Uradžencu Mačuliščaŭ pažyćciovaje źniavoleńnie zamianili na rasstreł
15 lutaha Minski abłasny sud pryhavaryŭ da rasstrełu 31-hadovaha ŭradženca vioski Mačuliščy Minskaha rajona Siarhieja Chmialeŭskaha. Mužčyna ździejśniŭ žorstkaje zabojstva dźviuch i bolš asob.
Raniej abvinavačany byŭ nieadnarazova sudzimy - za kradziež, rabavańnie, razboj, chulihanstva, naŭmysnaje pryčynieńnie mienš ciažkaha paškodžańnia, uciahvańnie niepaŭnaletniaha ŭ ździajśnieńnie złačynstva i ŭchileńnie ad adbyćcia pakarańnia ŭ vyhladzie abmiežavańnia voli. (Č.2 art. 205 KK - 1999 hod; č. 2 art. 205 KK -2000 hod; č.2 art. 339 KK — 2001 hod; č.2 art.149 KK, č.3 art. 207 KK, č. 1 art. 172 KK — 2003 hod; č.2 art. 206 KK, č. 3 art. 339 KK, art. 415 KK — 2010 hod).
Pa apošniaj kryminalnaj spravie jamu było pradjaŭlenaje abvinavačvańnie ŭ zabojstvie dźviuch i bolš asob, učynienym z asablivaj žorstkaściu z metaj schavać inšaje złačynstva ci ablehčyć jaho ździajśnieńnie. A taksama ŭ kradziažy, zamachu na naŭmysnaje źniščeńnie abo paškodžańnie majomaści, niezachavańni patrabavańniaŭ previentyŭnaha nahladu.
Jak piša Tut.by, kryminalnaja sprava była raspačataja ŭ listapadzie 2014 hoda, paśla taho jak u Minskim rajonie pry tušeńni pažaru ŭ pryvatnym domie supracoŭniki MNS znajšli abharełyja cieły 49-hadovaha miascovaha žychara i jaho 48-hadovaj sužycielki. Na ciełach zahinułych byli vyjaŭlenyja šmatlikija kołata-rezanyja rany šyi i hałavy. Śledčyja pryjšli da vysnovy, što padpał doma byŭ ažyćcioŭleny z metaj utojvańnia śladoŭ złačynstva.
Pakidajučy miesca złačynstva, abvinavačany ŭ dvary doma zabitych sustreŭ 57-hadovaha adnaviaskoŭca. Žadajučy pazbavicca ad śviedki, sapchnuŭ jaho ŭ bietonnuju jamu hłybinioj dva mietry. U vyniku padzieńnia paciarpiełamu byli pryčynieny šmatlikija ciažkija cialesnyja paškodžańni, ad jakich praź niekalki tydniaŭ jon pamior u balnicy.
Heta druhi śmiarotny prysud vyniesieny ŭ Biełarusi ŭ 2016 hodzie. Nahadajem, prysudam Minskaha abłasnoha suda ad 5 studzienia 2016 hoda Hienadź Jakavicki, nieadnarazova sudzimy, pryznany vinavatym u zabojstvie, učynienym z asablivaj žorstkaściu.
Kamientary