Pradstaŭniki arhkamiteta pa stvareńni partyi «Biełaruskaja chryścijanskaja demakratyja» Volha Kavalkova, Vital Rymašeŭski, Dzianis Sadoŭski i Maryna Chomič 5 maja naviedali Saviet ministraŭ i Ministerstva ekanomiki ź simvaličnymi pustymi kašalkami, pryznačanymi dla kiraŭnikoŭ hetych dziaržorhanaŭ.
«Pusty kašalok — heta simvał taho, što hrošaj u naroda zaraz niama. A ŭ ministraŭ hrošaj šmat, napeŭna, u adzin kašalok jany ŭsie nie źmiaščajucca. My im padaryli jašče adzin», — paviedamiŭ Rymašeŭski.
U adździeły pa zvarotach hramadzian Minekanomiki i Saŭmina pieradadzienyja kalektyŭny zvarot i kancepcyja madernizacyi ekanamičnaj sistemy Biełarusi, raspracavanaja z udziełam niezaležnych ekśpiertaŭ, u tym liku byłoha kiraŭnika Nacbanka Stanisłava Bahdankieviča. Hetyja dakumienty pa pošcie buduć taksama nakiravanyja ŭ Administracyju prezidenta, Ministerstva finansaŭ i Nacyjanalny bank.
U zvarocie adznačajecca, što ekanomika Biełarusi «ŭvajšła ŭ vostruju fazu zaciažnoha sacyjalna-ekanamičnaha kryzisu, achviarami jakoha ŭ pieršuju čarhu stanoviacca biełaruskija siem`i, jakija nie bačać pierśpiektyŭ u zaŭtrašnim dni».
Aktyvisty BCHD patrabujuć ad urada raspracoŭki kompleksnaj prahramy ekanamičnych pieraŭtvareńniaŭ, u jakoj byli b praduhledžanyja: stvareńnie narmalnych pravavych umoŭ dla pradprymalnikaŭ, stvareńnie novych pracoŭnych miescaŭ, miery pa supraćdziejańni čynoŭnickamu i sudziejskamu samavolstvu i inšaje.
Za pieramiaščeńniem pradstaŭnikoŭ BCHD ad Ministerstva ekanomiki da Doma ŭrada sačyli supracoŭniki pravaachoŭnych orhanaŭ u cyvilnym, jany viali videazapis taho, što adbyvałasia.
Načalnik adździeła suviaziaŭ z hramadskaściu Ministerstva ekanomiki Viktar Jeŭtuchoŭ udakładniŭ BiełaPAN abstaviny vizitu ŭ viedamstva pradstaŭnikoŭ BCHD. Pavodle jaho słoŭ, pusty kašalok nie byŭ pieradadzieny ministru, choć aktyvisty i sprabavali heta zrabić. «Pryjšła hrupa ludziej, pieradali zvarot, jaho zarehistravali. Taksama jany chacieli zapisacca na pryjom da ministra finansaŭ. Kali nam udałosia rastłumačyć, što jany znachodziacca nie ŭ Ministerstvie finansaŭ, a ŭ Ministerstvie ekanomiki, jany adkarektavali svaju prośbu i zapisalisia na pryjom da ministra ekanomiki. Kašalkom niejkim machali, u ruki sprabavali sovać, ale nichto jaho nie ŭziaŭ», — skazaŭ Jeŭtuchoŭ.
Kamientary