uładzimir Niaklajeŭ, Anatol Labiedźka, Pavał Sieviaryniec, Pavieł Vinahradaŭ, Valer Ščukin.
18.20
U natoŭpie šmat moładzi, ale taksama i stałych ludziej. Nad im łunaje bieł-čyrvona-bieły ściah. Jašče adzin ściah pierad palitykami niasuć dvoje maładzionaŭ. Jak udałosia vyśvietlić, adnamu ź ich usiaho 17 hod, druhi — student 1 kursa. Jak zvyčajna, šmat supracoŭnikaŭ śpiecsłužbaŭ u cyvilnym, jakija staranna zdymajuć udzielnikaŭ na kamieru.
18.25
Natoŭp nabliziŭsia da budynka MUS, ale pastavić źnički na jaho prystupkach nie ŭdałosia — darohu pieraharadziła vialikaja budaŭničaja mašyna, vidać, śpiecyjalna padahnanaja, i mietaličnaja sietka, choć inšych prykmiet budaŭničych rabot na terytoryi nie było. «Voś jak jany pavažajuć svajho byłoha kiraŭnika», — vykazaŭsia Statkievič.
18.30
Mitynhoŭcy dajšli da płoščy Niezaležnaści. Padčas pramovy Statkievič i Niaklajeŭ nazvali vyniki refierendumu-1996 «dziaržaŭnym złačynstvam», padčas jakoha biełarusaŭ pazbavili spradviečnaha hierba i ściaha, a taksama «zabili» Kanstytucyju 1994 hoda, dziakujučy čamu Łukašenka atrymaŭ prava na pažyćciovaje kiravańnie. «My tut tamu, što ŭsio heta pamiatajem. Złačyncaŭ čakaje spraviadlivy adkaz», — padkreślili palityki.
18.40
Na prystupkach CVK — kala 80 źničak, partrety źnikłych Viktara Hančara i Juryja Zacharanki. Na pytańnie karespandenta NN, ci zastalisia, na jaho dumku, u MUS i CVK sapraŭdnyja patryjoty Biełarusi, Mikoła Statkievič adkazaŭ, što naŭrad ci, bo tudy ciapier iduć tolki chałui, na jakich užo jość tony kampramatu.
18.45
Statkievič padziakavaŭ usim prysutnym, ale padkreśliŭ, što «my nie raźvitvajemsia nadoŭha». «My ničoha nie baimsia», — zajaviŭ jon.
18.50
Na płoščy źjavilisia milicyjanty, pačali składać pratakoły «za ŭdzieł u niesankcyjanavanym mierapryjemstvie». Padobna, što jany adpracoŭvajuć novuju taktyku: palitykaŭ nie čapajuć, a padychodziać da prostych ŭdzielnikaŭ akcyi, kab zapužać ich. Pabačyŭšy heta, Statkievič hučna źviarnuŭsia da prysutnych i prapanavaŭ usim, na kaho siońnia składzienyja pratakoły, vyjści na jaho ŭ fejsbuku. «My źviažamsia z advakatami, nikoha nie pakiniem biez dapamohi», — zajaviŭ jon.
Supracoŭniki milicyi zapatrabavali dakumienty ŭ žurnalista «Al-Džaziry» Brendana Chofmana, ale, pabačyŭšy, što jon maje akredytacyju (i nie vielmi razumieje, što ad jaho chočuć), pieraklučylisia na jaho pierakładčyka – žurnalista haziety «Novy čas» Źmitra Hałko. Na jaho taksama byŭ składzieny pratakoł. Pad «razdaču» pratakołaŭ trapili i naziralniki Biełaruskaha Chielsinkskaha kamiteta Siarhiej Kaśpiarovič i Natalla Sacunkievič — niahledziačy na toje, što milicyi rastłumačyli: jany — akredytavanyja na akcyju naziralniki. Varta adznačyć, što na ŭsich naziralnikach ad pravaabarončych arhanizacyj byli apranutyja prykmietnyja sinija kamizelki z bejdžami.
Jak paviedamlaje BiełaPAN, pratakoły taksama składzienyja na:
— Mikałaja Statkieviča i Uładzimira Niaklajeva, a taksama hramadskich aktyvistaŭ Maksima Viniarskaha i Alesia Makajeva na padstavie artykuła 23.34 KoAP (parušeńnie paradku arhanizacyi abo praviadzieńnia masavych mierapryjemstvaŭ), adnak usie jany admovilisia ich padpisvać.
— mahilaŭčanina Stanisłava Paŭlankoviča — adnaho z udzielnikaŭ akcyi, jakija nieśli bieł-čyrvona-biełyja ściahi z vyjavaj hierba «Pahonia». Pry hetym małady čałaviek źviarnuŭ uvahu prysutnych na niadaŭniuju zajavu kiraŭnika MUS Ihara Šunieviča ab tym, što hetaja simvolika nie ź`iaŭlajecca zabaronienaj.
— Antona Žyłko i Andreja Davidoviča, jakija taksama nieśli bieł-čyrvona-biełyja ściahi.
— žurnalistku «Radyjo Svaboda» Halinu Abakunčyk.
***
Eks-palitviazień, kandydat na vybarach 2010 hoda Mikałaj Statkievič zaklikaŭ ludziej sabracca siońnia a 18-j kala HUMa. Pra heta jon paviedamiŭ u svaim fejsbuku.
Akcyja budzie pryśviečanaja 19-m uhodkam refierendumu-1996.
«24 listapada 1996 hoda u Biełarusi adbyŭsia refierendum. Asnoŭnyja pytanni refierendumu byli pryznanyja Kanstytucyjnym sudom tolki kansultatyŭnymi, pra što śviedčyli adpaviednyja zapisy na kožnym biuleteni. Refierendum prajšoŭ sa šmatlikimi parušeńniami», — napisaŭ jon.
Taksama jon prapanuje ŭšanavać źnikłych biełaruskich hramadskich dziejačaŭ.
Ciapier čytajuć
«Ja jašče moh sumniavacca ŭ sabie. Ale kali Maša takoje zrabiła!» Nieviadomyja fakty pra Viktara Babaryku raskazała jaho advakatka Natalla Mackievič77
Kamientary