Denaminacyja, zapłanavanaja ŭ Biełarusi sioleta, nie pryviadzie da rostu cen. Takoje mierkavańnie vykazaŭ namieśnik ministra handlu Edvard Matulis 13 krasavika na pres-kanfierencyi ŭ pres-centry infarmacyjnaha ahienctva BiełTA.
Pry hetym jon adznačyŭ, što pieraprahramavańnie niekatorych kasavych aparataŭ zapatrabuje peŭnych vydatkaŭ. «Biezumoŭna, madernizacyja luboha abstalavańnia potym kładziecca albo na vydatki, albo pravodzicca za košt prybytku. Toje, što heta adabjecca na canie tavaraŭ, ja nie dumaju. Nie dumaju, što źmieny, źviazanyja z denaminacyjaj, mocna adabjucca na canie», — ličyć Matulis.
Zhodna z raźlikami śpiecyjalistaŭ, prykładny košt abnaŭleńnia prahram dla niekatorych marak kasavych aparataŭ składaje 30 dołaraŭ na adzin aparat. Heta «niaznačnyja zatraty dla handlu», ličyć namieśnik ministra.
«Kažuć, što rost moža adbycca z-za akruhleńnia. Ale my ŭžo kanfiskavali z abaračeńnia drobnyja kupiury ŭ 20 i 50 rubloŭ, zastalisia 100 rubloŭ, jakija zamianiajucca adnoj kapiejkaj. Tut taksama prablem niejkich nie budzie», — miarkuje Matulis.
Jak adznačyła načalnik upraŭleńnia arhanizacyi handlu i pasłuh Ministerstva handlu Vijaleta Brazoŭskaja, Nacbank zajaviŭ, što 1 lipienia, u pieršy dzień praviadzieńnia denaminacyi, bankaŭskaja sistema pracavać nie budzie. «Ale handal spynić pracu navat na adzin dzień nie moža, my pradajem tavary i pieršaj nieabchodnaści, pradukty charčavańnia. My da pytańniaŭ denaminacyi padyšli daŭno, vyrašajem ich z pačatku hoda. Usie subjekty handlu akreślili sabie płan pracy pa asnaščeńni mahazinaŭ, źviazanaj sa źmienami. Minhandlu z 1 krasavika rekamiendavaŭ afarmlać ceńniki jak u starych hrašovych znakach, tak i ŭ novych. Heta zroblena dla taho, kab pryvykli i rabotniki handlu, i spažyŭcy da novaha farmatu cen z kapiejkami», — adznačyła pradstaŭnik ministerstva.
Pavodle jaje słoŭ, pa miery ŭkaranieńnia novaha prahramnaha zabieśpiačeńnia abo novych kasavych aparataŭ, vahavoha abstalavańnia, pradpryjemstvy buduć hatovyja da denaminacyi. «U nas nie budzie takoha, što ŭ noč na 1 lipienia handal zakryjecca. U nas idzie pastupovy praces. Chto moža, užo siońnia atrymlivaje novy kasavy aparat z režymam «kapiejki». Jon pakul nie pracuje, a zapracuje z 1 lipienia», — adznačyła Brazoŭskaja.
Jana nahadała, što handlovyja arhanizacyi buduć prymać da apłaty staryja kupiury da kanca hetaha hoda. «My dumajem, što buduć skarhi spažyŭcoŭ na pravilnaść raźliku, zdačy», — adznačyła načalnik upraŭleńnia. Pry hetym jana padkreśliła, što pravodzicca maštabnaja praca pa navučańni piersanału, u krasaviku buduć dadzienyja dadatkovyja rastłumačeńni dla kasiraŭ-apieracyjanistaŭ.
Jak adznačyŭ vykanaŭčy dyrektar asacyjacyi «Kasavyja aparaty, kampjutarnyja sistemy i handlova-technałahičnaje abstalavańnie» Uładzimir Papłaŭski, pry najaŭnaści parka ŭ 243 tys. kasavych aparataŭ «u adnu noč pieranaładzić kasavaje abstalavańnie niemahčyma». «Hety praces budzie raściahnuty ŭ časie, my pasprabujem jaho minimizavać. Pasprabujem nie spynić i bieznajaŭnyja pracesy, płaciežnyja terminały buduć pieraviedzienyja na pracu z novym kodam valuty. My pastarajemsia zabiaśpiečyć usim nieabchodnym dla pracy ŭ novym maštabie cen i płaciežnyja terminały», — skazaŭ jon.
Ciapier čytajuć
Zakinutuju siadzibu Bahdanovičaŭ pierarobiać u bucikovy hatel FOTY7
Kamientary