Latučy ŭniviersitet pry padtrymcy hramadskaj kulturnickaj kampanii «Budźma biełarusami» i kursaŭ biełaruskaj movy «Mova Nanova» zaprašaje na lekcyju, pryśviečanuju spadčynie Ihnata Abdzirałoviča.
28 lutaha ŭ Babrujsku žurnalist, litaratar, kulturny i hramadski dziejač Siarhiej Dubaviec pramaŭlaje na temu «Abdzirałovič. Mastactva mistyfikacyi». Lekcyja adbudziecca ŭ tajm-kłubie «1387» pa adrasie: Babrujsk, Savieckaja, 97-2. Pačatak a 15-aj. Uvachod volny!
Historyja źjaŭleńnia i isnavańnia ŭ biełaruskaj kultury hetaha tekstu mižvoli navodzić nas na dumku pra admysłovuju tajamničaść, jakaja ŭsiamu hetamu spadarožničaje. Ad samaha pačatku, zdavałasia b, los nie pradkazvaŭ ničoha dobraha – upieršyniu pabačyŭšy śviet u 1921 hodzie, ese «Adviečnym šlacham» Ihnata Abdzirałoviča doŭhi čas pralažała ŭ savieckich śpiecschovach. Ale štości nie dazvoliła tekstu zyści ŭ niabyt: u časy biełaruskaha adradžeńnia kanca 1980-ch ese drukuje samvydavieckaja «Supolnaść». Potym buduć druki ŭ aficyjnych časopisach, asobnaje vydańnie i niekalki pieravydańniaŭ. Kaniešnie, hety «šlach u kulturu» prachodziŭ chutčej biez šyrokaj padtrymki z boku dziaržavy, i ŭsio ž, nie tolki ŭ pryvatnych, ale i ŭ dziaržaŭnych vučelniach Abdzirałoviča pačynajuć uzhadvać jak pieršaha biełaruskaha fiłosafa pačatku XX stahodździa, a jahony tekst uklučajuć ŭ śpisy rekamiendavanaj litaratury dla fiłasofskich adździaleńniaŭ VNU. Usio heta mahło b paspryjać tamu, kab pryciahnuć uvahu daśledčykaŭ i padšturchnuć da napisańnia hruntoŭnych prac. Ale tekstu nakanavana było jašče błukać pa pieryfieryi fiłasofskaj, hramadskaj dumki. Krynicy ćvierdziać, što i dahetul jakoha-kolviek surjeznaha daśledavańnia fiłasofii Abdzirałoviča nie isnuje. Čamu?
U pradmovie da čaćviortaha vydańnia ese Abdzirałoviča Siarhiej Dubaviec kazaŭ, što hetaja kniha patrabuje «inšaj jakaści samaśviadomaści», a tamu dačakajecca svajho času i svajho ŭdumlivaha čytača i krytyka tolki ŭ XXI stahodździ. Pryčym z hadami aktualnaść tvora budzie tolki ŭzrastać – nastolki jon daskanały i ŭniviersalny.
I voś na kalendary – 2016 hod… Ci dačakałasia ese «Adviečnym šlacham» svajho času? Ci daśpieli biełarusy da asensavańnia siabie i svajoj budučyni skroź pryzmu pamyślenaha Ihnatam Abdzirałovičam? Ci nabyli hetuju «inšuju jakaść nacyjanalnaj samaśviadomaści»?
Videazapisy papiarednich lekcyj hetaha cykłu:
Minułaja budučynia Biełarusi: zapaviet Ihnata Abdzirałoviča. Lekcyja Paŭła Barkoŭskaha
Abdzirałovič i biełaruskaja tradycyja. Lekcyja Ihara Babkova
Tvoračy zrujnujem. Lekcyja Valancina Akudoviča
Nacyjatvorčaść jak svaboda duchu: Biełaruś Ihnata Abdzirałoviča. Lekcyja Iryny Dubianieckaj
Ihnat Abdzirałovič. Zapaviet lijučajsia formy. Lekcyja Michaiła Bajaryna
Za anonsami nastupnych padziej sačycie na sajcie Latučaha ŭniviersiteta.
Kamientary