U sieradu troje napadnikaŭ adkryli stralbu ŭ kalifarnijskim horadzie San-Biernardyna (na ŭschod ad Łos-Andželesa), u vyniku čaho, pavodle papiarednich dadzienych, zahinuli 14 čałaviek i jašče 17 atrymali ranieńni, usie jany dastaŭleny ŭ balnicy.
Pieršapačatkova napadnikam udałosia źbiehčy, adnak palicyja pačała ich pieraśled, u vyniku jakoha dvoje padazravanych u napadzie byli zastreleny — heta mužčyna i žančyna. Adzin palicejski pry hetym byŭ paranieny.
Adnaho z napadnikaŭ zvali Said Faruk, druhi padazravany — jaho brat. Imia zastrelenaj žančyny pakul nieviadomaje.
U aŭtamabili, na jakim pieramiaščalisia padazravanyja, byli vybuchovyja pryłady. Sapiory ačyścili mašynu ad ich.
Pradmiet, padobny na vybuchovuju pryładu, palicejskija taksama vyjavili ŭ samym centry dla ludziej z abmiežavanymi mahčymaściami, dzie i adbyłasia stralba. Ź im pracavali sapiory.
Matyvy napadu pakul nieviadomyja
Jak raźvivalisia padziei
Stralba adbyłasia ŭ budynku, dzie znachodzicca niaŭradavaja arhanizacyja Inland Regional Center. Jana zajmajecca dapamohaj ludziam z adchileńniami ŭ raźvićci.
Troje čałaviek u formie, jakaja nahadvała vajskovuju, u broniekamizelkach i z aŭtamatyčnaj zbrojaj adkryli ahoń pa ludziach, jakija znachodzilisia ŭ budynku.
Jak zajaviła prezident niaŭradavaj arhanizacyi Inland Regional Center Mejbiet Fiłd, napad adbyŭsia ŭ kanfierenc-zale, dzie prachodziła śviatočnaje mierapryjemstva, ładžanaje departamientam hramadskaha achovy zdaroŭja San-Biernardyna.
Kali ŭ budynku pačałasia stralba, mnohija ludzi zamknulisia ŭ svaich ofisach.
Tery Pietyt, dačka jakoha znachodziłasia ŭ budynku ŭ momant napadu, pakazaŭ žurnalistam jaje sms: «Jość zabityja. My ŭ ofisie čakajem palicyju. Maliciesia za nas. Ja zamknułasia ŭ pakoi».
Markas Ahilera sa słoŭ svajoj žonki paviedamiŭ miascovamu telekanału ABC News, što napadniki prajšli ŭ budynak praz ŭvachod, pobač ź jakim raźmieščany jaje ofis.
«Jany ŭbačyli cieła na padłozie i zamknulisia ŭ pakoi», - raspavioŭ Ahilera. Na ščaście, jaho žonka nie paciarpieła.
Napadniki
Napadniki zmahli pakinuć budynak paśla stralby i źjechali na čornym usiedarožniku.
Palicyja pačała ich pieraśled i paźniej paviedamiła, što adzin z padazravanych byŭ zastreleny, paśla taho jak akazaŭ supraciŭ pry sprobie zatrymańnia.
Prykładna praz hadzinu načalnik miascovaj palicyi Džeroda Burhuan zajaviŭ, što zastrelenyja dvoje. Było abvieščana, što heta mužčyna i žančyna. Palicyja prasiła ŭsich miascovych žycharoŭ pakul nie pakidać damy, bo palicejskaja apieracyja praciahvajecca.
Šef palicyi padkreśliŭ taksama, što pa jaho dadzienych siarod achviar nie było dziaciej, i što «złačyncy staranna spłanavali napad».
Da rasśledavańnia padklučyłasia FBR. Śpiecyjalisty biuro nie vyklučajuć, što zdareńnie było teraktam, pry hetym miascovyja palicejskija miarkujuć, što heta moh być damašni teraryzm.
Adnak vydańni Los Angeles Times i New York Times sa spasyłkaj na svaje krynicy ŭ pravaachoŭnych orhanach paviedamili, što napadniki byli znajomyja z tymi, chto znachodziŭsia ŭ budynku.
Reakcyja Baraka Abamy
Prezident ZŠA Barak Abama, jaki daŭno vystupaje za abmiežavańnie prodažu aŭtamatyčnaj i šturmavoj zbroi, chutka adreahavaŭ na zdareńnie ŭ San-Biernardyna.
«Zrazumieła, što ŭ hetaj krainie adbyvajucca takija masavyja zabojstvy z užyvańniem ahniastrelnaj zbroi, jakich niama nidzie ŭ śviecie, — zajaviŭ jon. — I jość kroki, jakija my možam zrabić, kab kali i nie paźbiehnuć całkam takich incydentaŭ, dyk, prynamsi, zrabić ich nie takimi častymi».
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»27
Kamientary