Byccam i nie bambili ŭ hety dzień Biełastok, Bieraście, Horadzien…
Byccam nie rušyli niamieckija vojski na Miensk, kab uziać u abcuhi, u toje, što budzie nazvana Biełastockim (Biełastocka-Mienskim) katłom, vialikuju hrupoŭku Čyrvonaj Armii…
U hety dzień usie sučasnym bonzam ahulnadziaržaŭnaha, rehijanalnaha dy łakalnaha ŭzroŭniaŭ naležała b pryjści na mahiły voinaŭ.
U hety dzień sučasnym bonzam naležała b pryjści da mahił pałonnych čyrvonaarmiejcaŭ.
U hety dzień sučasnym bonzam naležała b pryjści ŭ Traścianiec, Kałdyčeva, Azaryčy, inšyja łahiery śmierci, pryjści da Jamy ŭ Miensku, da mahiłaŭ źniščanych nacystami našych suajčyńnikaŭ-habrejaŭ.
U hety dzień sučasnym bonzam naležała b ušanavać pamiać zahinułych u šmatlikich chatyniach.
Ja nie spadziajusia, što vyrasłyja z balšavicka-enkavedešnaha šyniala sučasnyja bonzy ŭšanujuć pamiać viaźniaŭ savieckich turmaŭ, jakich savieckija ž karniki rasstrelvali ŭ pieršyja dni vajny.
Ja nie spadziajusia, što vyrasłyja z balšavicka-enkavedešnaha šyniala sučasnyja bonzy patłumačać narodu i zahadajuć zapisać dla viečnaha pamiatavańnia ŭ padručniki, chto vinavaty ŭ tym, što Niamieččyna zachapiła ŭsiu Biełaruś. Vinavaty ŭ tym, što saviecki Čyrvony Kryž nie pryjšoŭ da dapamohu miljonam svaich suajčyńnikaŭ, jakija trapili ŭ pałon.
Ja nie spadziajusia, što vyrasłyja z balšavicka-enkavedešnaha šyniala sučasnyja bonzy patłumačać narodu i zahadajuć zapisać dla viečnaha pamiatavańnia ŭ padručniki, jak u Savieckim Sajuzie kavali mieč dla Viermachta, jak balšaviki spraŭna pastaŭlali Niamieččynie patrebnaje dla adnaŭleńnia jaje militarnaha patencyjału.
Ja nie spadziajusia, što vyrasłyja z balšavicka-enkavedešnaha šyniala sučasnyja bonzy patłumačać narodu i zahadajuć zapisać dla viečnaha pamiatavańnia ŭ padručniki, jak našych mabilizavanych u 1944-m i na pačatku 1945-ha suajčyńnikaŭ kidali ŭ miasarezki ŭ Prusii i Brandenburhu.
Byŭ u savieckaj historyi adzin momant, kali kiraŭnictva SSSR zhadała pra dzień 22 červienia.
Napiaredadni hetaj daty ŭ 1961-m u Maskvie adbyłosia pasiadžeńnie. Heta było śpiecyfična savieckaje, śpiecyfična balšavickaje mierapryjemstva. Mikita Chruščoŭ dy inšyja dziejačy, jakija ŭ čas vajny słužyli ŭ armii, źjavilisia pierad publikaj u novieńkich mundzirach. Ni dakładčyk (maršał Radzivon Malinoŭski), ni Chruščoŭ u svajoj pramovie tak i nie skazali narodu i śvietu, kolki ž ludziej straciŭ Saviecki Sajuz u toj vajnie. Chłusić pra 9 miljonaŭ, jak heta zrabiŭ Stalin, było ŭžo niajomka, nazvać sapraŭdnuju ličbu – strašna. Zatoje na tym pasiadžeńni byŭ ahučany dzikunski i, nie pabajusia hetaha słova, ludajedski arhumient na karyść vyrašalnaj roli SSSR u razhromie nacysckaj Niamieččyny. Hučaŭ toj arhumient tak: Złučanyja Štaty stracili 300 tysiač čałaviek, Anhlija – kala 250 tysiač, a voś na savieckim froncie «takimi ličbami ličylisia straty ŭ asobnych bitvach (sražienijach)».
Chto moh padumać, što čałaviek, jaki na pasiadžeńni 21 červienia 1961 h. siadzieŭ u prezidyumie ŭ mundziry hienierał-majora, praź niapoŭnyja piać hadoŭ abvieścić śviatočnym dniom 9 maja? Stalin, jaki viedaŭ ab sapraŭdnych stratach, ab sapraŭdnaj canie pieramohi, nie advažvaŭsia na takoje. Jaho vychavancy – advažylisia. I ich arhumientacyja z časoŭ Mikity Chruščova nie pamianiałasia. Mała taho, dzień 9 maja staŭ nie prosta Dniom Pieramohi, a Dniom Vialikaj Pieramohi. Pisać inakš ciapier nielha.
Cynizm sučasnych bonzaŭ zaškalvaje.
Jak byccam nie zahinuli ŭ toj vajnie 15 760 tysiač mirnych žycharoŭ. Jak byccam nie stracili ŭ toj vajnie 8 850 tysiač čyrvonaarmiejcaŭ zabitymi Jak byccam nie było paraniena 15 685 tysiač bajcoŭ.
Cynizm zaškalvaje.
Vialikaja Pieramoha, a ŭdzielniki vajny i jaje achviary (praktyčna ŭsie žychary Biełarusi, jakija naradzilisia da lipienia 1944-ha) i dahetul žyvuć u draŭlanych (dyj u muravanych) damach biez vadapravoda, biez łaźniaŭ, haračaj vady i kanalizacyi.
Vialikaja Pieramoha, a ŭ kałodziežach u mnohich vioskach vada i dahetul nie adpaviadaje sanitarnym normam.
Vialikaja Pieramoha, a pamiž mnohimi nasielenymi punktami i dahetul niama narmalnych daroh.
Vialikaja Pieramoha, a jakaść žyćcia… Nie budziem pra jakaść žyćcia.
…Jany nie pryjduć 22 červienia na mahiły bajcoŭ i pałonnych, bo dla hetaha patrabujecca inšy mientalitet, inšaja škała kaštoŭnaściaŭ, patrabujecca ŭśviedamleńnie taho, što mieraj usich rečaŭ jość čałaviek.
Skrucha ahortvaje jašče i tamu, što i demakratyčnaja supolnaść jak byccam zabyła pra hety dzień. Dzień, pra jaki nielha zabyvać. Dzień, vinavatymi za jaki źjaŭlajucca tyja, što pastavili sabie za metu pavialičyć kolkaść savieckich respublik.
Kamientary