Značnaje skaračeńnie pastavak u Biełaruś rasijskaj nafty źviazanaje nie z ekanamičnymi, a z palityčnymi pryčynami, u pryvatnaści sa zbližeńniem Minska z Zachadam.
Pra heta piša 7 lipienia Reuters sa spasyłkaj na ananimnuju vysokapastaŭlenuju krynicu ŭ enierhietyčnaj halinie Rasii. Takim čynam, rastłumačyła krynica, Alaksandra Łukašenku «karajuć za jaho padładžavańnie da Zachadu i krytyčnyja zaŭvahi na adras Rasii».
Zhodna sa źviestkami Reuters, ź lipienia rasijski manapalist u halinie naftavaj transparciroŭki kampanija «Tranśniefć» pastaŭlaje ŭ Biełaruś prykładna na 40% mienš nafty, čym u druhim kvartale hetaha hoda.
Zvyčajna Rasija pastaŭlaje ŭ Biełaruś krychu bolš za 20 młn. ton nafty ŭ hod, udakładniaje ahienctva.
Apošnim časam Łukašenka nieadnarazova zajaŭlaŭ pra nieabchodnaść palapšeńnia stasunkaŭ Biełarusi z Zachadam. Naprykład, vystupajučy 22 červienia na Usiebiełaruskim narodnym schodzie, jon adznačyŭ, što treba nahaniać upuščanaje ŭ adnosinach ź Jeŭrasajuzam i ZŠA.
«Admova ad sankcyjnaj palityki ŭ dačynieńni da Biełarusi adkryvaje novyja mahčymaści ŭ raźvićci ŭzajemadziejańnia, i było b hrech hetym nie skarystacca. Nam, pa vialikim rachunku, treba nahaniać upuščanaje i vyjści dla pačatku na toj uzrovień adnosin ź Jeŭrasajuzam i ZŠA, jaki isnuje ŭ našych partnioraŭ pa JEAES i SND — u toj ža Rasii, Armienii, Kazachstanie», — skazaŭ Łukašenka.
Jon taksama zajaviŭ, što «klučavoj zadačaj na pierśpiektyvu» źjaŭlajecca «poŭnaja narmalizacyja adnosin i vychad na zaklučeńnie bazavaha pahadnieńnia pamiž Biełaruśsiu i Jeŭraźviazam».
U červieni ŭ Rasii zahavaryli pra skaračeńnie pastavak nafty ŭ Biełaruś. Hety praces źjaŭlajecca «kampiensacyjaj dachodaŭ, jakija vypadajuć, ad niedapastaŭlenych ŭ Rasiju naftapraduktaŭ, što biełaruski bok pavinien viartać va ŭzhodnienych abjomach», zajaviŭ žurnalistam 16 červienia prezident «Tranśniefci» Mikałaj Tokaraŭ.
Jon paviedamiŭ, što abjom transparciroŭki nafty ŭ Biełaruś u trecim i čaćviortym kvartałach 2016 hoda moža być źnižany na 5 młn. ton.
«Tranśniefć» abviaściła, što ad 1 lipienia skaračaje pastaŭki ŭ Biełaruś na tracinu. Za dzień da hetaha pradstaŭnik kampanii skazaŭ žurnalistam, što na praciahu lipienia na navapołacki «Naftan» i Mazyrski naftapierapracoŭčy zavod budzie pastaŭlena pa 590 tysiač ton nafty.
U kancernie «Biełnaftachim» situacyju vakoł pastavak rasijskaj nafty pakul nie kamientujuć, choć u siaredzinie červienia pres-sakratar kancerna paviedamiła BiełaPAN, što «Biełnaftachim» płanuje pravieści ź Minenierha RF kansultacyi nakont rašeńnia rasijskaha boku skaracić pastaŭki.
Aficyjnaja statystyka ab abjomach pastavak publikujecca ŭ 20-ch dniach kožnaha miesiaca.
Kamientary