U Breście znajšli cieła žančyny, jak miarkujecca, źnikłaj miesiac tamu nastaŭnicy hieahrafii
29 studzienia dniom u milicyju pastupiła paviedamleńnie, što na Varšaŭskaj šašy la bieraha Muchaŭca vyjavili frahmienty palcaŭ ruk.
Pareštki vyjaviŭ minak, jaki vyhulvaŭ u tym miescy sabaku. Śledča-apieratyŭnaja hrupa sumiesna z vajskoŭcami padčas pošukaŭ vyjaviła cieła žančyny. Jano znachodziłasia ŭ zamierzłaj vadzie na nizinnym učastku miascovaści, pakrytym hustoj raślinnaściu.
Bačnych prykmiet śmierci kryminalnaha charaktaru na ciele žančyny nie vyjaŭlena. Pa papiarednich dadzienych, adzieńnie na joj supadaje pa apisańni sa źnikłaj 22 śniežnia 2015 38-hadovaj nastaŭnicaj siaredniaj škoły №9. Adnak jakija-niebudź vysnovy datyčna asoby zahinułaj pakul rabić rana.
«Dla vyśviatleńnia dakładnaj pryčyny śmierci žančyny i identyfikacyi jaje asoby pryznačany šerah ekśpiertnych daśledavańniaŭ», — paviedamili ŭ abłasnym upraŭleńni Śledčaha kamiteta.
Nahadajem, Valancina Hołub 22 śniežnia, kala 14.00, syšła z raboty dadomu, ale dachaty tak i nie źjaviłasia. Na suviaź z rodnymi i blizkimi nie vychodziła. 23 śniežnia, u 21.00, muž źnikłaj žančyny źviarnuŭsia ŭ milicyju. Paźniej źjaviłasia infarmacyja ab tym, što sa škoły jana pajšła na vulicu Lenina. Na skryžavańni z vulicaj Hohala žančyna sprabavała spynić jaki-niebudź aŭtamabil.
Kamientary