Šumčanka: Minekanomiki adchiliła prapanovy IP ab administracyjnaj amnistyi i ŭviadzieńni mikrapartyj tavaru

Ministerstva ekanomiki adchiliła prapanovy indyvidualnych pradprymalnikaŭ ab administracyjnaj amnistyi i ŭviadzieńni mikrapartyj tavaru, paviedamiŭ staršynia RHA «Pierśpiektyva» Anatol Šumčanka, jaki ŭdzielničaŭ 9 sakavika ŭ čarhovym pasiadžeńni rabočaj hrupy pa prablemnych pytańniach indyvidualnych pradprymalnikaŭ.

Členy rabočaj hrupy raniej prapanoŭvali ŭvieści dla IP administracyjnuju amnistyju pa parušeńniach, źviazanych z techrehłamientam ab biaśpiecy pradukcyi lohkaj pramysłovaści, z 1 lipienia 2014 hoda pa 1 studzienia 2016 hoda — pakul nie nabyŭ moc ukaz № 222 ab pradprymalnickaj dziejnaści.

«Siońnia my pačuli kateharyčny adkaz z vusnaŭ namieśnika ministra ekanomiki Iryny Kaścievič — jany zrabili zapyty ŭ MPZ i Miniust i pryjšli da vysnovy, što administracyjnaja amnistyja ŭvodzicca nie budzie. Pytańnie zakryli», — zajaviŭ Šumčanka.

Taksama, pavodle jaho słoŭ, pakul nie vyrašanaje pytańnie z uviadzieńniem u zakanadaŭstva paniaćcia «mikrapartyja tavaru», jakoje b značna palehčyła IP dakumientaabarot. Z hetaj nahody rabočaja hrupa taksama čakaje pazicyi MPZ i Miniusta.

Akramia taho, na pasiadžeńni ŭ čarhovy raz abmiarkoŭvalisia pytańni ŭstanoŭki pradprymalnikami płaciežnych terminałaŭ. Lidar «Pierśpiektyvy» adznačyŭ, što pradstaŭniki Nacbanka prapanujuć vyzvalić ad abaviazkovaj ŭstanoŭki terminałaŭ IP ź miesiačnaj vyručkaj da 300 bazavych vieličyń z usich handlovych miescaŭ. Prapanova padtrymanaja Minhandlu i Minekanomiki. «Ale MPZ vystupaje suprać, na ich dumku, heta stvoryć niaroŭnyja ŭmovy dla dziejnaści ŭsich pradprymalnikaŭ», — zaznačyŭ Šumčanka.

«Namieśnik ministra ekanomiki Iryna Kaścievič siońnia skazała, što pry raspracoŭcy ŭkaza № 222 u dziaržavy nie było mety pavialičyć padatkovyja pastupleńni ad IP. Była adna meta — vyvieści ŭsich na prazrystyja ŭmovy pracy. A chto nie moža, chaj znojdzie sabie inšaje prymianieńnie», — skazaŭ kiraŭnik abjadnańnia.

Rabočaja hrupa stvoranaja zahadam ministra ekanomiki Uładzimira Zinoŭskaha 4 lutaha paśla nieadnarazovych prośbaŭ IP pačać dyjałoh pra ich prablemy. Hrupu ŭznačalili namieśnik ministra ekanomiki Iryna Kaścievič i namieśnik ministra handlu Iryna Narkievič. U hrupie bolš za 20 čałaviek, u tym liku kiraŭniki biźnies-sajuzaŭ i staršyni savietaŭ rynkaŭ z rehijonaŭ. Pasiadžeńni ŭ Minekanomiki prachodziać u zakrytym dla presy režymie.

Nastupnaje jaje pasiadžeńnie zapłanavanaje na 18 sakavika.

• 0
• 0
• 0
• 0
• 0
• 0
• 0
• 0