Homielskaja «Śviatłatechnika» vypraŭlaje rabočych na 2 miesiacy ŭ biezapłatny adpačynak

Homielskaje ŭnitarnaje pradpryjemstva «Śviatłatechnika», dzie pracuje 60 adsotkaŭ invalidaŭ pa zroku, na dva miesiacy vypraviła svaich rabočych u vymušany adpačynak.

Raniej płacili — ciapier pa nulach

«U minułym hodzie nam choć płacili dźvie traciny taryfu za padobnyja karotkija adpačynki. Ciapier dva miesiacy hulajem — i pa nulach», — apaviadaje adzin z pracaŭnikoŭ pradpryjemstva, jaki maje treciuju hrupu invalidnaści.

«Śviatłatechnika» vypuskaje roznyja śviacilniki dla arhanizacyjaŭ i ŭstanovaŭ, elektraščytavoje abstalavańnie, plastmasavyja siadzieńni dla spartovych dy inšych abjektaŭ, sadova-aharodny inventar. Siadzieńniami hetaha pradpryjemstva abstalavany nia tolki Homielski ladovy pałac, ale j Čyžoŭka-arena ŭ Miensku, stadyjon FK «BATE» ŭ Barysavie dy šmat što jašče.

«U raniejšyja hady, kali dazvalali finansy, my płacili rabočym dźvie traciny zarobku, — tłumačyŭ karespandentu BiełaPAN dyrektar pradpryjemstva «Śviatłatechnika» Siarhiej Ramaniuk. — Ciapier takoj mahčymaści nia majem. Ja prasiŭ kalektyŭ zrazumieć sytuacyju, pajści nasustrač i pahadzicca na dvuchmiesiačny pierapynak biez apłaty — u sakaviku j krasaviku. Spadziajomsia vyjhrać tender na asnaščeńnie nacyjanalnaha futbolnaha stadyjona ŭ Miensku i ŭ traŭni adnavić pracu».

Dyrektar dadaje, što adpačynak na dva miesiacy nie tatalny. Kali zakazy pastupajuć, to pavodle admysłovych rasparadžeńniaŭ patrebnyja specyjalisty vychodziać na pracu — u Homieli i ŭ Mazyrskaj filii «Śviatłatechniki». Ciapier, u pryvatnaści, pracuje ŭčastak sartavańnia metyzaŭ dla Rečyckaha zavodu, dzie zaniatyja pieravažna invalidy pa zroku. Častka rabočych vyjšli na ŭčastak vyrabu sadova-aharodnaha inventaru.

«Skažu adkryta, što mianie ŭ hetaj sytuacyi bolš turbujuć nie invalidy, a zdarovyja čalcy kalektyvu. Invalidy atrymlivajuć choć jakuju dapamohu ad dziaržavy z pryčyny svajho fizyčnaha stanu zdaroŭja. Usie ž astatnija takoj padtrymki nia majuć — a heta bolš jak paŭtary sotni čałaviek», — kaža dyrektar.

Śviatłodyjody zaćmili «Śviatłatechniku»

Finansavyja ciažkaści ŭ pradpryjemstva pačalisia, kali asnoŭny spažyviec raznastajnych śviacilnikaŭ, susiedniaja Rasieja, staŭ admaŭlacca ad homielskaj pradukcyi. Da taho ž rasiejski rynak staŭ zapaŭniacca enerhaźbierahalnymi śviatłodyjodnymi śviacilnikami, ź jakimi «Śviatłatechnika» kankuravać nia moža.

Raniejšyja kiraŭniki pradpryjemstva, kab utrymacca na pavierchni, brali kredyty i vypuskali pradukcyju, jakaja nie zaŭsiody była zapatrabavanaja na rynku. Novamu kiraŭnictvu dastałasia 11-miljardnaja zapazyčanaść pradpryjemstva pa bankaŭskich kredytach, jakuju za apošnija dva hady ŭdałosia skaracić da 6 miljardaŭ.

Razhruzicca častkova ad zapasaŭ dapamahli «Śviatłatechnicy» miascovyja ŭłady, metava zakupiŭšy śviacilnikaŭ dla arhanizacyjaŭ i ŭstanovaŭ rehijonu na 5,6 młrd rubloŭ. Kala paŭmiljarda rubloŭ sprabuje viarnuć pradpryjemstva za pastaŭlenuju pradukcyju praz pazovy ŭ ekanamičny sud

«Niejkaja «zorka» jašče śviecić nad pradpryjemstvam, — ličyć Siarhiej Ramaniuk. — U inšym vypadku my b mahli zakrycca jašče letaś, a to j raniej. Pakolki na pradpryjemstvie z čatyrochsot pracaŭnikoŭ balšyniu składajuć invalidy, to było b pravilnym, kab ułady raźvivali z takimi pradpryjemstvami sacyjalnaje partnerstva. Kab dla takich pradpryjemstvaŭ byli peŭnyja dziaržaŭnyja zakazy. Zarobki ŭ nas nievialikija, ale my ŭsio ž taki padtrymlivajem značnuju častku invalidaŭ 3 hrupy, jakim składana vyžyvać tolki na dziaržaŭnuju dapamohu».

Rabočyja «Śviatłatechniki», darečy, sioleta źviarnulisia da Alaksandra Łukašenki z admysłovym listom nakont ukaranieńnia ŭ krainie takoha sacyjalnaha partnerstva z specyfičnymi pradpryjemstvami. Z Administracyi prezydenta list pracaŭnikoŭ pierasłali ŭ Homielski abłvykankam, a adtul — u administracyju Čyhunačnaha rajonu Homiela.

Nadzieja — na mienski futbolny stadyjon

Adnaŭleńnie pracy ŭ traŭni kiraŭniki «Śviatłatechniki» źviazvajuć najpierš z atrymańniem zakazu na vyrab 25 tysiač plastmasavych siadzieńniaŭ dla nacyjanalnaha futbolnaha stadyjonu ŭ Miensku. Košt zakazu — 28 miljardaŭ rubloŭ. Heta na cełyja 3 miljardy bolš, čym hadavy vyrab pradukcyi «Śviatłatechniki».

Adna tolki akaličnaść tumanić takuju perspektyvu. Nacyjanalny stadyjon vyrašyli budavać nie na miescy siońniašniaha stadyjonu «Dynama» i nia ŭ Ščomyślicy, jak mierkavałasia raniej, a kala stadyjonu «Traktar». Zakazčykam novaha ambitnaha prajektu koštam 95 miljonaŭ dalaraŭ vystupili biznesoviec Jury Čyž, Mienharvykankam i Biełaruskaja federacyja futbołu. Ale ž viadoma, što biznesoviec Čyž apynuŭsia za kratami, i perspektyva budoŭli futbolnaha stadyjonu ciapier pad vialikim pytańniem. Hetaksama jak i perspektyva plonnaj pracy «Śviatłatechniki» paśla vymušanaha dvuchmiesiačnaha adpačynku.

• 0
• 0
• 0
• 0
• 0
• 0
• 0
• 0