Paryk, hrym i rybackaja łodka: jak nobieleŭskaja łaŭreatka tajemna źbiehła ź Vieniesueły ŭ Osła

Padrabiaznaści dramatyčnaj evakuacyi lidarki vieniesuelskaj apazicyi Maryi Karyny Mačada raskryvaje vydańnie The Wall Street Journal.

Ucioki rychtavalisia vieniesuelskaj padpolnaj sietkaj na praciahu dvuch miesiacaŭ. Mačada na toj momant užo hod chavałasia ŭ pryharadzie Karakasa. U paniadziełak, 8 śniežnia, dniom jana pačała svoj šlach. Kab vybracca sa schovišča, palityk apranuła paryk i vykarystała składanuju maskiroŭku.

Pieršy etap evakuacyi zaniaŭ 10 hadzin i byŭ nadzvyčaj napružanym. Pavodle infarmacyi krynic vydańnia, Mačada razam z dvuma pamočnikami jechała da ŭźbiarežža na poŭnačy krainy, i na hetym šlachu im daviałosia minuć 10 vajskovych kantrolna-prapusknych punktaŭ.

Maskiroŭka spracavała: ni na adnym z kardonaŭ vajskoŭcy nie paznali palityka, i joj udałosia paźbiehnuć zatrymańnia. Da prybiarežnaj rybackaj vioski jany dabralisia tolki bližej da poŭnačy, dzie Mačada zmahła krychu adpačyć.

Zvanok amierykancam

Hrupa arhanizataraŭ paviedamiła žurnalistam, što pierad vychadam u mora zrabiła važny zvanok vajskoŭcam ZŠA. Jany papiaredzili amierykanskija siły ŭ rehijonie pra toje, chto znachodzicca na sudnie, kab paźbiehnuć avijaŭdaru, padobnaha da tych, što za apošnija try miesiacy źniščyli bolš za 20 anałahičnych łodak i zabrali žyćci bolš čym 80 čałaviek.

«My ŭzhadnili, što jana vyjdzie praz peŭnuju zonu, kab jany nie padarvali łodku», — cytuje WSJ čałavieka, blizkaha da apieracyi.

U 5 hadzin ranicy ŭ aŭtorak, 9 studzienia, Mačada i jaje spadarožniki sieli ŭ typovuju draŭlanuju rybackuju łodku i nakiravalisia ŭ adkrytaje Karybskaje mora ŭ bok vostrava Kiurasaa. Vydańnie adznačaje, što ŭmovy byli ciažkimi: mocny viecier i chvali zapavolvali ruch.

Pavodle ludziej, znajomych ź situacyjaj, administracyja Trampa viedała pra apieracyju, choć stupień jaje ŭdziełu zastajecca niavyznačanaj (aficyjnyja asoby navat abvierhli fakt pramoha kantaktu).

Tym nie mienš, jak śviedčać danyja adsočvańnia palotaŭ, prykładna ŭ čas pierapravy dva źniščalniki F-18 VMS ZŠA ŭvajšli ŭ pavietranuju prastoru Vieniesuelskaha zaliva. Jany kala 40 chvilin kružyli pablizu maršrutu łodki, zabiaśpiečvajučy niajaŭnaje prykryćcio. Heta stała samym blizkim nabližeńniem amierykanskaj avijacyi da Vieniesueły ź vieraśnia.

Pavialičyć

Kiurasaa i šlach u Jeŭropu

Kala 15:00 u aŭtorak Mačada prybyła na Kiurasaa. Tam jaje sustreŭ pryvatny padradčyk, jaki śpiecyjalizujecca na evakuacyi (pa danych krynic haziety, jon byŭ pradstaŭleny administracyjaj ZŠA). Źniasilenaja doŭhim padarožžam, apazicyjanierka zasialiłasia ŭ hatel i praviała tam noč.

U sieradu, 10 śniežnia, kali na Kiurasaa ŭzychodziła sonca, a ŭ Osła pačali źbiracca hości, biznes-džet, pradstaŭleny paplečnikam z Majami, vylecieŭ z vostrava i nakiravaŭsia ŭ narviežskuju stalicu, zrabiŭšy prypynak u Banhory (štat Men) Pierad pasadkaj na bort Mačada zapisała aŭdyjapaviedamleńnie, u jakim padziakavała ludziam, jakija «ryzykavali svaimi žyćciami», kab jana mahła źbiehčy.

Sakretnaść zachoŭvałasia da apošniaha: Nobieleŭski kamitet pačaŭ cyrymoniju, nie viedajučy, dzie znachodzicca łaŭreatka. Uznaharodu ad jaje imia pryniała dačka. Adnak uviečary ŭ sieradu Mačada ŭsio ž pryziamliłasia ŭ Osła. Jana adrazu nakiravałasia ŭ Hrand-hatel, dzie vyjšła na bałkon da prychilnikaŭ pad kryki «Valiente» («Advažnaja»).

Pavialičyć

«Ja ŭsio jašče sprabuju pavieryć, što ja narešcie tut», — pryvodzić WSJ jaje słovy.

U hety čas u Karakasie vice-prezident Dełsi Radryhies nazvała ŭcioki «tannym šou», jakoje pravaliłasia, a hienieralny prakuror paabiacaŭ ličyć Mačada źbiehłaj złačynkaj.

Zaraz, jak piša WSJ, Mačada płanuje adpačyć niekalki dzion, bo doŭhi čas znachodziłasia ŭ izalacyi i drenna charčavałasia. Paśla hetaha jana maje namier ździejśnić turne pa Jeŭropie i ZŠA. Niahledziačy na pahrozy aryštu, jana abiacaje viarnucca ŭ Vieniesuełu, jak rabiła heta raniej paśla sakretnych pajezdak u Kałumbiju.

• 5
• 0
• 4
• 0
• 0
• 0
• 0
• 0