Pradstaŭniki biełaruskaj intelihiencyi vystupili sa zvarotam, u jakim zaklikajuć demakratyčnuju apazicyju da kansalidacyi.
«Sioletniaja palityčnaja kampanija pa vybarach prezidenta Respubliki Biełaruś u čarhovy raz zaśviedčyła daŭniuju chibu biełaruskaj demakratyčnaj apazicyi: niazdolnaść ab`iadnoŭvacca, damaŭlacca ab supolnych dziejańniach, vystupać adzinaj siłaj. Apazicyja nie zmahła vypracavać i pryniać sumiesnuju prahramu, vyłučyć adzinaha kandydata ŭ prezidenty. U vyniku vybary prajšli pa scenary ŭłady i pryviali apazicyju da kryzisnaha stanu», — havorycca ŭ zvarocie.
Jak adznačajuć jaho aŭtary, zamiest taho, kab analizavać pamyłki i rabić ź ich vysnovy, pradstaŭniki apazicyi — i tyja, chto ŭdzielničaŭ u vybarach, i tyja, chto ich bajkatavaŭ, — «davodziać svaju pravatu, pahłyblajuć raskoł».
«Častka apazicyi ŭžo zajaŭlaje pra hatoŭnaść udzielničać u nastupnaj palityčnaj kampanii: parłamienckich vybarach. Pryčym zajaŭlaje heta pry vybarčym zakonie, jaki demakratyčnych, svabodnych vybaraŭ nie praduhledžvaje», — padkreślivajecca ŭ adoźvie.
«My nie zaklikajem ni da ŭdziełu ŭ parłamienckich vybarach, ni da niaŭdziełu. My zaklikajem da kansalidacyi, da supolnaj pazicyi jak u adnosinach da vybaraŭ, hetak i ŭ adnosinach da tych palityčnych pracesaŭ, jakija akreślilisia apošnim časam u stasunkach pamiž Biełaruśsiu i Jeŭraźviazam, demakratyčnym Zachadam. Pracesy hetyja vyklučna važnyja, jany naŭprost upłyvajuć na budučyniu krainy — i padychody da ich musiać być dakładna vyznačanymi, całkam zrazumiełymi našamu hramadstvu», — upeŭnienyja pradstaŭniki intelihiencyi.
Na ich dumku, placoŭkaj dla vypracoŭki supolnaj pazicyi i trybunaj dla zajavy pra jaje moža stać kanhres demakratyčnych sił, mahčymaści jakoha nie byli skarystanyja pierad prezidenckimi vybarami. «My zaklikajem skarystać ich pierad vybarami parłamienckimi», — havorycca ŭ dakumiencie.
«Tolki sumiesny płan dziejańniaŭ, zamacavany abaviazkovymi dla ŭsich rašeńniami kanhresa, moža vypravić situacyju: vyvieści apazicyju z kryzisu, viarnuć joj palityčnuju vahu, davier unutry krainy i za jaje miežami. Heta ciažka, ale jašče možna zrabić, kali pastavić intaresy Biełarusi vyšej za intaresy partyj, ruchaŭ, za asabistyja intaresy», — zaznačajuć aŭtary zvarotu.
Jany aklikajuć usich lidaraŭ i aktyvistaŭ biełaruskaj demakratyčnaj apazicyi «vyjavić palityčnuju adkaznaść, sklikać kanhres z šyrokim udziełam hramadzianskaj supolnaści i pryniać rašeńni, skiravanyja na ŭmacavańnie niezaležnaści našaj dziaržavy». «Heta treba zrabić nie tolki dziela kansalidacyi apazicyi — dziela nacyjanalnaj zhody. Bo pry toj niazhodzie, jakaja jość siońnia ŭ našym biełaruskim domie, my nie tolki nie dojdziem da Biełarusi, pra jakuju marym, a možam stracić navat tuju, jakuju majem», — padkreślivajuć pradstaŭniki intelihiencyi.
Zvarot padpisali viadomyja kulturnyja i hramadskija dziejačy Uładzimir Arłoŭ, Lavon Barščeŭski, Zinaida Bandarenka, Anatol Viarcinski, Radzim Harecki, Nił Hilevič, Viktar Kaźko, Alaksiej Maračkin, Hienadź Fiadynič.
Kamientary