Prablema kalininhradskich tavaraŭ, kanfiskavanych biełaruskaj mytniaj u śniežni 2014 hoda, budzie vyrašacca ŭ sudzie.
Pra heta paviedamiŭ u niadzielu žurnalistam hubiernatar vobłaści Mikałaj Cukanaŭ, padvodziačy vyniki ŭdziełu ŭ Forumie rehijonaŭ Biełarusi i Rasii, jaki prajšoŭ u Minsku 7—8 červienia, pieradaje TASS.
«My, viadoma, abmiarkoŭvali prablemu televizaraŭ i tavaraŭ, jakija, pa niezrazumiełych nam pryčynach byli kanfiskavanyja. Zaraz my źviarnulisia ŭ sud, i ŭ sudovym paradku budziem vyrašać hetuju prablemu», — skazaŭ jon.
Havorka idzie nie ab viartańni tavaraŭ, a ab kampiensacyi strat.
U śniežni 2014 hoda biełaruskaj mytniaj byli zatrymanyja 38 mašyn z hruzami ad bolš jak 10 kalininhradskich kampanij — vytvorcaŭ televizaraŭ i pryjomnikaŭ sihnałaŭ ličbavaha telebačańnia. Pradukcyja pieravoziłasia z Kalininhradskaj vobłaści ŭ Rasiju.
Padstavaj dla kanfiskacyi, pavodle biełaruskaj mytni, stała niedekłaravańnie (niedakładnaje dekłaravańnie) tavaraŭ.
Rasijskija ŭłady zapeŭnivajuć, što hruz byŭ lehalnym i vyrablaŭsia miascovymi firmami.
Sa svajho boku, mytnia Biełarusi śćviardžaje, što zakonna zatrymała bytavuju techniku, bo ŭsio śviedčyć pra toje, što heta reekspart z Kitaju.
Pavodle acenak kalininhradskich uładaŭ, ahulny abjom strat rehijanalnych kampanij skłaŭ kala 500 młn rubloŭ.
Kamientary