Paśla taho jak stała viadomaje imia nobieleŭskaha łaŭreata pa litaratury za 2015 hod, maskoŭskaje vydaviectva «Čas» raspradało ŭvieś svoj nakład knih Śviatłany Aleksijevič za sutki, paviedamiŭ mieniedžar vydaviectva Dźmitryj Hasin 10 lutaha ŭ Minsku.
Vydaviectva «Čas» udzielničaje ŭ XXIII Minskaj mižnarodnaj knižnaj vystavie-kirmašy, što prachodzić 10—14 lutaha ŭ vystavačnym centry na praśpiekcie Pieramožcaŭ. Niahledziačy na toje što kampanija prezientuje knihi pieršaha biełaruskaha nobieleŭskaha łaŭreata pa litaratury, stend vydaviectva zajmaje maleńkuju płošču nie ŭ centry ekspazicyi.
Na pytańnie, čamu samoj Aleksijevič niama na vystavie, Hasin adkazaŭ, što hetaje «pytańnie nie da maskoŭskaha vydaviectva, jakoje samo źjaŭlajecca ŭ Minsku hościem». Jon zapeŭniŭ, što kali Aleksijevič zaprosiać na takoje mierapryjemstva ŭ Minsk ci luby inšy horad, vydaviectva «Čas» «budzie imknucca zrabić tak, kab jaje knihi tam byli».
Mieniedžar kampanii padkreśliŭ: prysudžeńnie samaj hanarovaj premii śvietu biełaruskaj piśmieńnicy stała dla ich vydaviectva «padziejaj, jakaja byvaje raz u žyćci». «Nobieleŭskaja premija — heta vielizarnaja trybuna dla piśmieńnika i ŭsioj nacyjanalnaj kultury, u hetym vypadku — dla ŭsioj ruskamoŭnaj kultury. Nu i dla Biełarusi, viadoma, taksama», — dadaŭ jon.
«Aleksijevič na praciahu niekalkich hadoŭ była adnoj z hałoŭnych pretendentaŭ na premiju, na jaje stavili bukmiekiery, usie, chto źviazanyja z premijaj, byli ŭ pastajannym čakańni, — nahadaŭ Hasin. — Kali premiju, narešcie, prysudzili, i pra heta było abvieščana, prodaž padskočyŭ tak, što ŭvieś naš nakład byŭ raspradadzieny za sutki. My zaraz pastajanna dadrukoŭvajem nakłady i ličym, što heta vielmi dobra. Kožnaja z knih Aleksijevič — na vielmi važnuju temu. Jaje knihi pierakładzienyja na 30 moŭ, tamu, viadoma ž, my chočam, kab u Rasii jaje viedali i čytali».
Kamientary