Kiraŭnik pradstaŭnictva Jeŭrasajuza ŭ Minsku: My zastajemsia prychilnikami krytyčnaha ŭzajemadziejańnia ź Biełaruśsiu

Jeŭrasajuz zastajecca prychilnikam krytyčnaha ŭzajemadziejańnia ź Biełaruśsiu, nadajučy vialikaje značeńnie supracoŭnictvu z krainaj i jaje narodam. Pra heta zajaviła kiraŭnik pradstaŭnictva ES u Minsku Andrea Viktaryn na kanfierencyi arhanizacyj hramadzianskaj supolnaści 23 krasavika ŭ Minsku.

Pavodle jaje słoŭ, za apošnija dva hady byli zroblenyja niekalki krokaŭ da palapšeńnia supracoŭnictva pamiž Biełaruśsiu i ES. U pryvatnaści, pačalisia pieramovy pa spraščeńni vizavaha režymu i readmisii, adnaviŭsia dyjałoh pa pravach čałavieka, Biełaruś aktyŭna ŭdzielničaje ŭ prahramie ES «Uschodniaje partniorstva».

Viktaryn taksama nazvała važnaj «kanstruktyŭnuju rolu» Biełarusi ŭ svaim rehijonie, jaje spryjańnie realizacyi minskich pahadnieńniaŭ. Akramia taho, pavodle jaje słoŭ, vyzvaleńnie palitviaźniaŭ stała krokam, jakoha daŭno damahaŭsia ES, a prezidenckija vybary 2015 hoda «prajšli biez hvałtu».

Hetyja kroki, zaznačyła Viktaryn, pryviali da taho, što Jeŭrasajuz ad pačatku prypyniŭ, a zatym i naohuł admianiŭ sankcyi ŭ dačynieńni da bolšaści z tych, chto byŭ u «čornym śpisie» ES.

U toj ža čas, skazała jana, situacyja z pravami čałavieka ŭ Biełarusi «praciahvaje zastavacca pradmietam zakłapočanaści». «My pierakananyja, što adnosiny ES — Biełaruś pavinny być zasnavanyja na ahulnych kaštoŭnaściach, siarod jakich — vykanańnie pravoŭ čałavieka», — padkreśliła jana.

Viktaryn zaznačyła, što ŭ Biełarusi sioleta adbuducca parłamienckija vybary, źviarnuŭšy ŭvahu na toje, što ES zaklikaje ŭličyć rekamiendacyi BDIPČ ABSIE pa demakratyzacyi vybarčaha zakanadaŭstva i vybarčaha pracesu, zroblenyja pa vynikach prezidenckich vybaraŭ. «U hetym kantekście važnaja reabilitacyja byłych palitviaźniaŭ, adnaŭleńnie ich u palityčnych i hramadzianskich pravach, a taksama realizacyja na praktycy svabod palityčnych partyj, hramadskich abjadnańniaŭ i ŚMI», — zajaviła jana.

Viktaryn źviarnuła ŭvahu na toje, što jašče adnym pytańniem zaniepakojenaści ES źjaŭlajecca ŭžyvańnie ŭ Biełarusi śmiarotnaj kary. «My pierakananyja, što nichto nie maje prava zabirać čužoje žyćcio. Mienavita tamu my prapanujem uvieści maratoryj na ŭžyvańnie śmiarotnaj kary», — skazała kiraŭnik pradstaŭnictva Jeŭrasajuza. Hetaja prablema, pavodle słoŭ Viktaryn, budzie abmiarkoŭvacca na čarhovym raŭndzie pieramovaŭ pa pravach čałavieka, jaki adbudziecca ŭ červieni ŭ Minsku.

U kanfierencyi «Raźvićcio nacyjanalnaj płatformy: novyja stratehii», arhanizataram jakoj źjaŭlajecca Biełaruskaja nacyjanalnaja płatforma Forumu hramadzianskaj supolnaści Uschodniaha partniorstva, udzielničajuć pradstaŭniki kala 70 hramadskich arhanizacyj. Asnoŭnyja zadačy kanfierencyi — vyznačycca z tematyčnymi napramkami ŭ dziejnaści BNP i pryniać Stratehičny płan na 2016—2018 hady. Palityčnaja meta kanfierencyi — pryniaćcie «Darožnaj karty supracoŭnictva Pradstaŭnictva ES u Minsku i biełaruskich NDA».

• 0
• 0
• 0
• 0
• 0
• 0
• 0
• 0