U Biełarusi siońnia prachodzić «Noč muziejaŭ» — prahramy ŭ Minsku

 Muziei ŭ stalicy, abłaściach i rajonach Biełarusi ŭ čarhovy raz dałučylisia da mižnarodnaj kulturnaj akcyi «Noč muziejaŭ».

«Noč muziejaŭ» papularyzujecca jak dadatak da Mižnarodnaha dnia muziejaŭ, jaki tradycyjna adznačajecca 18 maja. U Biełarusi hetu kulturnuju akcyju, jak praviła, pravodziać u najbližejšuju da 18 maja subotu, jakaja sioleta vypała na 21 maja.

Nacyjanalny mastacki muziej u Minsku «Noč muziejaŭ» tradycyjna adznačaje maštabna, vykarystoŭvajučy maksimum svaich placovak. U hetym hodzie načnaja akcyja ŭ NMM nosić nazvu «Muziej ŭčora + zaŭtra». Pačynajučy z 18.30 naviedvalnikaŭ muzieja čakajuć teatralnyja pakazy, vystupleńni muzyčnych hurtoŭ Tomato Jam, Chatte Noir, Mustelide, By Street Jazz, Lumiere Tales, «Nahual». U załach muzieja projdzie kviest pa pastajannaj ekspazicyi «Mastak vs Skulptar», budzie pracavać mnostva novych instalacyj i interaktyŭnych prajektaŭ, a taksama mnohaje inšaje.

Hości asnoŭnaha budynka Nacyjanalnaha histaryčnaha muzieja Biełarusi zmohuć naviedać dva interaktyŭnyja prajekty, u pryvatnaści vystavu 3D-karcin «Iluzoryum» i vystavu pryboraŭ i instrumientaŭ, jakija možna i treba čapać rukami, pad nazvaj «Ekśpierymientus». U adnoj z załaŭ muzieja taksama projdzie čempijanat pa hulniach dla starych videaprystavak.

Asobnyja prahramy dla «Nočy muziejaŭ» padrychtavali ŭsie filijały histaryčnaha muzieja, uklučajučy Muziej pryrody i ekałohii, dzie projdzie kviest «Ptuški kala puški», atrakcyjon «Skrynia zahadak pryrody», majstar-kłasy, konkursy. Tam ža budzie pracavać fitabar i sałon ekatatuirovak.

Akcyja «Noč muziejaŭ» u Dziaržaŭnym litaraturnym muziei Janki Kupały prymierkavana da 100-hadovaha jubileju viančańnia kłasika biełaruskaj litaratury i Uładzisłavy Stankievič, tamu značnaja častka mierapryjemstvaŭ pryśviečana mienavita viasielnaj temie. Tak, hości muzieja zmohuć trapić na ŭračystuju cyrymoniju zaklučeńnia šlubu ŭ supravadžeńni duchavoha arkiestra Dziaržpahrankamiteta, a taksama na cyrymoniju ŭšanavańnia par, jakija adznačajuć u 2016 hodzie jubilej viasiella. U parku imia Kupały projdzie pakaz viasielnych sukienak, a ŭ muziei — unikalnaja vystava «Iści supolna praz usio žyćcio», na jakoj pradstaŭleny viasielnyja fatahrafii, pierapiska, vieršy-pryśviačeńni Kupały i inšych znakamitych biełaruskich paetaŭ.

U muziei taksama budzie pracavać fotavystava «Kab adnojčy…» Džona Kundstatera, projduć majstar-kłasy pa fłarystycy, vyrabie lalek-abiarehaŭ, staražytnych viasielnych pieśniach i tancach i mnohaje inšaje. Pierad haściami na hanku muzieja vystupiać multyinstrumientalistka i vakalistka Kaciaryna Vadanosava, bard Aleś Kamocki, hurty «Lepšy kvas», «9 miesiacaŭ viasny», «Arkiestr Fišera», Amaroka, Re1ikt.

• 0
• 0
• 0
• 0
• 0
• 0
• 0
• 0