Partyja BNF pryniała rašeńnie pakul nie ŭvachodzić u arhkamitet pa praviadzieńni Kanhresa demakratyčnych sił
Partyja BNF pryniała rašeńnie pakul nie ŭvachodzić u arhkamitet pa praviadzieńni kanhresa demakratyčnych sił. Adpaviednaje rašeńnie pryniali členy sojma arhanizacyi na pasiadžeńni 30 studzienia ŭ Minsku. Akramia taho, u papiaredni śpis kandydataŭ u deputaty na parłamienckich vybarach ad Partyi BNF uklučana 55 čałaviek (staršynia partyi Alaksiej Janukievič skazaŭ, što hety śpis nie kančatkovy i ŭ im mohuć źjavicca novyja imiony).
«Na siońnia ŭ členaŭ sojma isnujuć aściarohi nakont jasnaści idejnaha źmiestu kanhresa, a taksama taho, što zajaŭlenyja mety mohuć być dasiahnuty ŭ farmacie, u jakim płanujecca jaho praviadzieńnie», — rastłumačyŭ BiełaPAN rašeńnie sojma staršynia Partyi BNF Alaksiej Janukievič.
Nahadajem, praviadzieńnie kanhresa demsił z metaj kansalidacyi apazicyi inicyjavała 17 śniežnia hrupa viadomych hramadskich dziejačaŭ Biełarusi. Na nastupny dzień Mikałaj Statkievič, Uładzimir Niaklajeŭ i Stanisłaŭ Šuškievič abviaścili ab stvareńni arhkamiteta pa padrychtoŭcy kanhresa. Zaraz aproč nazvanych palitykaŭ u skład arhkamiteta ŭvachodziać Dźmitryj Daškievič, Viačasłaŭ Siŭčyk, Andrej Sańnikaŭ, Hienadź Fiadynič i Michaił Pastuchoŭ.
Janukievič adznačyŭ, što partyja vitaje samu inicyjatyvu pradstaŭnikoŭ biełaruskaj intelihiencyi, nakiravanuju na kansalidacyju demakratyčnych sił.
Adnak, adznačyŭ jon, na dumku Partyi BNF, pieršačarhovaj zadačaj pavinna stać «farmiravańnie jasnaj idejnaj płatformy, na asnovie jakoj takaja kansalidacyja adbyvajecca». «U jakaści takoj asnovy my bačym vilenski miemarandum Rady BNR», — padkreśliŭ palityk.
Miemarandum apazicyi «Ab mierach pa zabieśpiačeńni niezaležnaści Biełarusi» byŭ pryniaty ŭ Vilni 3 listapada na sustrečy lidaraŭ apazicyjnych partyj i NDA sa staršynioj Rady BNR Ivonkaj Surviłaj. Na siońnia dakumient padpisali pradstaŭniki 14 apazicyjnych partyj i arhanizacyj. Sutnaść miemaranduma zaklučajecca ŭ kaardynacyi dziejnaści ŭsich apazicyjnych palityčnych i hramadskich struktur unutry Biełarusi i za miažoj z metaj vyzvaleńnia i reabilitacyi palitviaźniaŭ, spynieńnia palityčnych represij u krainie, zabieśpiačeńnia svabody ŚMI, «demantažu represiŭnaha aparatu» i, jak vynik, «praviadzieńnia svabodnych vybaraŭ».
Sojm Partyi BNF daručyŭ kiraŭnictvu arhanizacyi ŭ najbližejšy čas na asnovie miemaranduma raspracavać prajekt płatformy i pačać kansultacyi z arhkamitetam, kab jaho pałažeńni byli pakładzieny ŭ asnovu paradku dnia mierapryjemstva.
«Kali budzie rašeńnie arhkamiteta, što hetyja pryncypy mohuć być klučavymi, to na nastupnym pasiadžeńni sojma my možam razhledzieć pytańnie, kab delehavać svajho pradstaŭnika ŭ arhkamitet i dałučycca da jaho pracy. Kali nie, to my hatovyja budziem prapanavać niejkija inšyja farmaty, naprykład, kanhres biełaruskich nacyjanalistaŭ abo narodny schod, udzielniki jakoha pavinny buduć pradekłaravać ćviorduju padtrymku hetym kaštoŭnaściam», — skazaŭ Janukievič.
Pry hetym palityk padkreśliŭ, što heta nie budzie jašče adzin kanhres. «My ŭ pryncypie hatovyja šukać roznyja mahčymyja formy kansalidacyi na padmurku abarony niezaležnaści. Na siońnia ja ŭdziačny, što Mikałaj Statkievič i Uładzimir Niaklajeŭ znajšli mahčymaść pryjści i vystupić na sojmie. Jany taksama kazali, što prapanova kanhresa — heta adna z mahčymych formaŭ kansalidacyi apazicyi. I kali buduć prapanovy z boku Partyi BNF, jany hatovyja ich razhledzieć. Tamu my šukajem šlachi, jak bolš efiektyŭna dasiahnuć kansalidacyi pa klučavych pytańniach abarony niezaležnaści», — skazaŭ Janukievič.
Kamientary