Pravaabaronca Andrej Bandarenka, jaki znachodzicca ŭ mahiloŭskaj turmie, źmieščany ŭ adzinočnuju kamieru

Pravaabaronca Andrej Bandarenka, jaki adbyvaje pakarańnie ŭ mahiloŭskaj turmie, źmieščany ŭ adzinočnuju kamieru. Pra heta ŭ intervju «Radyjo Svaboda» paviedamiŭ jaho baćka Valeryj Bandarenka paśla niadaŭniaj sustrečy z synam.

«Učora bačyŭsia z Andrejem u turmie. Spatkańnie było karotkim, jak zaŭsiody, praz škło pahavaryli, pad kantrolem achoŭnikaŭ. Andrej raspavioŭ, što pieraviali jaho z kamiery, dzie było niekalki viaźniaŭ, u adzinočnuju. Skazali, nibyta za toje, što šmat piša listoŭ. Ale miarkuju, hałoŭnaja pryčyna ŭ tym, što jamu daviałosia šmat skarhaŭ składać ad imia inšych viaźniaŭ. Jak susiedzi pa kamierach daviedalisia, što ź imi siadzić viadomy pravaabaronca, to pasypalisia takija prośby. Andrej pra heta raspaviadaŭ», — skazaŭ Valeryj Bandarenka.

Jon taksama paviedamiŭ, što jaho syn faktyčna adrezany ad kantaktaŭ ź siabrami i adnadumcami na voli. Raniej pravaabaronca pisaŭ listy Michaiłu Pastuchovu, Hańnie Šapućka, Marynie Adamovič, ale ciapier ad ich listoŭ nie prychodzić i pra los svaich listoŭ jon taksama nie viedaje. Miarkuje, što ich prosta nie prapuskajuć.

Syn prasiŭ pieradać pravaabaroncam, kab damahalisia vyzvaleńnia Michaiła Žamčužnaha, jaho spravu jon nazvaŭ całkam sfalsifikavanaj, paviedamiŭ baćka Andreja Bandarenki.

«Pra siabie prasiŭ pieradać, što jaho pazbavili zakonnaha prava na amnistyju, i heta taksama jość pryčynaj dla patrabavańnia ličyć jahony pieraśled palityčna matyvavanym», — raskazaŭ baćka.

Pavodle słoŭ Valeryja Bandarenka, syn «vyhladaje narmalna, trymajecca ŭ źniavoleńni mužna».

Andrej Bandarenka — stvaralnik i kiraŭnik infarmacyjna-aśvietnickaj ustanovy «Płatforma» i kulturna-aśvietnickaj ustanovy «Płatform inavejšn», jakija zajmalisia abaronaj pravoŭ čałavieka ŭ miescach pazbaŭleńnia voli. 12 žniŭnia 2014 hoda sud pryznaŭ jaho vinavatym pa troch častkach artykuła 339 Kryminalnaha kodeksa (chulihanstva, złosnaje chulihanstva i asabliva złosnaje chulihanstva) i pryhavaryŭ da čatyroch hadoŭ pazbaŭleńnia voli ŭ kałonii ŭzmocnienaha režymu. Paźniej u suviazi z amnistyjaj termin byŭ skaročany da troch hadoŭ.

Viasnoj 2015 hoda padatkovyja orhany vystavili kiraŭnictvu «Płatform inaviejšn» pretenzii z nahody nieažyćciaŭleńnia haspadarčaj dziejnaści i niavypłaty padatkaŭ. U vyniku ŭ lipieni ŭstanova była likvidavanaja jak «subjekt haspadarańnia, jaki nie prynosić dachod dziaržavie».

• 0
• 0
• 0
• 0
• 0
• 0
• 0
• 0